Timautes Nrog Sha-ul Thiab Xilas Mus

1 Sha-ul txawm mus rau lub moos  Dawnpis thiab lub moos Lixathas. Qhov ntawd muaj ib tug thwjtim npe hu ua Timautes, nws niam yog tibneeg Yahdaim uas ntseeg, nws txiv yog tibneeg Greek. 2 Cov kwvtij hauv lub moos Lixathas thiab lub moos Ikhanias puavleej pom tias Timautes yog ib tug zoo. 3 Sha-ul xav coj Timautes nrog nws mus thiaj muab nws ua kevcai txiav, vim yog saib rau cov Yahdaim uas nyob hauv tej moos ntawd, rau qhov lawv sawvdaws paub tias nws txiv yog tibneeg Greek. 4 Thaum lawv taug kev mus rau hauv txhua lub moos, lawv kuj muab Abba (יחוח)Yahweh tej kevcai uas cov tubtxib thiab cov kev txwj laug uas saib xyuas pawg ntseeg hauv lub nroog Yeluxalees coj los hais qhia rau sawv-daws thiab kom lawv xyaum coj raws li ntawd. 5 Yog li no, cov pawg ntseeg thiaj muaj zog thiab cov tibneeg uas dawb huv thiab ncaj ncees thiaj li niaj hnub tsav ntxiv coob zuj zus tuaj.

​

Sha-ul Ua Yog Toog Pom Tus  Yawg Makhedaunias

6 Lawv mus thoob plaws lub xeev Fikias thiab lub xeev Kalatias rau qhov Tus Ntsuj Plig Dawbhuv txwv tsis kheev lawv qhia txoj hmoo zoo rau hauv lub xeev Asia. 7 Thaum lawv tuaj txog ntawm lub xeev Mixias ciam teb, lawv yooj xeeb yuav mus rau hauv lub xeev Npithinias tiamsis (יהושע)Yahshua tus Ntsuj Plig tsis kheev lawv mus. 8 Yog li ntawd lawv txawm taug kev hla lub xeev Mixias los txog lub moos Rhau‑as. 9 Thaum tsaus ntuj Sha-ul ua npau suav pom ib tug yawg, nws yog tibneeg Makhedaunias, los sawv ntsug ntawd thiab thov nws hais tias, cia li tuaj pab peb hauv lub xeev Makhedaunias thiab.

10 Thaum nws tsim dheev los, nws piav qhia rau peb, ces peb txawm npaj mus rau hauv lub xeev Makhedaunias tamsid, rau qhov peb ntseeg tau hais tias Abba (יחוח)Yahweh hu peb mus qhia txoj hmoo zoo rau cov tibneeg hauv lub xeev ntawd.

Lidias Los Ntseeg

11 Peb nce nkoj ntawm Rhau‑as mus ncaj nraim rau lub koog povtxwv Xamorhes, mas hnub tom qab kuj mus txog lub moos Ne‑apolis. 12 Peb tawm qhov ntawd mus rau lub moos Filipis uas yog lub moos loj hauv xeev Makhedaunias thiab yog ib lub moos uas cov tibneeg Romans kav. Peb txawm so hauv lub moos ntawd ntau hnub.

13 Txog hnub Sabbath peb tawm mus rau nraum rooj loog mus rau ntawm ntug dej, rau qhov peb xav tias muaj chaw rau tibneeg thov Abba (יחוח)Yahweh qhov ntawd. Peb thiaj zaum nrog cov pojniam uas tuaj ua ke ntawd sib tham. 14 Cov uas mloog peb qhia ntawd muaj ib tug pojniam npe hu ua Lidias uas tuaj lub moos Thiathilas tuaj. Nws yog ib tug pojniam ua luam muag ntaub tsamxem thiab yog ib tug uas hwm Abba (יחוח)Yahweh. Abba (יחוח)Yahweh qheb nws lub siab kom nws ua tib zoo mloog tej lus uas Sha-ul qhia.

15 Thaum tus pojniam ntawd thiab nws tsev neeg ua kevcai raus dej tag, nws txawm thov peb hais tias, yog nej pom tau tias kuv yog ib tug ntseeg Abba (יחוח)Yahweh tiag no, thov nej los nyob thiab so hauv kuv tsev. Ces peb thiaj li yig tsis dhau nws.

Sha-ul Thiab Xilas Raug Kaw

16 Muaj ib zaug thaum peb tabtom tawm mus rau lub chaw uas thov Abba (יחוח)Yahweh, muaj ib tug nkauj qhe uas raug dab leej nkaub txawm tuaj ntsib peb. Qhov uas nws hais paub tom hauv ntej ua rau nws cov lospav tau nyiaj ntau heev. 17 Nws pheej raws Sha-ul peb qab mus qw hais tias, cov tibneeg no yog Abba (יחוח)Yahweh tus Loj Dua Ntais cov tub qhe uas qhia txog txojkev cawm dim rau nej. 18 Nws pheej ua li no tau ntau hnub. Ces Sha-ul txawm uv tsis taus lawm, nws thiaj tig los hais rau tus dab ntawd tias, kuv tuav (יהושע)Yahshua Messiah lub npe ntiab koj tawm hauv tus pojniam no mus. Ces tus dab txawm tawm plaws tamsid lawm. 19 Thaum tus pojniam ntawd cov lospav pom tias tsis muaj kev khwv nyiaj lawm, lawv txawm ntes Sha-ul thiab Xilas cab mus rau hauv lub tshav puam loj ntawm cov uas kav lub moos ntawd xubntiag.

20 Thaum coj nkawv los rau ntawm cov thawj uas kav lub moos, lawv txawm hais tias, ob tug no yog tibneeg Yahdaim thiab tsim kev kub ntxhov rau hauv peb lub moos. 21 Nkawv qhia tej kevcai uas tsis tsim nyog peb cov Romans yuav ntseeg thiab coj. 22 Cov pejxeem kuj sawv tawm tsam nkawv, thiab cov thawj txawm muab nkawv lub tsho hle thiab hais kom xuas pas muab nkawv nplawm. 23 Thaum lawv nplawm nkawv ntau teg lawm, lawv txawm muab nkawv kaw hauv tsev lojfaj thiab hais kom tus uas zov tsev lojfaj zov nkawv zoo zoo txhob pub dim. 24 Thaum tus uas zov tsev lojfaj tau kev tso cai los ntawm lawv lawm, nws txawm muab nkawv coj mus kaw rau hauv kis uas nyob hauv plawv thiab muab rab cuab xauv nkawv kotaw. 25 Thaum kwvlam ib tag hmo Sha-ul thiab Xilas tabtom thov Abba  (יחוח)Yahweh thiab hu nkauj qhuas Abba (יחוח)Yahweh, thiab cov uas raug txim tabtom mloog, 26 ua cas av txawm qeeg heev ua rau tej taw tsev lojfaj ua zog kais. Tamsim ntawd txhua lub qhov rooj qheb tag huvsi thiab tej saw hlau khi lawv txhua tus kuj hle tag huvsi. 27 Thaum tus uas zov tsev lojfaj tsim dheev los nws pom tias tej qhov rooj qheb tag lawm. Nws xav tias cov uas raug kaw khiav tag lawm, nws txawm rho kiag ntaj yuav tua nws tus kheej.

28 Tiamsis Sha-ul qw nrov nrov hais tias, tsis txhob ua phem rau koj tus kheej, rau qhov peb txhua tus tseem nyob ntawm no. 29 Tus uas zov tsev lojfaj txawm hais kom taws teeb los thiab khiav mus khwb nkaus pe tshee hnyo rau ntawm Sha-ul thiab Xilas xubntiag. 30 Nws coj nkawv tawm los thiab hais tias, yawg hlob, kuv yuav tsum ua li cas thiaj tau txojkev cawm dim? 31 Nkawv hais tias, cia li ntseeg (יהושע)Yahshua Messiah, koj thiaj yuav cawm tau koj thiab koj tsev neeg dim. 32 Thiab nkawv qhia Abba (יחוח)Yahweh txojlus rau nws thiab txhua tus uas nyob hauv nws tsev mloog. 33 Hmo ntawd thiab lub sij hawm ntawd, nws txawm coj nkawv mus ntxuav tej qhov txhab mas nws thiab nws tsev neeg sawvdaws ua kevcai raus dej tamsid. 34 Nws coj nkawv mus rau hauv nws tsev thiab npaj zaub mov rau nkawv noj. Nws thiab tag nrho tsev neeg zoo siab xyiv fab vim lawv tau ntseeg Abba (יחוח)Yahweh lawm. 35 Thaum kaj ntug cov thawj uas kav lub moos tso cov tub ceev xwm mus hais tias, cia li muab ob tug ntawd tso mus. 36 Tus uas zov tsev lojfaj thiaj los hais qhia rau Sha-ul hais tias, cov thawj tso tibneeg tuaj tso neb dim lawm. Yog li ntawd neb cia li tawm los thiab mus zoo. 37 Tiamsis Sha-ul hais rau lawv tias, lawv muab wb, uas yog tibneeg Romans, nplawm tab meeg rau cov pejxeem sawvdaws ntsia ntsoo, ua ntej uas twb tsis tau hais rooj plaub thiab txiav txim, thiab tseem muab wb kaw rau hauv tsev lojfaj. Nimno lawv yuav cia li tso wb tawm mus twjywm ntsiag to no lov? Tsis tau li. Cia lawv tuaj coj wb tawm mus. 38 Ces cov tub ceev xwm thiaj mus hais rau cov thawj kav lub moos li ntawd. Thaum cov thawj paub tias nkawv yog tibneeg Romans, lawv yimhuab ntshai heev. 39 Lawv thiaj tuaj sam hwm nkawv. Lawv coj nkawv tawm mus thiab thov kom nkawv tawm hauv lawv lub moos mus. 40 Nkawv thiaj tawm hauv tsev lojfaj mus thiab mus xyuas Lidias. Thaum nkawv ntsib cov kwvtij lawm, nkawv txawm hais lus txhawb lawv siab thiab ncaim lawv mus lawm.

​