Kide‑oos Kov Yeej Cov Midees

1 Yelunpa‑as uas yog Kide‑oos thiab cov tibneeg sawvdaws uas nrog nws sawv ntxov mus ua yeej rau ntawm qhov dej txhawv Halaus. Cov Midees lub yeej kuj nyob ntawm lawv sab ped hauv lub hav uas ze lub roob Maules.

2 (יחוח)Yahweh hais rau Kide‑oos tias, cov tibneeg uas nrog koj mus no coob dhau uas kuv yuav muab cov Midees rau hauv lawv txhais tes, ntshai tsam cov Ixayees yuav khav theeb hais tias, yog peb txhais tes cawm tau peb dim.

3 Yog li ntawd cia li tshaj tawm rau sawvdaws tias, leejtwg ntshai thiab tshee, kuj cia tus ntawd tawm ntawm lub roob Kile‑as rov mus tsev. Mas muaj nees nkaum ob txhiab leej rov mus lawm, tshuav kaum txhiab leej nyob xwb.

4 (יחוח)Yahweh hais rau Kide‑oos tias, cov tibneeg tseem coob dhau. Cia li coj lawv nqis mus nram hav dej mas kuv yuav sim lawv rau koj qhov ntawd. Tus uas kuv hais rau koj tias, tus no nrog koj mus, mas tus ntawd yuav nrog koj mus.  Tus uas kuv hais rau koj tias, tus no tsis txhob nrog koj mus, tus ntawd yuav tau tsis txhob mus.

5 Nws thiaj coj cov tibneeg nqis mus nram hav dej. (יחוח)Yahweh hais rau Kide‑oos tias, txhua tus uas xuas nplaig yaim dej yam li dev muab cais rau ib qho. Txhua tus uas txhos caug ntua rua ncauj haus mas muab cais rau ib qho ib yam nkaus.

6 Cov uas xuas tes ntaus dej los yaim muaj peb puas leej, tiamsis dua li tej mas puav leej txhos caug rua ncauj haus.

7 (יחוח)Yahweh hais rau Kide‑oos tias, kuv yuav siv peb puas leej uas yaim dej no cawm nej dim thiab muab cov Midees rau hauv koj txhais tes.  Dua li cov mas cia li tso sawvdaws rov mus nyias vaj nyias tsev.

8 Cov uas nyob txawm khaws cov uas mus tsev tej mov noj thiab raj kub yaj cia.  Dua li cov mas Kide‑oos hais kom sawvdaws nyias rov mus rau nyias vaj nyias tsev, tiamsis cia peb puas leej ntawd nrog Kide‑oos nyob. Cov Midees lub yeej nyob ntawm lawv lawm nram hav.

9 Hmo ntawd (יחוח)Yahweh hais rau Kide‑oos tias, cia li sawv tsees mus ntaus lawv lub yeej, rau qhov kuv twb muab lawv rau hauv koj txhais tes lawm.

10 Tiamsis yog koj ntshai mus ntaus mas koj cia li coj koj tus tub qhe Pulas nrog koj mus kom txog lawv lub yeej.

11 Koj yuav hnov lawv hais abtsi mas dhau ntawd koj txhais tes yuav muaj zog mus ntaus lawv lub yeej. Kide‑oos thiaj coj nws tus tub qhe Pulas nrog nws mus txog ntawm cov tub rog uas zov khuav sab nraum lub yeej.

12 Mas cov Midees thiab cov Amalej thiab cov tibneeg uas nyob sab hnub tuaj sawvdaws pw thoob plaws lub hav coob yam nkaus li tej niag pab kooj txig. Lawv tej ntxhuav kuj suav tsis txheeb, coob yam nkaus li tej xuab zeb ntawm ntug hiav txwv.

13 Thaum Kide‑oos nkawv tuaj txog muaj ib tug yawg txawm piav nws txoj yog toog rau ib tug mloog hais tias, kuv ua ib txoj yog toog pom ib lub ncuav qeb ntog los rau hauv cov Midees lub yeej, los txog ib lub tsev ntaub txawm raug ua rau lub tsev ntaub vau ntxeev zuav zog rau hauv av lawm.  

14 Nws tus kwv luag txawm teb tias, tej no yeej yog Yahas tus tub Kide‑oos uas yog tib neeg Ixayees rab ntaj xwb lauj! (יחוח)Yahweh twb muab cov Midees thiab tej pab tub rog huvsi cob rau hauv Kide‑oos txhais tes lawm.

15 Thaum Kide‑oos hnov nkawv piav txoj yog toog thiab lub ntsiab yog toog ntawd lawm, nws txawm pe hawm (יחוח)Yahweh, thiab rov mus rau hauv cov Ixayees lub yeej thiab hais tias, cia li sawv tsees, (יחוח)Yahweh twb muab Midees cov tub rog rau nej txhais tes lawm.

16 Kide‑oos thiaj muab peb puas leej ntawd faib ua peb pab, thiab muab ib leeg, ib lub raj kub yaj thiab ib leeg ib lub hub av, muaj ib teg tsau nyob hauv txhua lub hub ntawd.

17 Thiab nws hais rau lawv tias, nej saib ntsoov kuv thiab ua ib yam li kuv. Thaum kuv mus txog lawv lub yeej sab nraud, kuv ua li cas, nej ua ib yam li ntawd.  

18 Thaum kuv thiab pab uas nrog kuv ua ke tshuab raj kub yaj, nej cia li tshuab raj kub yaj puag ncig lawv lub yeej thiab qw hais tias, peb ua rau (יחוח)Yahweh thiab ua rau Kide‑oos.

19 Kide‑oos thiab ib puas leej tub rog uas nrog nws thiaj tuaj txog sab nraum lawv lub yeej rau thaum ib tag hmo, cov Midees nyuam qhuav hloov kiag cov tibneeg zov khuav. Kide‑oos lawv txawm tshuab raj kub yaj thiab tsoo tej hub av ntawm lawv txhais tes tawg.

20 Peb pab tub rog txawm tshuab raj kub yaj thiab tsoo tej hub av tawg, lawv sab tes laug tuav teg tsau, sab tes xis tuav raj kub yaj yuav tshuab thiab lawv qw tias, (יחוח)Yahweh rab ntaj thiab Kide‑oos rab ntaj tuaj lawm lauj!

21 Lawv nyias sawv nyias qhov chaw vij thoob plaws lub yeej ntawd, mas cov Midees pab tub rog sawvdaws qw ntsoog qees dhia khiav.

22 Thaum peb puas leej ntawd tshuab raj kub yaj, (יחוח)Yahweh ua rau Midees cov tub rog sawvdaws rov sib tua ib leeg tua ib leeg, mas lawv cov tub rog thiaj li khiav mus rau lub moos Xelelas thiab mus txog Npesithas thiab mus txog Anpees Mehaulas ciam teb uas nyob ze lub moos Thanpas.  

23 Cov Ixayees raug hu tawm hauv Nathalis thiab Asaws thiab thoob plaws Manaxes teb chaws tuaj, mas lawv caum cov Midees qab mus.

24 Kide‑oos txib tibneeg mus thoob plaws pem toj siab Efa‑is tebchaws hais tias, cia li nqis los ua rog rau cov Midees thiab txeeb txhua ntu dej ntiav mus txog ntua lub moos Npenpalas thiab tus dej Yaladees huvsi. Lawv kuj hu Efa‑is cov tub rog sawvdaws tuaj. Cov Efa‑is txeeb txhua ntu dej ntiav mus txog ntua lub moos Npenpalas thiab tus dej Yaladees huvsi.

25 Lawv ntes tau cov Midees ob tug thawj, yog Aulej thiab Xeeb. Lawv muab Aulej tua rau ntawm lub pob zeb Aulej thiab muab Xeeb tua rau ntawm lub qhov tsuam txiv hmab Xeeb, thiab caum cov Midees mus. Lawv coj Aulej lub taubhau thiab Xeeb lub taubhau los rau Kide‑oos ntawm tus dej Yaladees sab hnub tuaj.