Cov Yahdaim Kom Sha-ul

1 Tau tsib hnub tom qab, tus tuam pov thawj hlob Ananias, thiab cov kev txwj laug qee leej, thiab ib tug yawg txawj txheem plaub npe hu ua Thawthulas tuaj txog. Lawv txawm mus nkaug Sha-ul rau Tus Tswv xeev. 2 Thaum hu Sha-ul los txog, Thawthulas pib nkaug hais tias, Felis uas saib hlob, peb tau nyob kaj siab lug ntev vim yog muaj koj, thiab peb haiv neeg tau kev vam meej vim yog qhov uas koj xam pom deb, 3 mas peb ua koj tsaug thiab nco koj tshav ntuj rau txhua fab txhua qhov. 4 Tiamsis tsis xav nkim koj lub sijhawm, kuv thov koj tsa muag zaj saib peb es mloog peb hais ib nyuag pliag. 5 Peb pom tias tus tibneeg no yog ib tug xeeb plaub thiab pheej tsim kev kub ntxhov rau cov Yahdaim thoob plaws ntiajteb thiab yog ib tug thawj coj hauv cov Naxales. 6 Thiab nws yooj xeeb ua qias puas tsuas lub tuam tsev, peb thiaj ntes nws. 7 Tiamsis tus thawj tubrog pawg txhiab leej uas yog Lixias txawm tuaj txeeb Sha-ul ntawm peb tes mus lawm. 8 Yog koj tshuaj nws koj yuav paub txhua yam uas peb nkaug nws. 9 Cov Yahdaim qw ua ib tsaug hais tias, muaj tseeb li ntawd.

​

 Sha-ul Daws Nws Zaj Rau Felis

 10 Thaum Tus Tswv xeev ncaws hau kom Sha-ul hais, Sha-ul txawm hais tias, vim kuv paub tias koj ua tus tu plaub rau lub tebchaws no ntau xyoo los lawm, kuv thiaj zoo siab hlo hais daws kuv zaj.

11 Koj yeej tshuaj tau hais tias, txij thaum kuv mus pe hawm Abba (יחוח)Yahweh hauv lub nroog Yeluxalees ntawd los tsis tau dhau kaum ob hnub. 12 Lawv yeej tsis pom kuv nrog leejtwg sib cav rau hauv lub tuam tsev lossis tshum cov tibneeg kom ntxhov rau hauv tej tsev sablaj lossis hauv lub nroog li. 13 Tej uas lawv tabtom nkaug kuv no, lawv nrhiav tsis tau ib qho keeb puam uas tseeb kiag li. 14 Tiamsis kuv yeem lees li no rau koj tias, kuv ua koom tu peb tej poj koob yawm txwv Abba (יחוח)Yahweh raws li Txojkev tshiab no uas lawv hais tias, yog kev ntseeg cuav. Kuv ntseeg txhua lo lus raws txoj kevcai thiab tej lus uas sau hauv cov xibhwb cev Abba (יחוח)Yahweh lus phau ntawv. 15 Kuv muaj siab vam rau hauv Abba (יחוח)Yahweh uas lawv vam ib yam nkaus, uas hais tias cov ncaj ncees thiab cov tsis ncaj puavleej yuav sawv hauv qhov tuag rov los. 16 Vim li no kuv thiaj siv zog ua lub siab ncaj xyaum txhua lub sij-hawm kom haum Abba (יחוח)Yahweh thiab tibneeg lub siab.

17 Dhau los ntau xyoo, kuv coj nyiaj tuaj pab kuv haiv neeg thiab tuaj xyeem qhov txhia chaw rau Abba (יחוח)Yahweh. 18 Lub sijhawm ntawd, lawv kuj pom kuv nyob hauv lub tuam tsev, yog thaum kuv twb ua kevcai ntxuav lawm thiab tsis muaj tibneeg nrog kuv ua ke thiab yeej tsis muaj kev kub ntxhov kiag li.

19 Tiamsis cov Yahdaim qee leej tuaj hauv lub xeev Asia tuaj, mas tsim nyog lawv cov ntawd tuaj rau ntawm koj xubntiag no thiab yog lawv muaj abtsi, lawv cia li nkaug kuv.

20 Lossis cia cov tibneeg uas nyob ntawm no hais tej uas lawv pom tias kuv ua txhaum rau thaum kuv nyob tab meeg rau ntawm cov thawj lub rooj sablaj, 

21 tsuas yog tib qhov uas thaum kuv sawv hauv lawv nruab nrab kuv qw hais tias, qhov uas kuv raug txiav txim tab meeg nej hnub no, vim yog qhov uas ciaj sawv hauv qhov tuag rov los. 22 Tiamsis Felis paub txog Txojkev ntawd zoo, txawm sej rooj plaub ntawd ntxiv mus, nws hais tias, thaum Lixias uas yog tus thawj rog kav ib txhiab leej tuaj txog, kuv mam tu koj rooj plaub. 23 Nws txawm hais kom tus thawj rog uas kav ib puas leej zov Sha-ul ntxiv mus tiamsis tsis ua nruj thiab tsis txwv nws cov kwvluag tuaj tu nws.

24 Dhau ob peb hnub Felis thiab nws tus pojniam Ruxilas uas yog tibneeg Yahdaim tuaj. Nws txawm hais kom hu Sha-ul  los thiab mloog Sha-ul hais txog qhov uas ntseeg (יהושע)Yahshua Messiah. 25 Thaum Sha-ul hais txog txojkev ncaj ncees thiab qhov uas tswj yus lub siab thiab qhov uas yuav raug txiav txim yav tom hauv ntej, Felis kuj ntshai thiab hais tias, nimno koj cia li mus, yog muaj sijhawm kuv yuav hu koj rov tuaj. 26 Tamsim ntawd Felis kuj xav tias Sha-ul yuav muab nyiaj xiab nws. Vim li no, nws thiaj pheej hu Sha-ul los nrog nws tham. 27 Dhau ob xyoos lawm, Paukias Fexatas los nyob Felis chaw. Felis xav ua zoo rau cov Yahdaim nws txawm cia Sha-ul raug kaw hauv tsev lojfaj ntxiv mus.

​