1 Sha-ul kuj pom zoo qhov uas tua Xatefanaus.

Sha-ul tsim txom cov ntseeg

Thaum ntawd, pawg ntseeg uas nyob hauv lub nroog Yeluxalees raug kev tsim txom heev. Lawv thiaj li khiav tawg ua sab ua sua mus thoob plaws lub xeev Yahdah thiab lub xeev Xamalis tsuas yog tseg cov tubtxib nyob xwb. 2 Cov uas hwm Abba (יחוח)Yahweh kuj muab Xatefanaus faus thiab quaj mob siab nws kawg. 3 Sha-ul rhuav tshem cov pawg ntseeg heev, nws nkag mus chua cab cov pojniam txivneej hauv lawv tej tsev coj mus kaw rau hauv tsev lojfaj.

​

Tshaj Tawm Txoj Hmoo Zoo Rau Hauv Xamalis

 4 Cov uas khiav tawg ua sab ua sua kuj mus qhia txoj hmoo zoo rau txhua qhov.

5 Philip thiaj mus rau hauv ib lub moos uas nyob hauv lub xeev Xamalis, thiab tshaj tawm txog tus Messiah rau lawv mloog. 6 Thaum cov tibneeg hnov Philip hais thiab pom tej txujci tseem ceeb uas nws ua, lawv sawvdaws kub siab mloog nws tej lus, 7 rau qhov dab qw nrov tawm hauv ntau leej mus, thiab ntau leej uas tuag cev tuag tes tuag taw kuj zoo kiag.

8 Lub moos ntawd thiaj xyiv fab kawg. 9 Muaj ib tug yawg hu ua Simon txeev ua khaws koob yees siv hauv lub moos ntawd. Nws ua rau cov tibneeg Xamalis phimhwj, thiab nws khav tias nws yog ib tug tseem ceeb.

10 Cov tibneeg sawvdaws tus hlob tus yau kub siab mloog tus ntawd hais thiab lawv hais tias, tus no yog Abba (יחוח)Yahweh lub hwjchim uas hu ua lub hwjchim loj kawg nkaus. 11 Lawv kub siab mloog nws rau qhov nws ua khaws koob yees siv rau lawv phimhwj ntev los lawm. 12 Tiamsis thaum Philip qhia txoj hmoo zoo hais txog Abba (יחוח)Yahweh lub tebchaws thiab (יהושע)Yahshua Messiah lub npe, mas lawv kuj ntseeg Philip tej lus thiab lawv cov pojniam txivneej ua kevcai raus dej. 13 Simon kuj ntseeg thiab thaum nws ua kevcai raus dej lawm nws kuj nrog Philip nyob ntxiv mus. Thaum nws pom tej txujci tseem ceeb thiab tej kev phimhwj uas Philip ua nws xav tsis thoob li. 14 Thaum cov tubtxib uas nyob hauv Yeluxalees tau hnov tias cov Xamalis kuj txais yuav Abba (יחוח)Yahweh tej lus lawm, lawv txawm txib Kepha thiab Yahchanan mus cuag cov Xamalis.

15 Thaum nkawv tuaj txog, nkawv thov Abba (יחוח)Yahweh pab kom lawv txais tau Tus Ntsuj Plig Dawbhuv, 16 rau qhov Tus Ntsuj Plig tsis tau los rau hauv lawv leejtwg li, lawv tsuas yog ua kevcai raus dej hauv (יהושע)Yahshua Messiah lub npe xwb. 17 Nkawv txawm tsa tes npuab rau saum lawv, mas lawv kuj tau txais Tus Ntsuj Plig Dawbhuv.

18 Thaum Simon pom tias qhov uas ob tug tubtxib tsa tes npuab pub tau Tus Ntsuj Plig rau lawv, ces nws txawm nqa nyiaj tuaj rau nkawv, 19 hais tias, thov pub lub hwjchim no rau kuv thiab xwv thaum kuv tsa tes npuab leejtwg tus ntawd thiaj tau txais Tus Ntsuj Plig Dawbhuv.

20 Kepha txawm hais rau Simon tias, cia koj cov nyiaj thiab koj tus kheej raug puam tsuaj ua ke, rau qhov koj xav tias tej uas Abba (יחוח)Yahweh pub no koj tshwm nyiaj yuav tau. 21 Koj tsis muaj feem abtsi koom tes haujlwm no rau qhov koj lub siab tsis ncaj rau Abba (יחוח)Yahweh. 22 Vim li no, koj cia li ntxeev dua siab ntawm koj txojkev phem no thiab thov Abba (יחוח)Yahweh saib, tej zaum nws yuav zam tej uas koj xav hauv koj lub siab, 23 rau qhov kuv pom tias koj poob rau hauv kev khib siab, thiab txojkev phem muab koj khi lawm.

24 Simon txawm teb hais tias, thov koj, thov Abba (יחוח)Yahweh pab kuv kom tej uas koj hais ntawd thiaj tsis raug kuv ib yam kiag li. 25 Thaum ob tug tubtxib ua timkhawv thiab qhia Abba (יחוח)Yahweh tej lus tag lawm, nkawv txawm rov mus rau Yeluxalees, nkawv qhia txoj hmoo zoo hauv Xamalis ntau lub zos taug kev mus.

Philip Thiab Tus Nraug Sam Ethi‑aupias

 26 Abba (יחוח)Yahweh ib tug tubtxib saum ntuj hais rau Philip tias, cia li sawv tsees mus rau nram qabteb, mus taug txojkev uas mus hauv lub nroog Yeluxalees mus rau nram lub moos Kaxas. (Yog txojkev uas hla tebchaws moj sab qhua.) 

27 Philip txawm sawv tsees mus, ua ciav ntsib ib tug yawg nraug sam uas yog tibneeg Ethi‑aupias, yog cov Ethi‑aupias tus poj vaj Khadakes tus tim xyoob uas saib xyuas tus poj vaj lub txhab nyiaj huvsi. Nws mus pe Abba (יחוח)Yahweh hauv Yeluxalees los. 28 Thaum nws caij tsheb nees rov qab, nws tabtom nyeem xibhwb Isayah uas cev Abba (יחוח)Yahweh lus phau ntawv. 29 Tus Ntsuj Plig txawm hais rau Philip tias, cia li mus ti nkaus lub tsheb ntawd. 30 Philip txawm khiav mus txog mas hnov nws nyeem xibhwb Isayah uas cev Abba (יחוח)Yahweh lus phau ntawv, thiaj nug tias, koj nkag siab tej uas koj nyeem los tsis nkag? 

31 Tus nraug sam teb tias, yog tsis muaj leejtwg txhais yuav ua li cas nkag siab tau? Nws txawm hu Philip nce nrog nws caij saum lub tsheb nees.

32 Abba (יחוח)Yahweh txojlus uas nws nyeem ntawd yog nqe uas hais tias, nws raug coj mus tua ib yam li tus yaj, thiab ib yam li tus menyuam yaj nyob twjywm ntawm tus uas txiav plaub xubntiag li cas, nws kuj tsis rua ncauj ib yam li ntawd.

 33 Thaum nws raug luag saib tsis taus nws tsis tau txais kev txiav txim ncaj. Leejtwg yuav hais tau txog nws caj ces?

Rau qhov nws txojsia twb raug muab rho hauv lub ntiajteb lawm. (Isayah 53:7-8)

34 Tus nraug sam hais rau Philip tias, Thov koj qhia kuv saib, qhov uas tus xibhwb cev lus hais no yog nws hais txog nws tus kheej los yog hais txog lwm tus? 

35 Philip thiaj qheb ncauj pib qhia txog ntawm Abba (יחוח)Yahweh txojlus nqes ntawd mus, nws qhia txoj hmoo zoo hais txog (יהושע)Yahshua rau tus nraug sam mloog.

36 Thaum tabtom taug kev mus nkawv txawm mus txog ib qho chaw uas muaj dej, mas tus nraug sam txawm hais tias, saib maj, ntawm no muaj dej. Muaj abtsi khuam cheem ua rau kuv ua tsis tau kevcai raus dej? 

 

[ 37 Philip hais rau tus nraug sam ntawd hais tias, yog koj ntseeg tiag tiag, kuv muab koj ua kevcai raus dej ntawm no los tau. Tus nraug sam ntawd teb hais tias, kuv ntseeg hais tias (יהושע)Yahshua Messiah yog Abba Yaweh tus Tub.] 

 

38 Ces nws txawm kom lub tsheb nees nres, mas Philip thiab tus nraug sam nqes rau hauv dej thiab Philip muab nws ua kevcai raus dej.

39 Thaum nkawv nce hauv dej los Abba (יחוח)Yahweh tus Ntsuj Plig txawm coj Philip mus lawm.

Tus nraug sam cia li tsis pom Philip lawm, tiamsis nws kuj taug kev mus zoo siab xyiv fab hlo. 40 Philip tshwm rau hauv lub moos Axautha thiab thaum nws taug kev mus nws qhia txoj hmoo zoo rau txhua lub moos mus txog thaum nws tuaj txog lub moos Xixalias.

​