Ananias Thiab Xafilas

1 Muaj ib tug yawg npe hu ua Ananias thiab nws tus pojniam hu ua Xafilas muag nws tej qhov txhia chaw. 2 Mas Ananias qee cov nyiaj ib qho cia, nws tus pojniam kuj paub thiab. Nws coj ib qho tuaj tso rau ntawm cov tubtxib kotaw.

3 Kepha txawm hais tias, Ananias, ua cas Xatas nyob puv nkaus hauv koj lub siab kom dag Tus Ntsuj Plig Dawbhuv es koj thiaj qee cov nqe teb ntawd ib qho cia? 4 Thaum daim teb tseem nyob kuj yeej yog koj li los tsis yog? Thaum muab muag lawd cov nyiaj yeej nyob ntawm koj ceev los tsis yog? Ua cas koj lub siab yuav xav ua li no? Koj tsis tau dag tibneeg tiamsis dag Abba (יחוח)Yahweh.

5 Thaum Ananias hnov tej lus ntawd nws txawm ntog vau hlo tu siav nrho. Txhua tus uas hnov txog zaj ntawd kuj ntshai heev kawg. 6 Cov hluas txawm sawv tsees thiab muab nws lub cev tuag qhwv kwv coj mus faus. 7 Dhau ntawd kwvlam peb teev nws tus pojniam tuaj txog twb tsis paub tej xwm txheej uas tshwm los. 8 Kepha hais rau nws tias, qhia rau kuv saib, neb muag daim teb tau nqe npaum li no xwb lov? Nws teb tias, yog kawg, tau npaum kod xwb. 9 Kepha txawm hais rau nws tias, ua cas neb koom ua ib lub siab sim Abba (יחוח)Yahweh tus Ntsuj Plig? Saib maj, cov uas kwv koj tus txiv mus faus tej kotaw nyob ntawm qhov rooj, mas lawv yuav kwv koj mus faus thiab.

10 Tamsim ntawd nws txawm ntog vau hlo tu siav nrho ntawm Kepha kotaw. Thaum cov hluas los txog lawv pom tias tuag lawm, ces lawv txawm kwv nws lub cev tuag mus faus rau ntawm nws tus txiv ib sab. 11 Ib tsoom ntseeg thiab txhua tus uas tau hnov txog zaj no kuj ntshai kawg li.

​

Cov Tubtxib Kho Ntau Leej Mob Zoo

 12 Muaj ntau yam txujci tseem ceeb thiab txujci phimhwj tshwm ntawm cov tubtxib txhais tes rau hauv nruab nrab cov tibneeg. Cov ntseeg sawvdaws tuaj nyob ua ke rau ntawm Zaj Qab Khav Solomon. 13 Luag lwm tus tsis kav tuaj nrog lawv koom ua ke, tiamsis ib tsoom tibneeg hwm lawv heev. 14 Muaj tibneeg los ntseeg coob tsav ntxiv zuj zus rau cov uas ntseeg Abba (יחוח)Yahweh tsis hais pojniam txivneej. 15 Cov tibneeg kwv tej mob tawm tuaj rau ntawm tej ntug kev thiab muab tso pw rau saum tej txaj thiab tej lev, xwv thaum Kepha taug kev tuaj mus nws tus duab thiaj yuav roos tau lawv qee leej. 16 Tej tibneeg uas nyob hauv tej moos uas nyob ib ncig Yeluxalees kuj tuaj txoos ua ke thiab coj cov tibneeg muaj mob thiab cov tibneeg uas raug dab tuaj, mas lawv txhua tus kuj zoo huvsi.

Cov Tubtxib Raug Tsim Txom

 17 Tus tuam pov thawj hlob thiab txhua tus uas nrog nws ua ke uas yog cov Xadukais txawm khib heev. 18 Lawv thiaj ntes cov tubtxib thiab muab kaw rau hauv nom tswv lub tsev lojfaj.

19 Thaum hmo ntuj Abba (יחוח)Yahweh ib tug tubtxib saum ntuj tuaj qheb qhov rooj hauv tsev lojfaj thiab coj cov tubtxib tawm los thiab hais tias, 20 Nej cia li mus sawv ntsug hauv lub tuam tsev tshaj tawm txhua lo lus hais txog txojsia tshiab no rau cov tibneeg mloog. 21 Thaum cov tubtxib tau hnov li ntawd, ces kaj ntug lawv txawm nkag rau hauv lub tuam tsev thiab qhuab qhia. Thaum tus tuam pov thawj hlob thiab cov uas nrog nws tuaj txog lawv txawm hu cov thawj lub rooj sablaj thiab Ixayees cov kev txwj laug sawvdaws tuaj sablaj, thiab txib tibneeg mus coj cov tubtxib tom lub tsev lojfaj los.

22 Thaum cov tub teg tub taws mus txog, lawv tsis pom cov tubtxib nyob hauv tsev lojfaj, lawv txawm rov los hais tias, 23 Peb pom lub tsev lojfaj tseem kaw qas nrees thiab cov uas zov tseem sawv ntawm qhov rooj, tiamsis thaum peb qheb qhov rooj tsis pom leejtwg nyob hauv li. 24 Thaum tus thawj uas saib lub tuam tsev thiab cov pov thawj hlob hnov tej lus no, kuj tsis pom qab xav txog cov tubtxib tias yuav ua li cas ntxiv mus. 25 Muaj ib tug tuaj hais rau lawv tias, saib maj, cov tibneeg uas nej muab kaw rau hauv lub tsev lojfaj tabtom sawv ntsug qhuab qhia cov pejxeem hauv lub tuam tsev. 26 Tus thawj uas saib lub tuam tsev thiab cov tub teg tub taws kuj mus coj cov tubtxib los, tsis ua nyaum, vim yog ntshai tsam cov pejxeem xuas pob zeb ntaus lawv. 27 Thaum lawv coj cov tubtxib los txog lawd, kuj kom cov tubtxib sawv tab meeg ntawm cov thawj lub rooj sablaj ntawd. Tus tuam pov thawj hlob txawm nug lawv 28 hais tias, peb twb txwv nej tawv tawv hais tias tsis txhob qhuab qhia abtsi hauv lub npe ntawd, los nej tej lus qhia twb ncha mus thoob plaws hauv Yeluxalees lawm thiab nej tseem xav muab tus ntawd cov ntshav nog rau peb ris thiab. 29 Kepha thiab cov tubtxib teb tias, peb yuav tsum mloog Abba (יחוח)Yahweh lus heev dua li mloog tibneeg lus.

30 (יהושע)Yahshua uas nej muab dai tuag rau saum tus ntoo ntawd, peb tej poj koob yawm txwv Tus Tswv uas yog Abba (יחוח)Yahweh twb muab tsa ciaj sawv rov los lawm. 31 Abba (יחוח)Yahweh tsa nws nyob ntawm Abba (יחוח)Yahweh sab tes xis ua tus thawj coj thiab ua tus Cawmseej kom thiaj pub tau kev ntxeev dua siab tshiab thiab kev zam txim rau cov Ixayees. 32 Peb ua timkhawv txog zaj no, thiab Tus Ntsuj Plig Dawbhuv uas Abba (יחוח)Yahweh pub rau cov uas mloog Abba (יחוח)Yahweh lus kuj ua timk-hawv thiab. 33 Thaum lawv hnov li ntawd lawm, lawv npau taws heev xav muab cov tubtxib tua pov tseg.

34 Tiamsis muaj ib tug npe hu ua Kam-ali‑ees nyob hauv lub rooj sablaj ntawd, nws yog ib tug Falixais thiab yog ib tug xibhwb qhia Abba (יחוח)Yahweh txoj kevcai thiab yog ib tug uas cov pejxeem sawvdaws hwm. Nws txawm sawv tsees hais kom coj cov tubtxib tawm mus sab nraud ib pliag. 35 Nws hais rau lub rooj sablaj tias, nej cov Ixayees, cia li ceev faj zoo rau tej uas nej yuav ua rau cov tibneeg no. 36 Rau qhov ua ntej no muaj ib tug npe hu ua Thudas uas khav tias nws yog tibneeg loj. Muaj kwvlam plaub puas leej tuaj nws tog. Tiamsis nws raug tua lawm thiab txhua tus uas tuaj nws tog kuj tawg ua sab ua sua ploj tag lawm. 37 Dhau tus ntawd kuj muaj dua ib tug npe hu ua Yahdah uas yog tibneeg Kalilais tshwm los rau ncua sijhawm uas txheeb npe. Nws haub ntxias tibneeg tuaj nws tog los nws kuj puam tsuaj lawm. Cov tibneeg uas tuaj nws tog kuj tawg ua sab ua sua tag. 38 Vim li no, zaum no kuv hais rau nej tias, tsis txhob ua li cas rau lawv cov no, cia li tso lawv mus. Yog tias tej tswvyim uas lawv xav thiab tej haujlwm uas lawv ua no los ntawm tibneeg los mas yuav tsis tiav. 39 Tiamsis yog los ntawm Abba (יחוח)Yahweh los, nej yuav muab rhuav tshem tsis tau li, ntshai tsam yog nej tawm tsam Abba (יחוח)Yahweh. 40 Lawv kuj mloog Kamali‑ees hais. Lawv txawm hu cov tubtxib rov los mas muab nplawm thiab txwv lawv tsis txhob hais abtsi hauv (יהושע)Yahshua lub npe ces txawm tso lawv mus. 41 Cov tubtxib txawm tawm ntawm cov thawj lub rooj sablaj mus zoo siab heev rau qhov Abba (יחוח)Yahweh suav tias lawv yog cov tibneeg tsim txiaj uas yuav poob koob meej vim yog (יהושע)Yahshua lub npe.

42 Lawv niaj hnub qhuab qhia thiab tshaj tawm tias (יהושע)Yahshua yog tus Messiah tsis tso tseg li tsis hais hauv lub tuam tsev thiab hauv lawv tej tsev.