Cov Thawj Nug Kepha Thiab Yahchanan

1 Thaum nkawv tseem qhia cov tibneeg ntawd, cov pov thawj thiab tus uas ua thawj saib xyuas lub tuam tsev thiab cov Xadukais txawm tuaj rau ntawm nkawv.

2 Lawv tsis txaus siab rau qhov uas nkawv qhia thiab tshaj tawm tias muaj kev sawv hauv qhov tuag rov los hauv (יהושע)Yahshua.

3 Lawv thiaj ntes nkawv coj mus kaw ib hmos kaj ntug rau hauv tsev lojfaj vim yog tsaus ntuj lawm. 4 Cov tibneeg uas hnov nkawv tej lus ntawd muaj ntau leej ntseeg. Cov txivneej huvsi uas ntseeg kwvlam tsib txhiab leej. 5 Thaum tagkis cov uas ua thawj thiab cov kev txwj laug thiab cov xibhwb qhia Abba (יחוח)Yahweh kevcai txawm tuaj sablaj ua ke rau hauv Yeluxalees, 6 nrog Anas uas yog tus tuam pov thawj hlob thiab Khayafas thiab Yahchanan thiab Alexadaws thiab txhua tus uas yog tus tuam pov thawj hlob li caj ces.

7 Thaum uas lawv coj Kepha thiab Yahchanan los sawv ntsug tab meeg, lawv nug nkawv tias, neb siv leejtwg li hwjchim thiab siv leejtwg lub npe ua tej haujlwm no? 8 Thaum ntawd Kepha muaj Tus Ntsuj Plig Dawbhuv puv npo, nws txawm hais rau lawv tias, nej cov thawj uas kav cov pejxeem thiab nej cov kev txwj laug, 9 yog hnub no nej tshuaj saib wb ob leeg rau qhov zoo uas wb tau ua rau ib tug tibneeg ceg tawv thiab nug tias ua li cas kho tau nws zoo lawm, 10 mas nej sawvdaws thiab cov Ixayees sawvdaws cia li paub tias twb yog vim (יהושע)Yahshua Messiah uas yog tibneeg Naxales lub npe uas nej muab teem rau saum tus ntoo ntsia tes thiab Abba (יחוח)Yahweh tsa nws sawv hauv qhov tuag rov los, mas tus yawg uas sawv ntawm nej xubntiag no thiaj zoo kiag.

11 (יהושע)Yahshua yog lub pob zeb uas cov kws ua tsev muab xyeeb tseg lawm, twb rov muab los teeb ua thawj lub rau ntawm kaum tsev lawm. 12 Hauv lwm tus yeej tsis muaj kev dim kiag li, rau qhov thoob plaws hauv qab ntuj no tsis muaj dua ib lub npe uas pub rau tibneeg siv cawm peb dim. 13 Thaum lawv pom Kepha thiab Yahchanan muaj siab loj thiab paub tias nkawv tsis tau kawm ntawv tsuas zoo li luag tej xwb, lawv xav tsis thoob, thiab nco tau tias nkawv txeev nrog (יהושע)Yahshua nyob. 14 Tiamsis vim lawv pom tus yawg uas zoo ntawd sawv ntsug ntawm nkawv ib sab, lawv thiaj tsis muaj lus cav kiag li lawm. 15 Thaum lawv hais kom nkawv tawm ntawm cov thawj lub rooj sablaj lawm, lawv txawm sablaj tias, 16 Peb yuav ua li cas rau ob tug no? Rau qhov nkawv tau ua ib yam txujci tseem ceeb rau txhua tus uas nyob hauv Yeluxalees paub tseeb, mas peb tsis lees paub kuj tsis tau li. 17 Peb cia li txwv nkawv kom tsis txhob hais abtsi hauv lub npe no xwv zaj no thiaj tsis ncha heev zuj zus mus rau hauv cov pejxeem. 18 Lawv thiaj hu nkawv los thiab txwv kom nkawv tsis txhob hais lossis qhia txog (יהושע)Yahshua lub npe kiag li lawm.

19 Tiamsis Kepha thiab Yahchanan teb lawv tias, nej sim xav saib, nyob ntawm Abba (יחוח)Yahweh xubntiag, tsim nyog mloog nej hais zoo dua li mloog Abba (יחוח)Yahweh hais lov? 20 Rau qhov peb tseg tsis tau qhov uas hais txog tej uas peb pom thiab tej uas peb hnov. 21 Lawv txawm rov txwv tawv tawv rau nkawv dua ces tso nkawv mus lawm. Lawv nrhiav tsis tau txim rau nkawv, vim lawv ntshai cov pejxeem, rau qhov txhua tus qhuas Abba (יחוח)Yahweh, vim yog tej xwm txheej uas tshwm los ntawd. 22 Tus uas mob zoo ntawm txujci tseem ceeb ntawd, hnub nyoog plaub caug tawm xyoo lawm.

​

Cov Ntseeg Thov Kom Muaj Siab loj

  23 Thaum tso Kepha thiab Yahchanan lawm nkawv txawm mus rau hauv cov ntseeg thiab qhia txhua yam uas cov pov thawj hlob thiab cov kev txwj laug hais rau nkawv. 24 Thaum lawv hnov lawm, lawv txawm sawvdaws koom siab tsa suab thov Abba (יחוח)Yahweh hais tias, Au, peb Tus Tswv, koj tsim lub ntuj thiab lub ntiajteb thiab dej hiavtxwv thiab txhua yam uas muaj nyob hauv. 25 Koj kom Tus Ntsuj Plig Dawbhuv siv peb yawg koob Daviv uas yog koj tus tub qhe lub qhov ncauj hais tias, vim li cas, lwm haiv neeg yuav npau taws heev, thiab tej tibneeg ntaus tswvyim phem qhuav qhuav?(NtawvNkauj 2:1-2)

26 Tej vajntxwv hauv lub ntiajteb kuj sawv twv, cov uas ua thawj tuaj txoos ua ke tawm tsam Abba (יחוח)Yahweh thiab nws tus Mes-siah. 27 Qhov tseeb hauv lub nroog no Helauj thiab Phauthi‑aus Philaj thiab lwm haiv neeg thiab cov Ixayees tuaj txoos ua ke tawm tsam (יהושע)Yahshua uas yog koj tus tub uas dawb huv thiab koj tsa cia lawd, 28 kom lawv thiaj ua txhua yam raws li koj txhais tes thiab koj lub siab twb teem tseg lawd.

29 Au Abba (יחוח)Yahweh, nimno thov koj tsa muag saib qhov uas lawv hem, thiab thov pub koj cov tub qhe muaj siab loj hais koj tej lus, 30 rau lub sijhawm uas koj cev koj txhais tes kho mob thiab ua kom tej txujci tseem ceeb thiab txujci phimhwj tshwm los hauv (יהושע)Yahshua uas yog koj tus tub uas dawb huv lub npe. 31 Thaum lawv thov tag, lub chaw uas lawv tuaj txoos ua ke ntawd txawm ua zog kais, mas lawv puv npo Tus Ntsuj Plig Dawbhuv thiab lawv muaj siab loj hais Abba (יחוח)Yahweh tej lus.

​

Muab Txhua Yam Ua Sawvdaws Li

 32 Cov uas los ntseeg ntawd koom ua ib lub siab. Tsis muaj leejtwg yuav hais tias nws tej qhov txhia chaw yog nws li xwb, tiamsis lawv muab txhua yam ua sawvdaws tug. 33 Cov tubtxib hais lus muaj hwjchim loj kawg ua timkhawv txog qhov uas (יהושע)Yahshua Messiah ciaj sawv rov los, thiab Abba (יחוח)Yahweh txojkev hlub nrog nraim lawv txhua tus.

34 Mas lawv cov tsis muaj ib tug tu ncua ib yam abtsi, rau qhov txhua tus uas muaj liaj teb thiab vaj tse kuj muab muag thiab coj tej nyiaj uas muag tau ntawd 35 tuaj tso rau ntawm cov tubtxib kotaw, mas muab faib rau txhua tus raws li uas cheem tsum. 36 Yahseph uas cov tubtxib hu tias Barnabas (uas txhais hais tias, tus tub uas txhawb siab) yog ib tug Levis uas yog tibneeg Cyprus, 

37 nws muaj ib daim teb, nws muab muag thiab coj cov nqe teb ntawd tuaj tso rau ntawm cov tubtxib kotaw.

​