Denpaulas Thiab Npalas Txoj Nkauj

1 Denpaulas thiab Anpinau‑as tus tub Npalas hu txoj nkauj rau hnub ntawd tias, 2 cia li qhuas (יחוח)Yahweh, cov thawj xub nqis tes thiab cov pejxeem tau zoo siab hlo nqis tes pab.

3 Au tej vajntxwv, cia li mloog.  Tej thawj, cia li tig ntsej mloog. Kuv yuav hu nkauj rau (יחוח)Yahweh, kuv seev suab hu nkauj rau (יחוח)Yahweh uas yog Ixayees Tus Tswv.

4 Au (יחוח)Yahweh, thaum koj tawm ntawm Xe‑is mus ua rog, thaum koj taug kev tawm Edoos tebchaws mus, lub ntiajteb kuj ua zog koog, lub ntuj tso nag los, tej huab tso tuam tsam nag los.

5 Tej roob kuj ua zog koog rau ntawm (יחוח)Yahweh xub ntiag, yog Xinais Tus Tswv, yog (יחוח)Yahweh uas yog Ixayees Tus Tswv.   

6 Ntu uas Anav tus tub Sakas nyob thiab ntu uas Ya‑ees nyob, tej kev loj tsis muaj tibneeg taug, cov uas mus mus los los tsuas taug kev me xwb.

7 Tej tub qoob tub loos hauv Ixayees tebchaws kuj tseg tsis ua teb lawm, tsis ua mus txog thaum kuv, Denpaulas sawv los kav, txog thaum kuv sawv los ua niam hauv Ixa-yees tebchaws.

8 Thaum xaiv tej dab tshiab los teev kev ua rog kuj tuaj txog ntawm rooj loog. Yeej tsis pom ib daim hlau thaiv ua rog thiab ib rab hmuv rau hauv plaub caug txhiab tus tub rog hauv Ixayees li.  

9 Kuv lub siab dai dhuam rau Ixayees cov thawj, thiab cov pej xeem uas zoo siab hlo mus pab. Cia li qhuas (יחוח)Yahweh.  

10 Nej cov uas caij tej nees luav dawb, cov uas nyob saum ntaub pua eeb nees thiab cov uas xuas kotaw taug kev cia li hais tej no.  

11 Cia li mloog txoj kwv txhiaj uas hais ntawm qhov dej.  Lawv hais txog qhov uas (יחוח)Yahweh kov yeej, hais txog nws cov tub qoob tub loos Ixayees kov yeej. Thaum ntawd (יחוח)Yahweh cov tibneeg kuj mus ua ib khub ib khub rau ntawm rooj loog.

12 Denpaulas, cia li tsim los, tsim los.  Cia li tsim los, tsim los hu nkauj. Npalas cia li sawv tsees, Anpinau‑as tus tub, cia li coj cov uas koj ntes tau mus.

13 Thaum ntawd cov uas muaj meej uas tseem tshuav nyob nqis los,

(יחוח)Yahweh cov pejxeem nqis los nrog kuv ua rog rau cov uas muaj zog heev.

14 Cov uas cog cag rau hauv Amalej tau nqis pem Efa‑is los. Npeeyamees, lawv raws koj thiab koj cov kwvtij qab. Cov thawj nqis ntawm Makhis los thiab cov uas coj tus cwj thawj rog tawm hauv Xenpuloos los.

15 Ixakhas cov uas ua thawj kuj nrog Denpaulas los, Ixakhas kuj nrog Npalas los.  Lawv raws nws qab khiav mus rau hauv lub hav. Xeem Lunpees tej cum siab fab tsis txawj ua txoj twg.

16 Ua li cas nej nyob ntawm nkuaj yaj tos, mloog lub suab raj uas tshuab rau yaj xwb? Xeem Lunpees tej cum siab fab tsis txawj ua txoj twg.

17 Kile‑as kuj nyob sab dej Yaladees hnub tuaj. Daj nyob abtsi ntawm lub nkoj txwg?  Asaws nyob twjywm ntawm ntug hiavtxwv, nyob twjywm hauv tej tsev ntawm tshav nkoj.   

18 Xenpuloos yog cov uas zoo siab tso nyog txojsia mus pab.  Nathalis kuj ib yam nkaus rau hauv tej tshav rog pem toj siab.

19 Cov vajntxwv tuaj, lawv tuaj ua rog, cov Khana‑as tej vajntxwv ua rog ntawm Tha‑anas ntawm ntug dej Mekidaus. Lawv tsis txeeb tej nyiaj li.

20 Tej hnub qub saum ntuj kuj ua rog, tej hnub qub kuj tuaj saum ntuj ua rog rau Xixelas.

21 Tus dej Khisoos ntws npau nphwv kuav lawv mus, yog tus dej Khisoos uas hlob thiab muaj zog kawg li.  Kuv lub siab, cia li muaj zog taug kev mus.

22 Lub suab nees khiav rau nrov ntsoog qees, yog cov nees khiav nrawm heev. 

23 (יחוח)Yahweh tus tubtxib saum ntuj hais tias, cia li tsawm foom Melaus, cia li foom nyhav kawg rau cov tibneeg hauv lub moos ntawd, vim yog lawv tsis tuaj pab (יחוח)Yahweh, tsis pab (יחוח)Yahweh ua rog rau cov uas muaj zog.  

24 Cia Ya‑ees tau hmoov zoo tshaj plaws tej pojniam huvsi, nws yog Henpaws uas yog tibneeg Khenais tus poj niam. Cia nws tau hmoov zoo tshaj plaws tej pojniam uas nyob hauv tsev ntaub huvsi.

25 Xixelas thov dej haus, mas nws pub nyuj mis, nws muab kua mis nyeem rau hauv lub phaj uas yog cov thawj siv cev rau Xixelas.

26 Nws txawm cev tes muab tus tswg tsev ntaub thiab nws txhais tes xis tuav rab taus uas cov ua haujlwm siv. Nws ntaus Xixelas ib teg, nws tsoo Xixelas taubhau, nws tsoo taubhau tawg tag, nws nkaug xub ntsos tshab plaws.  

27 Xixelas ntog, nws vau hlo, nws xyab luas ntawm tus pojniam txhais kotaw, nws ntog qaug lias rau ntawm tus pojniam ntawd kotaw, nws vau hlo, nws ntog rau qhovtwg nws tuag qhov ntawd.

28 Leej niam saib qhov rais ntsoov, Xixelas niam saib qhov rais ntsoov hais tias, ua cas nws tsheb ua rog yuav los qeeb ua luaj? Ua cas tej nees hai tsheb yuav los qeeb kawg?  

29 Tej pojniam uas ntse teb nws, lossis nws teb nws hais tias,

30 yog lawv tseem tshawb nrhiav thiab faib tej qhov txhia chaw uas txeeb tau los kab, yog faib ib tug lossis ob tug hluas nkauj rau ib tug txivneej, thiab faib tej ntaub uas raus zoo zoo rau Xixelas, thiab faib tej daim paj ntaub uas raus zoo zoo thiab tej daim paj ntaub zoo nkauj rau kuv qhwv ntawm caj pas, coj los ua lawv tug.  

31 Au (יחוח)Yahweh, cia kom koj cov yeeb ncuab huvsi puam tsuaj ib yam nkaus li no. Cia tus uas nyiam koj zoo yam nkaus li lub hnub thaum uas tawm tuaj muaj hwjchim ci nplas. Mas lub tebchaws thiaj tau so tsis ua rog plaub caug xyoo.