Sha-ul Thiab Barnabas Nyob Hauv Ikhanias

1 Nyob hauv lub moos Ikhanias, Sha-ul  thiab Barnabas nkawv mus ua ke rau hauv cov Yahdaim  lub tsev sablaj ib yam li ib txwm mus thiab qhia tau ntxim siab heev, mas cov Yahdaim thiab cov Greek thiaj los ntseeg coob heev.

2 Tiamsis cov Yahdaim uas tsis ntseeg tshum kom lwm haiv neeg xav phem rau cov kwvtij uas ntseeg. 3 Vim li no, nkawv thiaj nyob qhov chaw ntawd tau ntev loo, ua siab tawv qhawv qhia txog Abba (יחוח)Yahweh, thiab Abba (יחוח)Yahweh pub kom nkawv ua tau txujci tseem ceeb thiab txujci phimhwj thiaj qhwv tau tej lus uas hais txog Abba (יחוח)Yahweh txojkev hlub.

4 Tiamsis cov tibneeg hauv lub moos ntawd txawm tawg ua ob pab, ib pab nrog cov Yahdaim, ib pab nrog cov tubtxib.

5 Thaum lwm haiv neeg thiab cov Yahdaim thiab lawv cov thawj ntaus tswvyim yuav ua phem xuas pob zeb ntaus nkawv, 6 nkawv kuj paub ua ntej lawm. Nkawv txawm khiav mus rau lub xeev Likhaunias mus rau lub moos Lixathas thiab lub moos Dawnpis thiab tej zej zog ib ncig, 7 thiab qhia txoj hmoo zoo rau qhov ntawd.

​

Sha-ul Thiab Barnabas Nyob Hauv Lixathas Thiab Dawnpis

 8 Nyob hauv lub nroog Lixathas, muaj ib tug yawg tuag ceg thaum nyob nruab thiab los lawm. Txij thaum yug los nws yeej mus tsis taus kev li. 9 Tus yawg no zaum ntawd mloog Sha-ul qhuab qhia, mas Sha-ul saib ntsoov nws, pom tias nws muaj kev ntseeg txaus kho nws tus mob zoo. 10 Sha-ul txawm hais nrov nrov rau nws hais tias, cia li sawv tsees, sawv ntsug. Tus yawg ntawd txawm sawv tsees khiav paj paws mus kev. 11 Thaum cov tibneeg pom tej uas Sha-ul ua, lawv txawm tsa suab qw hais lus Likhaunias tias, tej timtswv txia ua tibneeg nqes los txog peb lawm. 12 Lawv txawm tis npe rau Barnabas hu ua Xu thiab tis npe rau Sha-ul hu ua Hawmes vim Sha-ul yog tus thawj hais lus. 13 Tus povthawj uas teev tus dab mlom Xu uas nyob sab nraum lub moos txawm coj txiv nyuj thiab paj ntoo tuaj rau ntawm rooj loog yuav nrog cov pejxeem ua kevcai xyeem rau nkawv. 14 Thaum Barnabas thiab Sha-ul hnov li ntawd, nkawv txawm dua pes rhe nkawv tej ris tsho thiab khiav mus rau hauv cov tibneeg ntawd thiab qw hais tias, 15 Nej sawvdaws, nej ua abtsi li no? Wb kuj yog tibneeg ib yam li nej xwb, thiab wb coj txoj hmoo zoo tuaj qhia rau nej kom nej tig kiag ntawm tej kev uas tsis muaj qabhau no los cuag Abba (יחוח)Yahweh tus uas muaj txojsia nyob, yog tus uas tsim lub ntuj thiab lub ntiajteb thiab dej hiavtxwv thiab txhua yam uas muaj nyob rau hauv.

16 Yav tag los Abba (יחוח)Yahweh cia ib tsoom tibneeg sawvdaws nyias mus raws li nyias txojkev. 17 Tiamsis nws pheej qhia nws rau nej paub tsis tu ncua, rau qhov nws ua zoo rau nej thiab pub nag los saum ntuj los thiab pub muaj qoob loo raws caij raws nyoog rau nej, thiab pub nej muaj noj tsau npo thiab muaj kev zoo siab. 18 Txawm yog hais li ntawd lawm, los nkawv ceeblaj txwv lawv kom tsis txhob xyeem tej ntawd rau nkawv. 19 Muaj cov Yahdaim qee leej tuaj tim lub moos Athi‑aus thiab lub moos Ikhanias tuaj. Lawv tshum cov pejxeem mas lawv xuas pob zeb ntaus Sha-ul  thiab muab nws hai tawm hauv lub moos mus, lawv xav tias nws tuag lawm. 20 Tiamsis thaum cov thwjtim tuaj vij nkaus nws, nws txawm sawv tsees mus rau hauv lub moos. Hnub tom qab nws nrog Barnabas mus rau hauv lub moos Dawnpis.

​

Rov Mus Rau Lub Moos Athi‑aus Hauv Syria

 21 Thaum nkawv tshaj txoj hmoo zoo hauv lub moos ntawd tag thiab qhia rau cov tibneeg paub coob lawm, nkawv txawm rov mus rau lub moos Lixathas, lub moos Ikhanias, thiab lub moos Athi‑aus. 22 Nkawv txhawb cov thwjtim muaj zog tuaj thiab txhawb kom lawv nyob ruaj hauv txojkev ntseeg thiab hais tias, peb yuav tsum raug kev txom nyem ntau yam thiaj nkag tau rau hauv Abba (יחוח)Yahweh lub tebchaws. 23 Thaum nkawv tsa cov uas saib xyuas cov ntseeg rau txhua qhov lawm, nkawv kuj yoo mov thov Abba (יחוח)Yahweh thiab muab lawv cob rau (יהושע)Yahshua tus uas lawv ntseeg. 24 Nkawv hla lub xeev Pixidias los txog lub xeev Pafilias. 25 Thaum nkawv qhia Abba (יחוח)Yahweh txojlus rau hauv lub moos Pawkas tag lawm, nkawv txawm nqes mus rau lub moos Athalias 26 thiab caij nkoj qhov ntawd mus rau lub moos Athi‑aus, yog lub moos uas muab nkawv cob rau hauv Abba (יחוח)Yahweh txojkev hlub kom mus ua tej haujlwm uas nkawv twb ua tiav lawm. 27 Thaum los txog, nkawv hu pawg ntseeg tuaj txoos ua ke thiab qhia txhua yam uas Abba  (יחוח)Yahweh siv nkawv ua thiab qhia txog qhov uas Abba (יחוח)Yahweh qheb qhov rooj rau lwm haiv neeg los ntseeg li cas. 28 Mas nkawv nrog cov thwjtim nyob qhov ntawd ntev loo.

​