Sha-ul Hais Daws Nws Zaj Rau Akipas

1 Akipas hais rau Sha-ul tias. Kuv tso cai koj hais daws koj zaj. Sha-ul  txawm tsa tes hais daws nws zaj tias 2 Vajntxwv Akipas, kuv pom tias hnub no muaj zoo sijhawm uas tau nyob ntawm koj xub-ntiag hais daws tej lus uas cov Yahdaim nkaug huvsi, 3 mas qhov loj yog qhov uas koj yeej paub cov Yahdaim tej kevcai thiab tej teeb meem. Yog li no thov koj ua siab ntev mloog kuv hais.

4 Cov Yahdaim sawvdaws yeej paub kuv lub neej txij thaum yau los thiab paub thaum chiv thawj kuv yeej nrog kuv haiv neeg nyob thiab nyob hauv lub nroog Yeluxalees. 5 Lawv yeej paub kuv ntev los lawm. Yog lawv yeem ua timkhawv lawv yeej ua tau hais tias kuv ua lub neej raws li pab Falixais uas coj kevcai nruj kawg. 6 Qhov uas nimno kuv tau los sawv rau koj txiav txim twb yog qhov uas muaj siab vam rau tej lus uas Abba (יחוח)Yahweh cog tseg rau peb tej poj koob yawm txwv. 7 Peb kaum ob xeem ua koom tu Abba (יחוח)Yahweh, kawg dag, kawg zog, nruab hnub, hmo ntuj, vim muaj siab vam yuav tau tej lus cog tseg ntawd. Au vajntxwv, vim yog txojkev vam no, cov Yahdaim thiaj nkaug kuv.

8 Ua cas nej xav tias, qhov uas Abba (יחוח)Yahweh tsa tibneeg tuag ciaj sawv rov los ntawd, yog zaj uas ntseeg tsis tau? 9 Kuv txeev xav hauv kuv lub siab tias, kuv yuav tsum ua ntau yam tawm tsam (יהושע)Yahshua uas yog tibneeg Naxales lub npe. 10 Kuv twb ua tej no rau hauv Yeluxalees. Thaum kuv tau hwjchim ntawm cov pov thawj hlob lawm, kuv ntes cov tibneeg dawb huv coob heev kaw rau hauv tsev lojfaj, thiab thaum lawv raug tua pov tseg, kuv kuj pom zoo.

11 Kuv pheej rau txim rau lawv tsis tseg hauv txhua lub tsev sablaj thiab quab yuam lawv hais lus tuam mom Abba (יחוח)Yahweh. Kuv npau taws rau lawv heev, kuv thiaj caum mus tsim txom lawv rau hauv lwm tebchaws tej moos.

​

Zaj Uas Sha-ul Hloov Siab

(Tubtxib 9:1-19, 22:6-16)

12 Yog li ntawd, thaum kuv tau hwjchim ntawm cov pov thawj hlob thiab lawv txib kuv mus, kuv txawm taug kev mus rau lub nroog Damaxakas. 13 Au vajntxwv, thaum tav su, kuv tabtom taug kev mus kuv txawm pom ib tug duab ci heev dua lub hnub tsom saum ntuj los vij nkaus kuv thiab cov tibneeg uas nrog kuv mus. 14 Thaum peb sawvdaws ntog tag rau hauv pem teb kuv hnov ib lub suab hais rau kuv ua lus Hebrew tias, Sha-uj , Sha-ul es, ua cas koj tsim txom kuv. Qhov uas koj tuam tus hmuv kuj mob koj tus kheej xwb. 15 Kuv txawm hais tias, Yawg Hlob, koj yog leejtwg? Nws teb hais tias, kuv yog (יהושע)Yahshua tus uas koj tabtom tsim txom. 16 Cia li sawv tsees, sawv ntsug vim tias kuv los tshwm rau koj pom, yuav tsa koj ua tub qhe thiab ua timkhawv txog tej xwm txheej uas koj tau pom kuv ua thiab tej uas kuv yuav ua tshwm rau koj. 17 Kuv yuav cawm koj dim hauv koj haiv neeg thiab hauv lwm haiv neeg uas kuv txib koj mus ntawd.

18 Koj yuav mus qheb lawv lub qhov muag kom lawv tig ntawm txojkev tsaus ntuj los cuag txojkev kaj, thiab tig ntawm Xatas lub hwjchim los cuag Abba (יחוח)Yahweh, lawv thiaj tau txais kev zam txim thiab muaj feem nrog cov uas twb raug muab cais ua dawb huv vim yog ntseeg kuv nyob ua ke. 19 Au vajntxwv Akipas, vim li no, kuv thiaj tsis tawv zaj yog toog uas los saum ntuj los, 20 tiamsis kuv xub qhia rau cov uas nyob Damaxakas lawm, mam li qhia rau hauv Yeluxalees thiab thoob plaws lub xeev Yahdah thiab qhia rau lwm haiv neeg kom lawv ntxeev dua siab tshiab thiab tig los cuag Abba (יחוח)Yahweh thiab ua lub neej phim qhov uas lawv ntxeev dua siab tshiab. 21 Vim li no cov Yahdaim thiaj ntes kuv hauv lub tuam tsev thiab yooj xeeb yuav tua kuv pov tseg. 22 Tiamsis vim Abba (יחוח)Yahweh pab kuv los txog niaj hnub nimno kuv thiaj tau los sawv ntawm no ua timkhawv rau cov hlob cov yau. Kuv tsuas hais txog tej uas cov xibhwb cev Abba (יחוח)Yahweh lus thiab Mauxes hais cia tias yuav tshwm los xwb, 23 yog qhov uas tus Messiah yuav tsum raug kev tsim txom thiab qhov uas nws yog thawj tug uas ciaj sawv hauv qhov tuag rov los, nws thiaj qhia txojkev kaj rau cov Yahdaim thiab lwm haiv neeg. 24 Thaum Sha-ul tabtom hais daws nws zaj ntawd, Fexatas txawm qw nrov hais tias, Sha-ul , koj vwm lawm lauj. Koj kawm paub txujci ntau ua rau koj vwm. 25 Tiamsis Sha-ul hais tias, Fexatas uas saib hlob, kuv tsis vwm li, kuv hais tseeb thiab hais lus feeb meej. 26 Vaj-ntxwv yeej paub txog tej no, kuv thiaj muaj siab loj hais rau nws, vim kuv ntseeg tias tej xwm txheej no tsis muaj ib yam twg uas nws tsis pom,rau qhov tej no tsis tau ua zais nkoos.

27 Vajntxwv Akipas, koj puas ntseeg tej lus uas cov xibhwb cev Abba (יחוח)Yahweh lus hais? Kuv yeej paub tias koj ntseeg. 28 Akipas hais rau Sha-ul tias, koj yuav yaum kuv los ua Khixatias sai sai no lov? 

29 Sha-ul hais tias, tsis hais qeeb los sai, kuv thov Abba (יחוח)Yahweh tias tsis yog koj tib leeg xwb, tiamsis txhua tus uas hnub no hnov kuv hais yuav tau ua ib yam li kuv, tsuas yog tseg tsis txhob raug saw hlau khi li kuv no xwb. 30 Ces vajntxwv thiab Tus Tswv xeev thiab Npawnij thiab sawvdaws uas nyob ntawd txawm sawv pes tsees. 31 Thaum lawv tawm mus lawv txawm sib hais tias, tus yawg no tsis tau ua ib yam txhaum uas tsim nyog muab rau txim tuag lossis muab kaw.

32 Akipas txawm hais rau Fexatas tias, yog tus no tsis tau thov cia mus hais kom txog Xixas, ces muab nws tso kuj tau.

​