(יחוח)Yahweh Pub Nqaij Rau Lawv Noj

1 Cov pejxeem yws lawv tej kev txom nyem rau (יחוח)Yahweh hnov.

Thaum (יחוח)Yahweh hnov lawm, nws txoj kev npau taws kuj tshwm plaws rau lawv, (יחוח)Yahweh li hluavtaws los kub hauv lawv nruab nrab thiab hlawv lawv lub ntug zos kub nyhiab ib txhia lawm. 

2 Mas cov pejxeem quaj thov Mauxes, Mauxes thiaj thov (יחוח)Yahweh mas hluav taws thiaj tuag.

3 Lawv thiaj muab lub chaw ntawd hu ua Thanpelas, vim yog (יחוח)Yahweh li hluavtaws los kub hauv lawv nruab nrab.

4 Lwm haiv neeg uas nrog lawv los nqhis nqaij heev thiab cov Ixayees los quaj quaj yws tias, xav tau nqaij noj kawg li.

5 Peb nco txog tej ntses uas peb tau noj tim Iziv tebchaws tsis txog yuav li, thiab nco txog tej dib, tej taub, tej dos raj, dos ntug, thiab qej.

6 Nimno peb qaug zog tag lawm thiab tsis muaj abtsi rau peb saib, tsuas yog cov manas no xwb.

7 Cov manas zoo yam li noob zaub txhwb qaib thiab saib zoo li roj ntoos tsw qab.

8 Cov pejxeem mus khaws los zom lossis muab tuav hauv tais thiab muab rau hauv laujkaub hau ua ncuav, qab yam li ncuav kib roj.

9 Thaum tsaus ntuj los lwg rau hauv lub zos, cov manas kuj poob los thiab.

10 Mauxes hnov cov pejxeem quaj thoob plaws txhua yim, nyias nyob ntawm nyias lub qhov rooj tsev ntaub. (יחוח)Yahweh npau taws vog, Mauxes kuj nyuaj siab heev.   

11 Mauxes thiaj hais rau (יחוח)Yahweh tias, ua cas koj ua rau koj tus tub qhe raug ceeblaj li no? Ua cas koj tsis txaus siab rau kuv es muab cov tibneeg no huvsi rau kuv ib leeg ris?

12 Kuv xeeb cov tibneeg no rau hauv kuv lub plab lov? Kuv yug lawv los lov? Koj thiaj hais rau kuv tias, muab lawv puag rau hauv koj xubntiag ib yam li tus nkauj qhev puag tus menyuam mos liab, coj los rau hauv lub tebchaws uas (יחוח)Yahweh cog lus ruaj tias yuav pub rau lawv tej poj koob yawm txwv. 

13 Kuv yuav muab nqaij qhovtwg los pub rau cov tibneeg no sawvdaws noj? Lawv quaj rau kuv tias, thov muab nqaij rau peb noj.

14 Kuv ib leeg tsis muaj peevxwm ris tau cov tibneeg no sawvdaws, yog lub nra uas nyhav dhau kuv.

15 Yog koj yuav ua li no rau kuv, yog kuv txaus koj lub siab lawm, thov koj cia li muab kuv tua tamsim no kom kuv thiaj tsis pom kuv txojkev txom nyem nyuaj siab. 

16 Mas (יחוח)Yahweh hais rau Mauxes tias, cia li sau zog Ixayees cov kev txwj laug xya caum leej uas koj paub tias yog cov pejxeem cov thawj thiab cov uas kav lawv, mas coj lawv tuaj rau ntawm lub qhov rooj tsev ntaub sib ntsib thiab cia lawv nrog koj sawv ua ke rau qhov ntawd. 

17 Kuv yuav nqis los nrog koj sib tham qhov ntawd thiab kuv yuav faib ntsuj plig uas nyob saum koj mus tso rau saum lawv, mas lawv yuav nrog koj ris cov tibneeg no xwv koj thiaj tsis tau ris ib leeg xwb.   

18 Thiab hais rau cov pejxeem tias, nej cia li tu nej kom dawb huv rau tagkis, nej yuav tau nqaij noj, rau qhov nej tau quaj rau (יחוח)Yahweh hnov hais tias, xav tau nqaij noj kawg li.  Peb tau noj qab nyob zoo heev dua li no hauv Iziv tebchaws.  Vim li no (יחוח)Yahweh yuav pub nqaij rau nej mas nej yuav tau noj.   

19 Nej yuav tsis noj ib hnub los ob hnub los tsib hnub los kaum hnub los nees nkaum hnub xwb,

20 tiamsis nej yuav tau noj ib hlis txwm nkaus mus txog nqaij tawm hauv nej qhov ntswg los thiab nej dhuav kiag cov nqaij ntawd, rau qhov nej tau tso (יחוח)Yahweh tseg thiab quaj rau nws tias, ua cas peb tawm hauv Iziv tebchaws los lawm?

21 Mas Mauxes hais tias, cov tibneeg uas kuv nrog nyob no muaj 600,000 leej txivneej es koj hais tias koj yuav muab nqaij rau lawv noj kom txwm ib lub hlis.  22 Yuav muab tej pab yaj, pab tshis, paj nyuj, tua txaus lawv noj lov? Lossis yuav sau zog tej ntses tag nrho hauv hiavtxwv los txaus rau lawv noj lov?

23 (יחוח)Yahweh hais rau Mauxes tias, (יחוח)Yahweh txhais tes luv dhau lawm lov? Nimno koj yuav pom tias kuv tej lus yuav tiav rau koj los tsis tiav.    

24 Mauxes thiaj tawm mus hais (יחוח)Yahweh tej lus rau cov pejxeem, thiab nws sau tau xya caum leej kev txwj laug hauv cov pej xeem, tsa lawv los sawv vij lub tsev ntaub.   

25 Mas (יחוח)Yahweh nqis hauv tauv huab los hais rau Mauxes thiab faib ntsuj plig uas nyob saum Mauxes mus tso rau saum xya caum leej kev txwj laug ntawd. Thaum ntsuj plig nyob saum lawv lawm, lawv txawm cev (יחוח)Yahweh lus, tiamsis lawv tsis rov cev dua li lawm.

26 Tseem tshuav nkawv nyob hauv lub zos, ib tug yog Eedas thiab ib tug yog Medas, ntsuj plig kuj los rau saum nkawv.  Nkawv twb sau npe cia lawm uas tsis tau tuaj rau ntawm lub tsev ntaub, nkawv cia li cev (יחוח)Yahweh lus rau hauv lub zos.

27 Muaj ib tug hluas khiav tuaj hais rau Mauxes tias, Eedas thiab Medas tab tom cev (יחוח)Yahweh lus rau hauv lub zos.    

28 Mas Yahshua uas yog Noos tus tub uas ua tus pab Mauxes txij thaum hluas los, hais rau Mauxes tias, kuv tus tswv Mauxes, cia li txwv nkawv los maj.

29 Tiamsis Mauxes hais rau nws tias, koj mob siab vim yog saib rau kuv lov? Kuv xav kom (יחוח)Yahweh haiv neeg txhua tus cev (יחוח)Yahweh lus thiab xav kom (יחוח)Yahweh tso ntsuj plig rau saum lawv.

30 Mauxes thiab Ixayees cov kev txwj laug txawm rov mus rau hauv lub zos. 

31 Ces (יחוח)Yahweh txawm tso cua ntsawj hauv hiavtxwv xa noog ws tuaj poob rau ib ncig lawv lub zos txhua fab, ib fab mus deb ib hnub ke thiab poob siab rau saum npoo av tuab li ob tshim. 

32 Hnub ntawd cov pejxeem mus khaws noog ws ib hnub ib hmos thiab hnub tom qab ib hnub. Tus uas khaws tau tsawg kawg mas khaws tau kaum haumaws.  Lawv coj los ziab thoob plaws hauv lub zos. 

33 Thaum tej nqaij ntawd tseem nyob hauv lawv qhov ncauj thiab noj tsis tau tag, (יחוח)Yahweh txojkev chim tshwm plaws rau cov pejxeem, (יחוח)Yahweh thiaj tso mob phem loj tua lawv.

34 Lawv thiaj hu lub chaw ntawd ua Khilaus Hata‑avas rau qhov lawv faus cov tibneeg uas nqhis nqaij tuag rau qhov ntawd. 

35 Cov pejxeem tshais chaw ntawm Khilaus Hata‑avas mus txog Haxelaus, thiab tsuam chaw nyob ntawm Haxelaus.