Denpaulas Thiab Npalas

1 Thaum Ehuj tuag lawd, cov Ixayees rov ua tej uas (יחוח)Yahweh pom tias phem.

2 (יחוח)Yahweh thiaj muab lawv cob rau hauv cov Khana‑as tus vajntxwv Yanpis uas nyob lub moos Haxaus txhais tes. Nws tus thawj rog hu ua Xixelas uas nyob hauv lub moos Halauses Hakau‑is.

3 Cov Ixayees txawm quaj thov (יחוח)Yahweh pab, rau qhov vajntxwv Yanpis muaj cuaj pua lub tsheb hlau ua rog thiab ua nruj ua tsiv quab yuam cov Ixayees tau nees nkaum xyoo.

4 Mas ib tug pojniam cev (יחוח)Yahweh lus hu ua Denpaulas, yog Lapidaus tus poj niam, nws ua thawj coj cov Ixayees lub sij hawm ntawd.

5 Nws pheej nyob hauv tsob qab toov laj Denpaulas uas nyob ntawm Lamas thiab Npe‑ees ntu nruab nrab pem toj siab Efa‑is tebchaws, mas cov tibneeg Ixayees pheej tuaj cuag nws qhov ntawd kom nws tu lawv tej plaub.

6 Denpaulas txib tibneeg mus hu Npalas uas yog Anpinau‑as tus tub tuaj ntawm Khedes hauv Nathalis tebchaws tuaj mas hais rau nws tias, (יחוח)Yahweh uas yog cov Ixayees Tus Tswv hais rau koj tias, cia li mus sau zog koj cov tub rog tuaj rau ntawm lub roob Thanpaus. Cia li mus sau xeem Nathalis thiab xeem Xenpuloos kaum txhiab leej.

7 Mas kuv yuav ntxias Xixelas uas yog vajntxwv Yanpis tus thawj rog kom coj nws cov tub rog thiab nws cov tsheb ua rog tuaj ntsib koj ntawm tus dej Khisoos, thiab kuv yuav muab nws cob rau hauv koj txhais tes.

8 Npalas thiaj teb Denpaulas tias, yog koj nrog kuv mus kuv thiaj li mus. Yog koj tsis nrog kuv mus, kuv kuj tsis mus.  

9 Denpaulas teb tias, kuv yeej yuav nrog koj mus tiag, tiamsis txojkev uas koj taug ntawd, yuav tsis coj koj tau koob meej, rau qhov (יחוח)Yahweh yuav muab Xixelas cob rau ib tug pojniam txhais tes. Ces Denpaulas txawm sawv tsees nrog Npalas mus txog lub moos Khedes.

10 Npalas thiaj hu xeem Xenpuloos thiab xeem Nathalis tuaj rau ntawm Khedes, mas muaj kaum txhiab leej nrog Npalas mus thiab Denpaulas kuj nrog nws mus thiab.

11 Henpaws uas yog tibneeg Khenais tau ncaim ntawm cov Khenais sawvdaws uas yog Mauxes yawm txiv Haunpas caj ces los tsa tsev ntaub nyob rau ntawm tus ntoo qheb hauv Xananis uas nyob ze lub moos Khedes.  

12 Thaum muaj tibneeg mus hais rau Xixelas tias Anpinau‑as tus tub Npalas nce mus rau saum lub roob Thanpaus lawm,

13 Xixelas txawm txhij nws cuaj pua lub tsheb hlau ua rog huvsi thiab tag nrho nws cov tub rog tuaj rau ntawm lub moos Halauses Hakau‑is mus txog tus dej Khisoos.

14 Denpaulas hais rau Npalas tias, cia li mus los maj, rau qhov hnub no yog hnub uas (יחוח)Yahweh muab Xixelas rau hauv koj txhais tes. (יחוח)Yahweh twb ua koj ntej mus lawm nev.  Npalas thiab nws cov tub rog kaum txhiab leej thiaj nqis ntawm lub roob Thanpaus mus.

15 (יחוח)Yahweh ua rau Xixelas thiab nws tej tsheb ua rog huvsi thiab nws pab tub rog huvsi tawg khiav swb kiag Npalas tej hniav ntaj, ces Xixelas txawm nqis saum nws lub tsheb ua rog xuas kotaw khiav lawm.

16 Ces Npalas txawm caum tej tsheb ua rog thiab cov tub rog mus txog Halauses Hakau‑is. Mas Xixelas pab tub rog raug hniav ntaj tuag tag tsis tshuav ib tug li.  

17 Tiamsis Xixelas dhia khiav mus txog Ya‑ees uas yog Henpaws tus pojniam uas yog tibneeg Khenais lub tsev ntaub, rau qhov vajntxwv Yanpis hauv lub moos Haxaus nrog Henpaws uas yog tibneeg Khenais tsev neeg sib raug zoo.

18 Ya‑ees txawm tawm tuaj tos Xixelas thiab hais tias, yawg hlob, cia li los tsev, cia li los so hauv kuv lub tsev, tsis txhob ntshai li.  Xixelas thiaj nkag mus rau hauv nws lub tsev ntaub, thiab nws muab ib daim pam los vov Xixelas.

19 Xixelas hais rau nws tias, thov mentsis dej rau kuv haus, rau qhov kuv nqhis dej heev. Ya‑ees txawm qhib kiag ib lub hnab tawv kua mis hliv rau nws haus thiab muab daim pam vov nws.

20 Xixelas hais rau nws tias, thov koj mus sawv ntawm qhov rooj zov.  Yog leejtwg tuaj nug tias, muaj leejtwg tuaj no los tsis muaj? Cia li teb tias, tsis muaj.

21 Tiamsis Ya‑ees uas yog Henpaws tus poj niam muab ib tug tswg hlau uas rub tsev ntaub thiab tuav ib rab rauj nyas los muab tus tswg hlau twb nkaus Xixelas xub ntsos npuj tshab plaws rau hauv av rau thaum nws tab tom tsaug zog heev rau qhov yog txog siav. Ces Xixelas txawm tuag lawm.

22 Thaum Npalas caum Xixelas tuaj txog, Ya‑ees tawm mus tos nws thiab hais rau nws tias, cia li los tsev, kuv yuav qhia koj pom tus uas koj tab tom nrhiav ntawd. Npalas kuj nkag los rau hauv nws lub tsev ntaub pom Xixelas tuag xyab luas lawm, tus tswg tsev ntaub tseem ntsia ntsees xub ntsos.

23 Hnub ntawd (יחוח)Yahweh thiaj ua rau cov Ixayees kov yeej Khana‑as tus vajntxwv Yanpis.

24 Cov Ixayees txhais tes ua nyhav zuj zus rau Khana‑as tus vajntxwv Yanpis mus txog thaum lawv ua kom vajntxwv Yanpis puam tsuaj tag.