Kev Ntxhov Hauv Thessalonians

1 Thaum Sha-ul thiab Xilas taug kev hla lub moos Afipolias thiab lub moos Apaulaunias mus, nkawv los txog lub moos Thessalonians uas muaj cov Yahdaim lub tsev sablaj. 2 Sha-ul thiaj nkag mus rau hauv lub tsev sablaj ib yam li uas nws ib txwm mus. Nws siv Abba (יחוח)Yahweh tej lus nrog lawv sib cav rau peb hnub Sabbath, 3 thiab piav thiab qhia kom lawv paub tseeb tias tus Messiah yuav tsum raug kev tsim txom thiab ciaj sawv hauv qhov tuag rov los, thiab hais tias, (יהושע)Yahshua uas kuv qhia rau nej yog tus Messiah. 4 Lawv cov ntawd muaj qee leej lees ntseeg Sha-ul tej lus thiab los koom nrog Sha-ul thiab Xilas. Muaj cov Greek uas hwm Abba (יחוח)Yahweh ntau leej thiab cov pojniam uas tseem ceeb ntau leej los koom thiab. 5 Tiamsis cov Yahdaim khib siab, lawv txawm mus nrhiav cov tibneeg phem tom tej tshav puam sau mus ua ib pab tsim kev kub ntxhov rau hauv lub moos. Lawv mus rau ntawm Yaxoos lub tsev es yuav coj nkawv los rau cov pejxeem. 6 Thaum nrhiav tsis pom nkawv, lawv txawm cab Yaxoos thiab cov kwvtij qee leej mus cuag cov thawj uas kav lub moos thiab lawv qw hais tias, cov tibneeg uas tsim kev kub ntxhov thoob ntiajteb kuj tuaj txog ntawm no lawm, 7 thiab Yaxoos tseem txais lawv cia. Cov tibneeg no puavleej tsis mloog Xixas tej lus, lawv tseem hais tias muaj dua ib tug vajntxwv, yog (יהושע)Yahshua. 8 Thaum cov pejxeem thiab cov thawj kav lub moos hnov li ntawd mas lawv ntxhov siab heev. 9 Lawv thiaj kom Yaxoos thiab lwm tus tibneeg, them nyiaj rau cov pov thawj tag ces thiaj li so lawv mus lawm.

 

Sha-ul Thiab Xilas Hauv Lub Moos Npele‑as

10 Thaum tsaus ntuj cov kwvtij txawm xa Sha-ul  thiab Xilas mus rau lub moos Npele‑as. Thaum mus txog lawd, nkawv nkag mus rau hauv cov Yahdaim lub tsev sablaj.

11 Cov Yahdaim hauv lub moos ntawd siab zoo dua cov Yahdaim uas nyob hauv lub moos Thessalonians, vim lawv qhib siab txais txoj hmoo zoo thiab niaj hnub tshawb nrhiav Abba (יחוח)Yahweh txojlus saib tej no muaj tseeb li uas hais los tsis muaj. 12 Vim li no lawv cov ntau leej ntseeg thiab cov pojniam Greek uas tseem ceeb thiab cov txivneej Greek ntau leej kuj ntseeg. 13 Tiamsis thaum cov Yahdaim uas nyob hauv lub moos Thessalonians paub tias Sha-ul qhia Abba (יחוח)Yahweh txojlus rau hauv lub moos Npele‑as ib yam li nws qhia rau lawv thiab. Lawv txawm tuaj tshum cov pejxeem kom kub ntxhov thiab.

14 Tamsim ntawd cov kwvtij txawm xa Sha-ul tawm taug txojkev uas yuav mus rau nram hiavtxwv, tiamsis Xilas thiab Timautes tseem nyob qhov ntawd. 15 Cov tibneeg uas xa Sha-ul ntawd, xa nws mus rau lub nroog Athees. Thaum Xilas thiab Timautes txais tau cov lus uas Sha-ul hais kom nkawv maj nroos mus cuag nws, ces nkawv txawm tawm mus lawm.

​

Sha-ul Nyob Hauv Lub Nroog Athees

 16 Thaum Sha-ul tseem tos nkawv hauv lub nroog Athees, nws ntxhov siab vim pom dab mlom puv nkaus hauv lub nroog. 17 Vim li ntawd, nws thiaj nrog cov Yahdaim thiab cov uas hwm Abba (יחוח)Yahweh sib cav hauv lub tsev sablaj thiab nrog cov tibneeg uas nws niaj hnub ntsib tom tshav puam sib cav. 18 Cov Epiculis thiab cov Xatas su‑is cov xibhwb qee leej kuj tuaj nrog Sha-ul tham thiab. Ib txhia hais tias, tus nyuag tibneeg ncauj ntau no tabtom hais abtsi? Muaj qee leej hais tias, zoo li nws coj lwm tebchaws tej dab los qhia, rau qhov Sha-ul qhia txog (יהושע)Yahshua thiab qhov uas ciaj sawv rov los. 19 Lawv txawm coj Sha-ul mus rau hauv lub chaw sablaj Ale‑aupakas thiab nug tias, thov koj qhia rau peb saib koj tej lus qhia tshiab no yog ab tsi? 20 Rau qhov koj coj tej zaj uas txawv txawv nrov tuaj txog peb pobntsej lawm, peb thiaj li xav paub tias tej lus tawd, lub ntsiab yog hais txog ab tsi tiag. 21 Cov tibneeg Athees sawvdaws thiab lwm haiv neeg uas nyob qhov ntawd tsuas yog nrhiav sijhawm hais lossis mloog txog tej yam uas tshiab tshiab xwb.

22 Sha-ul thiaj sawv ntsug hauv nruab nrab lub chaw sablaj Ale‑aupakas thiab hais tias, cov tibneeg Athees, kuv pom tias nej coj kevcai ntseeg nruj rau txhua fab. 23 Rau qhov thaum kuv taug kev mus ncig thiab saib tej uas nej teev ntawd, kuv pom muaj ib lub thaj uas sau cia hais tias, pub rau tus timtswv uas tsis tau paub. Vim li no tus timtswv uas nej tsis paub los nej tseem teev, kuv thiaj muab qhia rau nej. 24 Abba (יחוח)Yahweh, tus uas tsim lub ntiajteb thiab txhua yam uas nyob hauv, nws yog tus uas tsim lub ntuj thiab lub ntiajteb Tus Tswv. Nws tsis nyob hauv tej tsev uas tibneeg txhais tes ua, 25 thiab tsis txog tibneeg txhais tes tu nws, vim nws tsis cheem tsum abtsi li, rau qhov nws yog tus uas pub txojsia, txoj pa, thiab txhua yam rau tibneeg sawv-daws. 26 Nws tsim txhua haiv neeg los ntawm tib cov roj ntsha xwb thiab muaj nyob mus thoob plaws hauv qab ntuj, thiab teem caij teem nyoog thiab tu ciam rau lawv nyob, 27 xwv lawv thiaj li nrhiav pom Abba (יחוח)Yahweh raws li lawv txoj kev ntseeg uas coj lawv mus nrhiav tau nws. Tiamsis nws nyob tsis deb ntawm peb txhua tus xwb.

28 Vim muaj Abba (יחוח)Yahweh, peb thiaj li ciaj sia mus mus los los thiab muaj sia nyob. Nej cov uas txawj sau nkauj kuj hais tias, qhov tseeb, peb yog Abba (יחוח)Yahweh cov tub ki.  29 Vim peb yog Abba (יחוח)Yahweh cov tub ki, peb yuav tsum tsis txhob xav tias, Abba (יחוח)Yahweh txoj kev dawb huv, zoo ib yam li tej nyiaj tej kub lossis tej pob zeb, thiab tej duab uas tsim los ntawm tibneeg txhais tes thiab lub tswvyim. 30 Thaum tibneeg tseem tsis tau paub, Abba (יחוח)Yahweh kuj tsis suav tias muaj txim, tiamsis nimno nws hais rau tibneeg sawvdaws uas nyob txhua qhov kom ntxeev dua siab tshiab, 31 rau qhov nws twb teem ib hnub cia lawm mas hnub ntawd nws yuav kom tus uas nws twb xaiv tseg lawd, los txiav txim kom ncaj ncees rau lub ntiajteb. Thiab Abba (יחוח)Yahweh twb ua timkhwv rau sawvdaws pom uas yog tsa (יהושע)Yahshua sawv hauv qhov tuag rov qab los lawm. 32 Thaum lawv hnov txog qhov uas ciaj sawv hauv qhov tuag rov los, muaj qee leej kuj thuam luag, tiamsis muaj qee leej kuj hais tias, peb xav rov qab hnov koj qhia txog zaj no dua thiab. 33 Sha-ul txawm ncaim lawv mus. 34 Muaj qee leej koom nrog Sha-ul thiab ntseeg. Cov ntawd ib tug yog Di‑aunixias uas yog ib tug tuav haujlwm hauv lub chaw sablaj Ale‑aupakas, thiab muaj ib tug pojniam npe hu ua Damalis thiab muaj dua lwm tus nrog lawv.

​