Sha-ul Thov Mus Hais Plaub Ntawm Xixas

1 Thaum Fexatas tuaj txog hauv lub xeev tau peb hnub lawm nws txawm tawm hauv lub moos Xixalias mus rau lub nroog Yeluxalees. 2 ov pov thawj hlob thiab Yahdaim cov thawj tuaj nkaug Sha-ul rau nws, thiab thov nws. 3 Lawv thov kom nws xa Sha-ul tuaj rau hauv Yeluxalees, vim lawv ntaus tswvyim yuav tos kev tua Sha-ul. 4 Fexatas txawm teb tias, Sha-ul tseem raug kaw rau hauv Xixalias thiab tshuav tsis ntev kuv yuav rov mus rau qhov ntawd. 5 Thiab nws hais tias, vim li no, nej cov uas ua thawj cia li nrog kuv mus. Yog Sha-ul ua txhaum txoj twg, lawv cia li nkaug nws qhov ntawd. 6 Thaum Fexatas so hauv lawv tsis dhau yim hnub lossis kaum hnub, nws kuj mus rau lub moos Xixalias. Mas hnub tom qab nws zaum saum lub rooj tu plaub hais kom coj Sha-ul los. 7 Thaum Sha-ul los txog, cov Yahdaim uas tuaj ntawm Yeluxalees kuj sawv vij Sha-ul, thiab hais ntau yam lus hnyav nkaug Sha-ul tiamsis tej lus ntawd tsis muaj keeb puam tseeb. 8 Sha-ul thiaj hais daws nws zaj tias, kuv tsis tau ua abtsi txhaum cov Yahdaim txoj kevcai lossis lub tuam tsev lossis Xixas.

9 Fexatas xav ua zoo rau cov Yahdaim thiaj hais rau Sha-ul tias, koj puas xav mus rau hauv lub nroog Yeluxalees es kuv mam tu koj rooj plaub qhov ntawd? 10 Tiamsis Sha-ul hais tias, kuv tabtom sawv ntsug ntawm Xixas lub rooj tu plaub, yog lub chaw uas tsim nyog tu kuv rooj plaub. Koj yeej paub zoo tias kuv tsis ua abtsi txhaum rau cov Yahdaim. 11 Yog kuv tau ua txhaum thiab ua abtsi uas tsim nyog raug lub txim tuag, kuv kuj yeem tuag. Yog qhov uas lawv nkaug kuv tsis muaj tseeb, mas tsis muaj leejtwg muaj hwjchim muab kuv cob tau rau lawv. Kuv thov mus hais plaub ntawm Xixas.

12 Thaum Fexatas nrog nws cov tuav haujlwm sablaj tag lawm, txawm teb tias, koj twb thov mus hais ntawm Xixas, mas koj yuav tau mus cuag Xixas.

​

Fexatas Sablaj Rau Vajntxwv Akipas

 13 Dhau ntau hnub lawm vajntxwv Akipas thiab nws tus muam Npawnij tuaj ntsib Fexatas ntawm lub moos Xixalias. 14 Thaum so qhov ntawd ntau hnub lawm, Fexatas txawm qhia Sha-ul tshaj plaub rau vajntxwv mloog hais tias, muaj ib tug yawg raug Felis kaw cia. 15 Mas thaum kuv mus rau hauv Yeluxalees cov pov thawj hlob thiab Yahdaim cov kev txwj laug tuaj kom thov kuv rau txim rau tus ntawd. 16 Tiamsis kuv hais rau lawv hais tias, raws li cov Romans txoj kevcai, ob tog yuav tsum tuaj sib hais tim ncauj tim lus thiab cia tus pem kom hais daws nws zaj tas tso mam li txiav txim rau tus uas ua txhaum. Thaum lawv tuaj txhij lawm, hnub tom qab kuv mus nyob hauv lub tsev hais plaub thiab hu tus txivneej ntawd los cuag kuv. 18 Thaum cov yeejkom sawv los hais, lawv tsis nkaug tej uas nws ua txhaum raws li kuv xav. 19 Lawv tsuas sib cav hais txog lawv tej kevcai xwb, thiab lawv hais txog ib tug txivneej uas hu ua (יהושע)Yahshua, nws twb tuag lawm, tiamsis Sha-ul hais tias tus txivneej ntawd tseem muaj sia nyob. 20 Thaum ntawd kuv tsis paub yuav taug li cas thiaj paub zaj no tseeb, kuv thiaj nug Sha-ul saib nws puas kam mus nram lub nroog Yeluxalees, kuv mam li hais nws rooj plaub nrad.  21 Tiamsis Sha-ul thov kom kuv cia nws nyob nws hauv lub tsev lojcuj thiab cia Huabtais Xixas mam li txiav txim rau nws. Kuv thiaj cia nws nyob nws hauv tsev lojcuj mus txog hnub uas kuv xa nws mus cuag Huabtais Xixas. 22 Akipas txawm hais rau Fexatas tias, kuv xav mloog tus yawg ntawd hais thiab. Fexatas hais tias, tagkis koj yuav tau hnov nws hais.

Coj Sha-ul Los Cuag Vajntxwv Akipas

 23 Tagkis tom qab Akipas thiab Npawnij hnav meej mom txhij zog tuaj rau hauv chav tsev tu plaub nrog cov thawj tub rog uas kav ib txhiab leej thiab cov tibneeg tseem ceeb hauv lub moos ntawd ua ke. Ces Fexatas txawm hais kom coj

Sha-ul los. 24 Fexatas hais tias, Vajntxwv Akipas thiab nej sawvdaws uas tuaj ua ke ntawm no, nej pom tus yawg no uas cov Yahdaim sawvdaws tuaj thov kuv hauv lub nroog Yeluxalees, thiab ntawm no, lawv tau qw hais tias, tsis tsim nyog cia nws muaj txojsia nyob ntxiv lawm. 25 Tiamsis kuv pom tias nws tsis tau ua ib qho txhaum uas txaus tuag, mas thaum nws thov mus hais plaub rau ntawm huabtais Xixas, kuv thiaj txiav txim siab yuav xa nws mus. 26 Tiamsis kuv tsis muaj tus no li keeb puam meej uas yuav xa mus rau kuv Tus Tswv. Vim li no kuv thiaj coj nws los rau ntawm nej xubntiag thiab qhov loj yog los rau ntawm vajntxwv Akipas koj xubntiag, vam hais tias thaum muab nws tshuaj tag lawm yuav muaj ntsiab lus sau tau thiab. 27 Kuv xav tias qhov uas xa ib tug raug txim mus tiamsis tsis qhia tej keeb puam uas kom mus kuj yog tsis thoob tsib.

​