Lus Piv Txwv Kev Sib Yuav

1 Kwvtij sawvdaws, nej tsis paub lov? Kuv hais rau cov uas paub Mauxes txoj kevcai. Txoj kevcai muaj hwjchim kav tibneeg, tsuas yog thaum uas nws muaj txojsia nyob xwb. 2 Ib yam li tus pojniam uas yuav txiv lawm, mas raws li txoj cai thaum tus txiv tseem nyob, nws yuav tsum nrog tus txiv nyob. Yog tus txiv tuag lawm, nws thiaj dim txoj kevcai uas muaj txiv.

3 Vim li no, yog tus pojniam ntawd cia li mus muaj dua lwm tus rau thaum tus txiv tseem muaj txojsia nyob, nws yuav tau lub npe tias deev hluas nraug. Tiamsis yog nws tus txiv tuag lawm, nws kuj dim txoj kevcai ntawd. Yog nws mus yuav dua lwm tus txiv, kuj tsis yog deev hluas nraug. 4 Ib yam nkaus li ntawd, kuv cov kwvtij, nej kuj tuag ntawm Mauxes txoj kevcai rau ntawm Messiah lub cev, kom nej thiaj ua tau lwm tus li, yog ua tus uas raug tsa sawv hauv qhov tuag rov los li, kom peb thiaj txi tau txiv rau Abba (יחוח)Yahweh.

5 Thaum peb muaj txojsia nyob hauv lub cev nqaij tawv, peb lub siab uas ntshaw ua phem, raug txoj kevcai tshum ua rau peb lub cev txi txiv uas coj mus txog txojkev tuag. 6 Tiamsis nimno peb twb dim hauv txoj kevcai lawm, yog peb tuag ntawm yam uas txeev khi peb cia, xwv peb thiaj ua tau qhev raws li Tus Ntsuj Plig Dawbhuv txojkev tshiab, tsis yog raws li txojkev qub uas sau cia.

​

Txoj Kevcai Txhob Kom Ua Txhaum

7 Yog li ntawd, peb yuav hais li cas? Yuav hais tias txoj kevcai yog kev txhaum lov? Tsis tau li. Yog tsis muaj txoj kevcai lawm, kuv yeej yuav tsis paub kev txhaum. Yog txoj kevcai tsis tau hais tias, tsis txhob ua siab hlob, kuv yeej tsis paub tias abtsi yog kev ua siab hlob. (Khiavdiam 20:17)

8 Tiamsis kev txhaum tos nrhw siv txoj kevcai ntawd, txhob ua rau kuv ua siab hlob rau txhua yam. Yog tsis muaj txoj kevcai, kev txhaum kuj tuag lawm. 9 Yav tag los, kuv ua lub neej tsis muaj txoj kevcai, tiamsis thaum muaj txoj kevcai los, kev txhaum kuj rov ciaj sia tuaj mas kuv thiaj tuag. 10 Txoj kevcai uas yuav tsum pub txojsia, kuv pom tias tsuas yog coj txojkev tuag los. 11 Rau qhov kev txhaum tos nrhw siv txoj kevcai ntawd dag ntxias kuv thiab muab kuv tua.

12 Vim li no, txoj kevcai yog kev dawb huv thiab tej kab ke, kuj dawb huv, thiab ncaj, thiab zoo kawg. 13 Yog li no, yam uas zoo, ntxeev ua txojkev tuag rau kuv lov? Tsis yog. Yog kev txhaum siv yam uas zoo, ua rau kev tuag tshwm rau hauv kuv, kom thiaj pom tias txojkev txhaum ntawd, txhaum tiag tiag li thiab, vim muaj txoj kevcai, kev txhaum thiaj phem kawg nkaus.

​

Tibneeg Muaj Ob Lub Siab

14 Peb paub tias, txoj kevcai yog hais txog sab ntsuj plig, tiamsis kuv yog nqaij tawv, kuv thiaj raug muab muag ua kev txhaum qhev.

15 Kuv tsis nkag siab tej uas kuv ua. Rau qhov kuv tsis ua yam uas kuv xav ua, kuv ho ua yam uas kuv ntxub xwb.

16 Yog kuv ua yam uas kuv tsis xav ua, kuv yeem lees tias txoj kevcai zoo.

17 Ces tsis yog kuv tus kheej ua, tiamsis yog kev txhaum uas nyob hauv kuv ua. 18 Rau qhov kuv paub tias, hauv kuv tus kheej uas yog hauv kuv lub cev nqaij tawv, tsis muaj ib qho zoo kiag li. Kuv txawj xav zoo, tiamsis ua tsis tau qhov zoo kiag li, 19 vim qhov zoo uas kuv xav ua, kuv kuj tsis ua, tiamsis qhov phem uas kuv tsis xav ua, kuv kuj tseem ua. 20 Yog kuv pheej ua yam uas kuv tsis xav ua, yeej tsis yog kuv tus kheej ua, tiamsis yog kev txhaum uas nyob hauv kuv ua xwb. 21 Yog li ntawd, kuv thiaj pom muaj ib txoj kevcai hais tias, yog thaum twg kuv xav ua qhov zoo, qhov phem kuj nyob ze. 22 Vim tob tob hauv kuv lub siab, yeej nyiam Abba (יחוח)Yahweh txoj kevcai, 23 tiamsis kuv pom muaj dua ib txoj kevcai nyob hauv kuv lub cev uas pheej tawm tsam txoj kevcai uas nyob hauv kuv lub siab thiab ua kom kuv raug txoj kev txhaum uas nyob hauv kuv lub cev ntes. 24 Ua li cas kuv yuav nyuaj siab ua luaj li no? Leejtwg yuav tso kuv dim hauv lub cev uas coj mus txog kev tuag no? 

25 Ua Abba (יחוח)Yahweh tsaug uas nws yuav tso kuv dim vim yog muaj (יהושע)Yahshua Messiah uas yog peb tus cawmseej. Yog li ntawd, kuv lub siab ua Abba (יחוח)Yahweh txoj kevcai qhev, tiamsis kuv lub cev ua txojkev txhaum qhev.

​