Lub Neej Uas Raws Li Tus Ntsuj Plig Dawbhuv Qhia

1 Vim li no, tsis muaj kev rau txim rau tus uas nyob hauv (יהושע)Yahshua Messiah, 2 vim tias Tus Ntsuj Plig Dawbhuv txoj kevcai uas pub txojsia hauv (יהושע)Yahshua Messiah, twb tso kuv dim ntawm txoj kevcai uas coj mus ua txhaum thiab coj mus txog kev tuag lawm. 3 Tej uas txoj kevcai ua tsis tau, vim lub cev nqaij tawv ua rau txoj kevcai tsis muaj zog, Abba (יחוח)Yahweh ua tau. Nws txib nws tus Tub los zoo li tibneeg uas lub cev nqaij txhaum thiaj daws tau tibneeg lub txim, thiab rau txim rau kev txhaum uas nyob hauv tibneeg lub cev nqaij, 4 kom tej uas hais txog kev ncaj ncees hauv txoj kevcai yuav tiav rau hauv peb cov uas tsis ua lub neej raws li lub cev nqaij tawv, tiamsis ua raws li Tus Ntsuj Plig Dawbhuv. 5 Cov uas ua lub neej raws li nqaij tawv, kuj kub siab rau tej uas yog nqaij tawv li xwb, tiamsis cov uas ua lub neej raws li Tus Ntsuj Plig Dawbhuv, kuj kub siab rau tej uas yog Tus Ntsuj Plig Dawbhuv li. 6 Qhov uas muab lub siab rau nqaij tawv, kuj yog kev tuag. Qhov uas muab lub siab rau rau Tus Ntsuj Plig Dawbhuv, kuj yog txojsia thiab nyob kaj siab lug.

7 Rau qhov lub siab uas muab rau nqaij tawv, kuj ua yeeb ncuab rau Abba (יחוח)Yahweh, tsis cia Abba (יחוח)Yahweh txoj kevcai kav nws, nws yeej ua tsis tau kiag li. 8 Thiab cov uas nyob hauv nqaij tawv, yuav ua tsis tau kom haum Abba (יחוח)Yahweh lub siab. 9 Tiamsis yog Abba (יחוח)Yahweh Tus Ntsuj Plig Dawbhuv nyob hauv nej lawm, nej kuj tsis nyob hauv nqaij tawv, nej yeej nyob hauv Tus Ntsuj Plig Dawbhuv. Leejtwg tsis muaj Messiah Tus Ntsuj Plig Dawbhuv, tus ntawd kuj tsis yog Messiah li.

10 Yog Messiah nyob hauv nej lawm, txawm yog nej lub cev tuag vim muaj txim, los nej Tus Ntsuj Plig Dawbhuv tseem ciaj sia nyob, vim muaj txojkev ncaj ncees.

11 Yog tus uas tsa (יהושע)Yahshua Messiah sawv hauv qhov tuag rov los Tus Ntsuj Plig Dawbhuv nyob hauv nej lawm, mas tus uas tsa (יהושע)Yahshua Messiah sawv hauv qhov tuag yuav siv nws Tus Ntsuj Plig Dawbhuv uas nyob hauv nej pub txojsia rau nej lub cev uas txawj tuag. 12 Vim li no cov kwvtij, peb tshuav nqe, tiamsis tsis yog tshuav nqe sab nqaij tawv uas yuav ua lub neej raws li nqaij tawv. 13 Yog nej ua lub neej raws li nqaij tawv, nej yuav tuag, tiamsis yog nej ua raws li Tus Ntsuj Plig Dawbhuv nej yuav tua tau tej haujlwm uas nej lub cev ua, nej thiaj ciaj sia nyob.

14 Vim tias Abba (יחוח)Yahweh Tus Ntsuj Plig Dawbhuv coj leejtwg, tus ntawd thiaj yog Abba (יחוח)Yahweh tus menyuam.

15 Rau qhov nej tsis tau txais Tus Ntsuj Plig Dawbhuv uas coj nej rov mus ua qhev poob rau txojkev ntshai dua, tiamsis nej tau txais Tus Ntsuj Plig Dawbhuv uas coj nej los ua Abba (יחוח)Yahweh cov menyuam, peb thiaj hu Abba (יחוח)Yahweh tias, Leej Txiv.

16 Tus Ntsuj Plig Dawbhuv nrog peb Tus Ntsuj Plig ua timkhawv tias peb yog Abba (יחוח)Yahweh cov menyuam. 17 Yog peb ua nws cov menyuam lawm, peb kuj yog cov uas saws qub txeeg qub teg, yog peb saws Abba (יחוח)Yahweh tej qub txeeg qub teg, thiab koom nrog Messiah saws. Yog peb nrog (יהושע)Yahshua Messiah raug kev tsim txom peb kuj yuav nrog (יהושע)Yahshua Messiah tau koob meej ib yam nkaus. 18 Kuv pom tias tej kev tsim txom uas raug nimno, tsis tsim nyog muab piv rau tej koob meej uas yuav tshwm los rau peb yav tom ntej.

19 Tej uas tsim los lawd, tos ntsoov Abba (יחוח)Yahweh cov menyuam tshwm los. 20 Txhua yam uas tsim ntawd, poob rau hauv lub hwjchim kev qhuav qhawv lawm, tsis yog raws li lub siab nyiam tiamsis raws li Abba (יחוח)Yahweh tu tseg kom nyob hauv lub qab hwjchim ntawd. Tiamsis tseem muaj chaw vam tias 

21 txhua yam uas tsim ntawd, yuav dim ntawm qhov uas ua txojkev puam tsuaj qhev es yuav los nyob ywj pheej thiab nrog Abba (יחוח)Yahweh cov menyuam tau koob meej. 22 Peb paub tias txhua yam uas tsim los, tabtom ntsaj laws mob plab yam li tus pojniam yuav yug menyuam los txog niaj hnub nimno.

23 Tsis yog tej uas tsim xwb tiamsis, peb cov ntag, uas muaj Tus Ntsuj Plig Dawbhuv uas yog thawj yam uas Abba (יחוח)Yahweh pub lawm, peb kuj ntsaj laws hauv lub siab tos qhov uas Abba (יחוח)Yahweh yuav saws peb ua nws cov menyuam, yog qhov uas txhiv kiag peb lub cev. 24 Peb muaj chaw vam li no peb thiaj li dim. Qhov chaw vam uas peb twb ntsib lawm, mas tsis yog chaw vam ntxiv lawm. Leejtwg tseem yuav vam yam uas nws twb ntsib lawm? 25 Tiamsis yog peb vam yam uas tseem tsis tau ntsib, peb ua siab ntev tos yam ntawd. 26 Ib yam li ntawd, Tus Ntsuj Plig Dawbhuv pab peb rau thaum peb tsis muaj zog. Rau qhov peb tsis paub tias tsim nyog peb thov abtsi ntawm Abba (יחוח)Yahweh, tiamsis Tus Ntsuj Plig Dawbhuv sawv peb chaw thov nroo luj laws tsis paub hais ua lus li. 27 Thiab Abba (יחוח)Yahweh uas tshuaj saib tibneeg lub siab, kuj paub Tus Ntsuj Plig Dawbhuv lub siab, rau qhov Tus Ntsuj Plig Dawbhuv yeej thov Abba (יחוח)Yahweh pab cov tibneeg dawb huv raws li Abba (יחוח)Yahweh lub siab nyiam. 28 Peb paub tias txhua yam xwm txheej puavleej ua qhov zoo rau cov uas hlub Abba (יחוח)Yahweh, yog cov uas Abba (יחוח)Yahweh hu raws li nws xav tseg lawd. 29 Rau qhov txhua tus uas Abba (יחוח)Yahweh xaiv cia lawd, nws kuj muab tu cia ua ntej kom zoo thooj li nws leej Tub tus yam ntxwv, xwv nws leej Tub thiaj tau ua tijlaug hauv ib tsoom kwvtij coob coob. 30 Thiab cov uas Abba (יחוח)Yahweh tu cia lawd, nws kuj hu los, thiab cov uas nws twb hu lawd, nws suav tias yog cov ncaj ncees, thiab cov uas nws suav tias ncaj ncees, nws kuj pub kom muaj koob meej ci ntsa iab.

​

Tus Messiah Txojkev Hlub

31 Yog li ntawd, peb yuav hais li cas txog tej no? Yog Abba (יחוח)Yahweh tuaj peb tog lawm, leejtwg yuav tawm tsam tau peb? 

32 Tus uas tsis khuvxim nws tus Tub, tiamsis muab nws tus Tub theej peb txhua tus, nws yuav tsis muab txhua yam nrog tus Tub ntawd, pub dawb rau peb thiab lov? 33 Leejtwg yuav kom tau cov uas Abba (יחוח)Yahweh twb xaiv cia lawd? Abba (יחוח)Yahweh twb suav tias lawv ncaj ncees lawm. 34 Leejtwg yuav rau txim tau rau lawv? (יהושע)Yahshua Messiah uas tuag lawm, thiab heev dua li ntawd, twb raug muab tsa sawv hauv qhov tuag rov los, nws zaum ntawm Abba (יחוח)Yahweh sab tes xis, thiab thov Abba (יחוח)Yahweh pab peb.

35 Leejtwg yuav muab peb cais tau ntawm tus Messiah txojkev hlub? Txawm yog kev ceeblaj, kev txom nyem, kev tsim txom, kev tshaib nqhis, kev khaub hlab, tej xwm txheej phem lossis hniav ntaj hniav riam, yuav cais tau lov? 

36 Raws li uas muaj lus sau cia tias, vim tim koj, peb thiaj raug muab tua tas hnub tas hmo, thiab raug muab suav yam li cov yaj uas coj mus tua. (Ntawv Nkauj 44:23)

37 Tiamsis hauv txhua yam xwm txheej no, peb kov yeej kiag vim yog muaj tus uas hlub peb kawg. 38 Rau qhov kuv tso siab tias, txawm yog kev tuag, lossis txojsia, lossis cov tubtxib saum ntuj, lossis tej timtswv, lossis tej xwm txheej tiam no, lossis tiam tom ntej, lossis tej hwjchim, 39 lossis qhov uas siab kawg, lossis qhov uas tob kawg, lossis ib yam abtsi uas tau tsim los no, yuav cais tsis tau peb ntawm Abba (יחוח)Yahweh txojkev hlub uas muaj hauv peb tus Cawmseej (יהושע)Yahshua Messiah kiag li.