Xa Kaum Ob Leeg Mus Tshuaj Khana‑as Tebchaws

1 (יחוח)Yahweh hais rau Mauxes tias,

2 cia li xa tibneeg mus tshuaj saib Khana‑as tebchaws uas kuv pub rau cov Ixayees. Cia li xa txhua xeem, ib xeem ib leeg, txhua tus yog ua thawj hauv nws xeem. 

3 Mauxes thiaj txib lawv tawm hauv teb chaws moj sab qhua Palas mus raws li (יחוח)Yahweh hais, txhua tus yog ua thawj hauv cov Ixayees. 

4 Ntawm no mus yog lawv cov ntawd li npe. Xeem Lunpees yog Samu‑as uas yog Xakaws tus tub,

5 xeem Xime‑oos yog Haulis tus tub Safas,

6 xeem Yahdah yog Yefunes tus tub Khalej,

7 xeem Ixakhas yog Ikas uas yog Yahxej tus tub,

8 xeem Efas‑is yog Noos tus tub Hause‑as,

9 xeem Npeeya-mees yog Lafus tus tub Patis,

10 xeem Xe-npuloos yog Xaudis tus tub Kadi‑ees,

11 xeem Yahxej uas yog xeem Manaxes yog Xuxis tus tub Kadis,

12 xeem Daj yog Kemalis tus tub Ami‑ees,

13 xeem Asaws yog Mikha‑ese tus tub Xethus,

14 xeem Nathalis yog Vauxis tus tub Nanpis,

15 xeem Nkas yog Makhis tus tub Ke‑u‑ees.

16 Cov npe no yog cov tibneeg uas Mauxes txib mus tshuaj tebchaws.  Mauxes tis npe rau Hause‑as uas yog Noos tus tub hu ua Yahshua.

17 Mauxes txib lawv mus tshuaj Khana‑as tebchaws thiab hais rau lawv tias, cia li mus pem Nekes thiab nce mus rau pem toj siab,

18 mus tshuaj saib lub tebchaws ntawd zoo li cas thiab saib cov tibneeg hauv lub tebchaws ntawd muaj zog los tsis muaj, muaj tibneeg coob los tsawg,

19 thiab saib lub teb chaws uas lawv nyob ntawd zoo los phem, thiab saib lawv tej chaw nyob yog ua zej zog los yog ua moos muaj ntsa loog ruaj khov,

20 thiab saib lub tebchaws zoo qoob loo los tsis zoo, thiab muaj xyoob ntoo los tsis muaj. Nej cia li ua siab tuab thiab coj tej txiv ntoo hauv lub tebchaws ntawd ib txhia los. Lub sijhawm ntawd yog lub caij uas thawj phaum txiv hmab siav.

21 Lawv thiaj nce mus tshuaj tebchaws txij ntua ntawm tebchaws moj sab qhua Xees mus txog lub moos Lehaus uas nyob ze txojkev uas mus rau lub moos Hamas. 

22 Lawv nce mus txog Nekes thiab mus txog lub moos Henploos. Ahimas thiab Sesais thiab Thamais uas yog Anaj cov caj ces nyob qhov ntawd. Lub moos Henploos no luag rhawv ua ntej lub moos Xau‑as hauv Iziv tebchaws xya xyoo.

23 Lawv txawm mus txog lub hav Ekhaus mas lawv txiav ib ceg txiv hmab uas muaj ib tauv txiv qhov ntawd, muab las ntxig rau ob leeg kwv los.  Lawv coj txiv ntsiav kws thiab txiv cev ib txhia los.

24 Lub chaw ntawd raug muab hu ua lub hav Ekhaus, vim cov Ixayees txiav tauv txiv hmab qhov ntawd los.

25 Lawv mus tshuaj lub tebchaws tau plaub caug hnub li rov qab los.

26 Lawv los txog ntawm Mauxes thiab Aloos thiab ib tsoom Ixayees sawvdaws hauv tebchaws moj sab qhua Palas ntawm lub moos Khades. Lawv piav rau nkawv thiab cov pejxeem sawvdaws mloog thiab muab tej txiv ntoo hauv lub tebchaws ntawd rau lawv saib. 

27 Lawv hais rau Mauxes tias, peb mus txog lub tebchaws uas koj txib peb mus, muaj kua mis thiab zib ntab ntws nto thiab no yog tej txiv ntoo hauv lub tebchaws ntawd. 

28 Tiamsis cov tibneeg hauv lub tebchaws ntawd muaj zog heev thiab lawv tej moos kuj loj thiab muaj ntsa loog ruaj khov. Dua li ntawd, peb kuj pom Anaj tej caj ces nyob qhov ntawd. 

29 Cov Amalej nyob rau hauv Nekes teb chaws, cov Hithais, cov Yenpus thiab cov Amaulais nyob pem toj siab. Cov Khana‑as nyob npuas ntug hiavtxwv thiab raws ntug dej Yaladees.

30 Tiamsis Khalej kom cov pejxeem nyob twjywm rau ntawm Mauxes xubntiag thiab hais tias, peb cia li nce mus txeeb tebchaws tamsim no, rau qhov peb yeej muaj peevxwm kov yeej tau. 

31 Tiamsis cov txivneej uas nrog Khalej mus ntawd hais tias, peb tsis muaj peevxwm ntaus yeej cov tibneeg ntawd, rau qhov lawv muaj zog heev dua peb.

32 Ces lawv txawm hais tsis zoo txog lub tebchaws uas lawv mus tshuaj ntawd rau cov Ixayees mloog hais tias, lub tebchaws uas peb mus tshuaj thoob plaws ntawd yog niag tebchaws noj cov tibneeg uas nyob hauv. Cov tibneeg uas peb pom ntawd sawvdaws puavleej siab heev.

33 Peb pom cov Nefilis kuj nyob qhov ntawd, cov tibneeg Anaj yog tshwm ntawm cov Nefilis los.  Peb saib mas peb zoo yam nkaus li tej nyuag kooj xwb, lawv kuj pom peb zoo li ntawd thiab.