1 Kuv yog Sha-ul uas raug kaw vim ua (יהושע)Yahshua Messiah tes haujlwm thiab peb tus kwv Timothy, wb sau tsab ntawv no tuaj rau Philemon, tus uas peb hlub thiab nrog peb koom ua ib txog haujlwm, 2 thiab hais rau peb tus muam Afias thiab Akhipas uas nrog peb koom ua tub rog, thiab hais rau pawg ntseeg txhua tus uas tuaj koom nej hauv koj tsev. 3 Thov txojkev hlub thiab txojkev ywjpheej ntawm Abba (יחוח)Yahweh , uas yog peb Leej Txiv thiab ntawm Cawmseej (יהושע)Yahshua Messiah nrog nraim nej.

​

Philemon Txojkev Hlub Thiab Txojkev Ntseeg

4 Txhua zaus uas kuv ua Abba (יחוח)Yahweh  tsaug, kuv yeej nco ntsoov thov pab rau koj tsis tu ncua li. 5 Vim kuv twb hnov txog koj txojkev hlub thiab koj txojkev ntseeg uas muaj rau Cawmseej (יהושע)Yahshua thiab cov neeg dawb huv txhua tus. 6 Kuv thov Abba (יחוח)Yahweh  pab kom qhov uas koj nrog kuv koom txojkev ntseeg, yuav ua rau koj paub tag nrho txhua yam zoo uas peb muaj hauv (יהושע)Yahshua Messiah. 7 Kuv tus kwv, koj txojkev hlub ua rau kuv muaj siab xyiv fab thiab tau txais kev txhawb siab ntau heev, vim yog koj ua rau cov neeg dawb huv sov siab tuaj.

​

Sha-ul Hais Txog Auneximas

8 Yog li ntawd, txawm tias kuv muaj cai hauv (יהושע)Yahshua Messiah, txib kom koj ua tej uas tsim nyog ua los. 9 Vim txojkev hlub, kuv yuav ua tib zoo thov koj thiaj li zoo dua. Kuv yog Sha-ul uas ua tubtxib thiab nimno raug kaw, vim ua (יהושע)Yahshua Messiah tes haujlwm. 10 Kuv thov koj txog kuv tus tub Auneximas uas los ua kuv tus tub rau thaum kuv raug kaw.

11 Yav tag los, nws tsis muaj nuj nqis rau koj, tiamsis nimno nws yeej muaj nuj nqis rau koj thiab rau kuv. 12 Kuv yuav xa nws rov tuaj rau koj, yog li ntawd, yog koj tos txais nws ces zoo ib yam nkaus li uas tos txais kuv lub siab ntag.

13 Kuv xav cia nws nrog kuv nyob tu kuv, hloov koj chaw rau lub sijhawm uas kuv raug kaw vim yog tim txoj hmoo zoo. 14 Tiamsis kuv tsis xav ua ib yam abtsi ua ntej uas tsis tau kev tso cai los ntawm koj, xwv qhov uas koj ua zoo, thiaj tsis yog raug quab yuam ua, tiamsis yog koj txaus siab ua xwb. 15 Tej zaum yog tim li no, nws thiaj ncaim koj mus ib nyuag ntu, xwv koj thiaj rov tau nws mus ib txhis li.

16 Nws yuav tsis ua qhev ntxiv lawm, tiamsis zoo yuav tshaj ib tug qhev lawm, yog ib tug kwvtij uas ntxim hlub. Kuv yeej hlub nws heev, mas koj yimhuab yuav tsum hlub nws ntawm lub cev nqaij tawv thiab ntawm Abba (יחוח)Yahweh .

17 Vim li no, yog koj pom tias, kuv nrog koj koom ua tib txoj haujlwm thiab, koj cia li txais yuav nws ib yam li txais yuav kuv. 18 Yog nws ua txhaum rau koj lossis tshuav koj nqe abtsi, cia li xam rau ntawm kuv. 19 Kuv Sha-ul, siv kuv txhais tes sau li no tias, kuv yuav them. Kuv yuav tsis hais txog qhov uas koj tus kheej tseem tiv kuv. 20 Yog li no, tus kwv, thov ua kom kuv muaj kev zoo siab los ntawm koj hauv Abba (יחוח)Yahweh . Thov ua kom kuv rov muaj kev sov siab hauv (יהושע)Yahshua Messiah.

21 Kuv tso siab tias koj yuav mloog kuv lus thiab, kuv thiaj sau ntawv tuaj rau koj, thiab paub tias koj tseem yuav ua ntau tshaj tej uas kuv thov. 22 Dua li ntawd, thov koj npaj chaw rau kuv so thiab, vim kuv vam tias yuav rov tuaj cuag nej dua, vim nej tej lus thov.

​

Tej Lus Sib Fim Thaum Kawg

23 Epafas uas nrog raug kaw vim ua (יהושע)Yahshua Messiah tes haujlwm, hais lus nco txog tuaj rau koj. 24 Yahchanan Mark, Alithakhas, Demas, thiab Luke, uas nrog kuv koom ua haujlwm hais lus nco txog ib yam nkaus. 25 Thov Cawmseej (יהושע)Yahshua Messiah txojkev hlub nrog nraim koj tus ntsuj plig.