Cov Ntseeg Raug Kev Tsim Txom

1 Thaum ntawd vajntxwv Helauj tsa tes kiag ua phem rau cov ntseeg qee leej.  

2 Nws xuas ntaj tua Yahchanan tus tijlaug Yaaqob. 3 Thaum nws pom tias qhov uas nws ua ntawd haum cov Yahdaim siab, nws kuj ntes Kepha thiab. Tej xwm txheej no tshwm rau thaum ua kevcai Noj Ncuav tsis Xyaw Keeb. 4 Thaum ntes Kepha lawd, txawm muab kaw rau hauv tsev lojfaj, thiab muab cob rau plaub pab tub rog zov, ib pab muaj plaub leeg. Helauj npaj siab cia tias, thaum ua kevcai Hla Dhau tag lawm, nws yuav coj Kepha los rau cov pejxeem txiav txim.

5 Vim li no Kepha thiaj raug kaw hauv tsev lojfaj. Tiamsis pawg ntseeg kub siab lug thov Abba  (יחוח)Yahweh pab Kepha.

​

Kepha Dim Hauv Tsev Lojfaj

 6 Hmo ntawd ua ntej uas Helauj yuav coj Kepha tawm los txiav txim, Kepha tabtom tsaug zog hauv nruab nrab ob tug tub rog, muaj ob txoj saw hlau khi thiab muaj cov tub rog tabtom zov qhov rooj tsev lojfaj. 7 Mas txawm muaj Abba (יחוח)Yahweh ib tug tubtxib saum ntuj tshwm plaws los thiab muaj duab ci nplas rau hauv chav uas kaw. Tus tubtxib saum ntuj ntawd txawm cev tes mus diaj Kepha ntawm ib sab, tsa kom sawv thiab hais tias, cia li sawv tsees los tsuag tsuag. Ces ob txoj saw hlau thiaj li plam kiag ntawm Kepha tes mus lawm. 8 Tus tubtxib saum ntuj hais rau Kepha tias, cia li hnav ris tsho thiab rau koj nkawm khau khiab. Kepha kuj ua li ntawd. Thiab hais rau Kepha tias, cia li muab koj lub tsho ntev los kauv koj thiab raws kuv qab mus. 9 Kepha txawm raws qab tawm mus. Nws tsis paub tias qhov uas tus tubtxib saum ntuj ua ntawd yog tseeb, nws xav tias yog ua yog toog xwb. 10 Thaum nkawv hla dhau pab tub rog uas ib thiab pab uas ob lawm, kuj los txog lub qhov rooj hlau uas yog txojkev uas mus rau hauv lub nroog. Txhib qhov rooj ntawd cia li qheb rau nkawv mus, nkawv thiaj hla tawm mus, mas thaum taug txojkev tau ib nyuag ntu, tus tubtxib saum ntuj cia li ploj ntais ntawm Kepha lawm. 11 Thaum Kepha feeb meej lawm, nws hais tias, nimno kuv paub tseeb tias Abba (יחוח)Yahweh txib nws tus tubtxib saum ntuj los cawm kuv dim hauv Helauj txhais tes thiab, dim qhov uas cov Yahdah npaj siab ua phem rau kuv. 12 Thaum Kepha paub li ntawd lawm, nws txawm mus rau ntawm Miriam uas yog Yahchanan uas muaj dua ib lub npe hu ua Yahchanan Mark leej niam lub tsev. Qhov ntawd muaj ntau leej tuaj txoos ua ke thov Abba (יחוח)Yahweh.

13 Thaum Kepha khob rooj vag, muaj ib tug nkauj qhe hu ua Laudas tawm mus saib.

14 Thaum nws cim tau tias yog Kepha lub suab nws zoo siab heev, ces txawm tsis nco qheb rooj vag. Nws cia li khiav rov qab mus hais tias Kepha sawv ntawm rooj vag 15 Lawv txawm hais rau nws tias, koj vwm kaj. Tiamsis nws hais khov kho tias, yog tiag tiag li. Lawv txawm hais tias, yog tus tubtxib saum ntuj uas nrog nraim Kepha xwb. 16 Tiamsis Kepha tseem khob khob rooj vag. Thaum lawv qheb rooj vaj thiab pom nws, lawv kuj phimhwj heev. 17 Kepha co tes rau lawv kom nyob twjywm thiab qhia rau lawv mloog tias Abba (יחוח)Yahweh coj nws tawm hauv tsev lojfaj los li cas. Nws hais tias, cia li mus hais zaj no rau Yaaqob thiab cov kwvtij paub. Ces Kepha txawm tawm mus rau lwm qhov lawm.

18 Thaum kaj ntug cov tub rog kuj ntxhov siab heev rau qhov uas lawv tsis paub xyov Kepha ua li cas lawm. 19 Thaum Helauj nrhiav tsis pom Kepha, nws tshuaj cov tub rog uas zov tsev lojfaj ntawd thiab hais kom muab lawv tua pov tseg. Ces Helauj txawm tawm hauv lub xeev Yahdah mus nyob rau hauv lub moos Xixalias lawm.

Helauj Tuag

 20 Helauj chim rau cov tibneeg uas nyob hauv lub nroog Thailab thiab hauv lub nroog Xaidoos. Cov tibneeg thiaj koom ua ib lub siab tuaj cuag nws. Lawv yaum kom Nplatas uas saib xyuas vajntxwv Helauj tsev pab lawv hais, ces lawv thiaj li mus thov vajntxwv Helauj kom rov sib raug zoo, rau qhov lawv lub tebchaws yeej ib txwm mus yuav mov hauv vajntxwv lub tebchaws los noj xwb.

21 Thaum txog hnub uas Helauj teem rau lawv tuaj cuag nws, Helauj hnav nws cev ris tsho vajntxwv thiab zaum saum nws lub zwmtxwv hais lus rau cov pejxeem. 22 Cov pejxeem hais nrov nrov hais tias, lub suab no yog Abba (יחוח)Yahweh lub suab, tsis yog tibneeg lub.

23 Tamsim ntawd Abba (יחוח)Yahweh ib tug tubtxib saum ntuj txawm los ntaus Helauj, rau qhov Helauj tsis muab koob meej rau Abba (יחוח)Yahweh, thiaj muaj kas noj Helauj lub cev, Helauj thiaj tuag lawm.

24 Tiamsis Abba (יחוח)Yahweh txojlus huaj vam tuaj thiab nthuav dav zuj zus mus. 25 Thaum Barnabas thiab Sha-ul ua haujlwm tag, nkawv txawm tawm hauv Yeluxalees mus, thiab coj Yahchanan uas muaj dua ib lub npe hu ua Yahchanan Mark mus thiab.

​