Lub Koog Povtxwv Melitas

1 Thaum peb dim tag lawm, peb mam li paub tias lub koog povtxwv ntawd hu ua Melitas.  2 Cov tibneeg hauv lub tebchaws ntawd, hlub peb heev. Lawv rauv taws tos txais peb rau qhov nag los thiab no heev.

3 Sha-ul mus khaws ib tsuag taws los rauv rau hauv qhov cub, ces muaj ib tug nab muaj taug txawm tawm hauv tsuag taws los vim yog kub, mas tom Sha-ul txhais tes. 4 Thaum cov tibneeg hauv lub tebchaws ntawd pom tus nab dai vias ntawm Sha-ul txhais tes, lawv sib hais tias, tus no yeej yog ib tug tua tibneeg tiag tiag li. Txawm yog nws dim hauv hiavtxwv los lawm, los tus uas txiav txim ncaj tsis pub nws muaj txojsia nyob.  5 Tiamsis Sha-ul txawm tib ncho tus nab poob rau hauv qhov cub thiab nws tsis ua li cas kiag li. 6 Lawv tos ntsoov saib nws txhais tes yuav o tuaj los nws yuav cia li ntog kiag tuag lawm xwb. Tiamsis thaum lawv tos ntev lawm, kuj tsis pom nws ua li cas, lawv txawm hloov siab thiab xav hais tias, nws yog ib tug timtswv. 7 Tus thawj uas kav lub tebchaws ntawd npe hu ua Pulias, muaj teb nyob ze ntawd. Nws tos txais peb thiab yug peb zoo tau peb hnub. 8 Pulias txiv tabtom ua npaws thiab raws plab, mas Sha-ul mus saib nws thiab thov Abba (יחוח)Yahweh thiab muab tes npuab rau saum nws kho nws zoo. 9 Thaum ua li ntawd lawm, cov tibneeg muaj mob kis nyob hauv lub koog povtxwv ntawd, txawm tuaj cuag nws mas nws kuj kho lawv tej mob zoo.

10 Lawv kuj pub tshav ntuj rau peb ntau yam. Thaum peb yuav caij nkoj tawm mus, lawv kuj coj tej uas peb cheem tsum tuaj pub rau peb.

​

Sha-ul Mus Txog Lub Nroog Romans

 11 Thaum Dhau peb lub hli lawm, peb thiaj li caij ib lub nkoj uas tuaj nres tag lub caij ntuj no rau hauv koog povtxwv ntawd tawm mus. Lub nkoj ntawd yog tuaj ntawm lub nroog Alexadias tuaj, thiab muaj ob tug dab mlom ntxaib rau ntawm hauv nkoj. 12 Peb mus nres so rau ntawm lub moos Xailakhus tau peb hnub. 13 Thaum tawm qhov ntawd, peb mus txog lub moos Leki‑us. Hnub tom qab cua ntsawj sab nrad tuaj mas hnub uas ob peb mus txog lub moos Puthi‑aulis. 14 Peb ntsib cov kwvtij qhov ntawd thiab lawv hu peb mus so hauv lawv tau xya hnub. Yog li uas hais no, peb thiaj mus txog lub nroog Romans.

15 Thaum cov kwvtij uas nyob hauv lub nroog Romans hnov xov, lawv txawm tuaj tos peb ntawm lub Kiab Apias thiab ntawm Peb Lub Tsev So. Thaum Sha-ul pom lawv lawm, nws txawm ua Abba (יחוח)Yahweh tsaug thiab txhawb tau nws lub zog. 16 Thaum peb tuaj txog lub nroog Romans, nom tswv tso cai rau Sha-ul nyob ib cag thiab muaj ib tug tub rog zov.

​

Sha-ul Qhuab Qhia Hauv Romans

17 Dhau peb hnub lawm, Sha-ul txawm hu Yahdaim cov thawj tuaj txoos ua ke. Thaum tuaj txhij lawd, nws hais rau lawv tias, cov kwvtij, txawm yog kuv tsis tau ua txhaum rau peb haiv neeg lossis ua txhaum peb tej poj koob yawm txwv tej kevcai, los kuv tseem raug ntes hauv lub nroog Yeluxalees thiab raug muab cob rau hauv cov Romans txhais tes.

18 Thaum lawv tshuaj kuv zaj tag, lawv xav muab kuv tso mus, vim lawv tsis pom kuv ua ib qho txhaum uas yuav txaus muab kuv rau txim tuag. 19 tiamsis cov Yahdaim txwv tsis pub lawv tso kuv, kuv thiaj thov tuaj cuag Huabtais Xixas. Kuv ua li no, tsis yog kuv yuav tuaj nkaug kuv haivneeg rau Huabtais Xixas. 20 Qhov uas kuv hu nej tuaj ntawm no yog kuv xav pom nej thiab qhia rau nej paub hais tias, vim li cas luag thiaj muab saw hlau khi kuv. Kuv raug khi li no twb yog kuv ntseeg tus uas cov Ixayees cia siab rau.

21 Lawv hais rau nws tias, peb tsis tau txais tsab ntawv uas xa hauv lub xeev Yahdah tuaj hais txog koj thiab tsis muaj ib tug kwvtij twg xa xov tuaj hais phem txog koj. 22 Mas peb xav hnov koj hais saib koj xav li cas, vim peb paub tias cov uas ntseeg txojkev no, raug luag tawm tsam txhua qhov. 23 Thaum lawv teem dua ib hnub tuaj ntsib nws, muaj tibneeg coob tuaj cuag nws hauv nws lub chaw nyob. Nws txawm qhia lawv pib thaum sawvntxov mus txog tsaus ntuj. Nws ua timkhawv txog Abba (יחוח)Yahweh lub tebchaws thiab muab tej lus hauv Mauxes phau kevcai thiab hauv cov xibhwb cev Abba (יחוח)Yahweh lus phau ntawv los qhia yaum kom lawv los ntseeg (יהושע)Yahshua.

24 Tej lus uas nws hais ntaw muaj qee leej ntseeg, muaj qee leej tsis ntseeg.

25 Ces lawv txawm tsis sib haum lawm. Thaum lawv yuav sib ncaim mus,

Sha-ul hais dua ib nqes ntxiv tias, Tus Ntsuj Plig Dawbhuv hais raug lawm, qhov uas nws kom xibhwb Isayah uas cev lus hais rau nej tej poj koob yawm txwv tias, 26 cia li mus thiab hais rau cov tibneeg no tias, nej yeej yuav mloog tag mloog thiab los tsis nkag siab, nej yuav saib tag saib thiab los tsis pom. 27 Vim haiv neeg no lub siab tawv, thiab lawv ua ntsej lag muag dig thiab lawv kaw lawv lub qhov muag, tsam ces lawv lub qhov muag ho pom, thiab lawv lub qhov ntsej ho hnov, thiab lawv lub siab yuav to taub, ces lawv yuav tig rov los cuag kuv kho lawv kom zoo. 28 Vim li no nej cia li paub tias Abba (יחוח)Yahweh txojkev cawm dim no, thiaj raug muab xa mus rau lwm haiv neeg lawm, mas lawv yuav mloog. 30 Sha-ul nyob hauv lub tsev uas nws ntiav tau ob xyoos thiab tos txais txhua tus uas tuaj cuag nws. 31 Nws tshaj tawm txog Abba (יחוח)Yahweh lub tebchaws thiab ua siab loj qhia txog (יהושע)Yahshua Messiah tsis muaj abtsi khuam cheem.