Cov Pejxeem Fav Xeeb Rau (יחוח)Yahweh

1 Ces ib tsoom pejxeem txawm tsa suab qw nrov nrov, thiab hmo ntawd cov pejxeem quaj ib hmos.

2 Cov Ixayees sawvdaws yws yws Mauxes thiab Aloos.  Ib tsoom pejxeem sawvdaws hais rau nkawv tias, peb tuag rau hauv Iziv tebchaws lossis tuag hauv tebchaws moj sab qhua no kuj zoo dua.

3 Ua cas (יחוח)Yahweh coj peb los tuag hniav ntaj hniav riam rau hauv lub tebchaws no? Peb tej pojniam menyuam yuav poob ua luag li.  Peb rov mus rau Iziv tebchaws zoo dua lauj.

4 Lawv ib leeg hais rau ib leeg tias, cia peb xaiv ib tug ua thawj es rov qab mus rau Iziv tebchaws lauj.

5 Mauxes thiab Aloos cia li khwb nkaus ua lub plhu ti nkaus hauv av tab meeg cov Ixayees sawvdaws uas tuaj txoos ua ke. 

6 Mas Yahshua uas yog Noos tus tub thiab Khalej uas yog Yefunes tus tub uas nrog lawv mus tshuaj lub tebchaws ntawd txawm dua rhe nkawv lub tsho,

7 thiab hais rau ib tsoom Ixayees sawvdaws tias, lub tebchaws uas peb mus tshuaj saib thoob plaws ntawd yog lub tebchaws uas zoo heev. 

8 Yog (יחוח)Yahweh txaus siab rau peb, nws yuav coj peb mus rau hauv lub tebchaws ntawd thiab muab pub rau peb, yog lub tebchaws uas muaj kua mis thiab zib ntab ntws nto.

9 Tsuav yog nej tsis txhob ntxeev siab rau (יחוח)Yahweh xwb, tsis txhob ntshai cov tibneeg hauv lub tebchaws ntawd, rau qhov lawv yog peb tej kua zaub. Lub hwj chim uas tsom kwm lawv twb raug muab rho lawm, (יחוח)Yahweh nrog nraim peb mas tsis txhob ntshai lawv li.   

10 Tiamsis ib tsoom pejxeem sawvdaws hais zom zaws kom xuas pob zeb ntaus nkawv.  Tamsim ntawd, (יחוח)Yahweh lub hwjchim ci ntsa iab los tshwm rau ntawm lub tsev ntaub sib ntsib tab meeg cov Ixayees sawv daws. 

11 (יחוח)Yahweh hais rau Mauxes tias, cov tibneeg no yuav saib tsis taus kuv ntev li cas? Txawm yog kuv twb ua txujci tseem ceeb ntau heev tshwm rau hauv lawv nruab nrab lawm los, lawv tseem yuav tsis ntseeg kuv mus ntev li cas?

12 Kuv yuav tso mob kis los tua lawv thiab tsis pub lawv tau kuv li qub txeeg qub teg, tiamsis kuv yuav tsa koj ua ib haiv neeg loj thiab muaj zog heev dua lawv. 

13 Tiamsis Mauxes hais rau (יחוח)Yahweh tias, cov Iziv yuav hnov tej no rau qhov koj lub hwjchim twb coj haiv neeg no tawm hauv lawv nruab nrab los,

14 mas cov Iziv yuav piav tej no rau cov tibneeg uas nyob hauv lub tebchaws no paub.  Au (יחוח)Yahweh, lawv yeej hnov tias koj nrog nraim haiv neeg no.  Au (יחוח)Yahweh, lawv hnov tias muaj tib neeg pom koj tim ntsej tim muag, thiab koj tauv huab nyob saum cov Ixayees thiab nruab hnub koj nyob hauv ncej huab, hmo ntuj koj nyob hauv ncej hluavtaws mus ua lawv ntej. 

15 Nimno yog koj ua tib zaug tua haiv neeg no tuag tag nrho, tej tebchaws uas tau hnov koj lub moo yuav hais tias,

16 twb yog (יחוח)Yahweh coj tsis tau haiv neeg no mus txog lub tebchaws uas nws cog lus ruaj, tias nws yuav muab rau lawv, nws thiaj muab lawv tua pov tseg tag rau hauv tebchaws moj sab qhua. 

17 Nimno kuv thov koj, cia (יחוח)Yahweh lub hwjchim loj tshwm los yam li uas koj tau cog lus cia tias,

18 (יחוח)Yahweh tsis chim sai, nws txojkev hlub uas ruaj khov muaj nplua mias, nws zam txim rau tej kev ua phem, ua qias, thiab kev ntxeev siab, tiamsis nws kuj tsis suav tias tsis txhaum, nws yuav rau leej txiv lub txim poob mus rau cov tub ki peb plaub tiam. 

19 Kuv thov koj zam txim rau haiv neeg no, raws li koj txojkev hlub ruaj khov uas loj kawg thiab ib yam li koj twb zam txim rau haiv neeg no hauv Iziv tebchaws los txog niaj hnub nimno. 

20 Mas (יחוח)Yahweh teb tias, kuv twb zam txim raws li koj tej lus thov lawm. 

21 Kuv hais tseeb, kuv yeej muaj txojsia nyob thiab (יחוח)Yahweh lub hwjchim ci ntsa iab yeej yuav puv nkaus lub ntiajteb,

22 mas cov tibneeg uas twb pom kuv lub hwjchim ci ntsa iab thiab tej txujci tseem ceeb uas kuv tau ua hauv Iziv tebchaws thiab hauv tebchaws moj sab qhua los tseem sim kuv kaum zaus li no thiab tsis mloog kuv lus,

23 mas yuav tsis muaj ib tug pom lub tebchaws uas kuv cog lus ruaj tias yuav muab pub rau lawv tej poj koob yawm txwv, thiab cov uas saib tsis taus kuv, yuav tsis muaj ib tug pom lub tebchaws ntawd kiag li.

24 Tiamsis kuv tus tub qhe Khalej, mas vim nws lub siab tsis thooj li lwm tus thiab nws npuab kuv kawg siab kawg ntsws, kuv yuav coj nws mus txog lub tebchaws uas nws twb mus los lawm, thiab nws caj ces yuav tau lub tebchaws ntawd ua lawv tug.

25 Vim cov Amalej thiab cov Khana‑as nyob hauv tej hav hauv lub tebchaws ntawd, mas tagkis nej cia li tig hlo rov mus rau tebchaws moj sab qhua, taug kev mus kom txog Hiavtxwv Liab. 

 

(יחוח)Yahweh Rau Txim Rau Cov Pejxeem

26 (יחוח)Yahweh hais rau Mauxes thiab Aloos tias,

27 haiv neeg phem no yuav yws kuv mus ntev li cas? Kuv twb hnov tej lus uas cov Ixayees yws, yog lawv yws kuv ntag. 

28 Koj cia li hais rau lawv tias, (יחוח)Yahweh hais tias, kuv yeej muaj txojsia nyob, tej uas kuv hnov nej hais, kuv yuav ua rau nej. 

29 Nej tej cev tuag yuav poob tag rau hauv tebchaws moj sab qhua no.  Nej cov tibneeg sawvdaws uas muaj nees nkaum xyoo rov saud uas tau yws kuv,

30 tsis muaj ib tug yuav mus txog lub tebchaws uas kuv cog lus ruaj tias yuav pub rau nej nyob, tsuas yog Khalej uas yog Yefunes tus tub thiab Yahshua uas yog Noos tus tub thiaj mus txog xwb.

31 Nej cov menyuam yaus uas nej hais tias, yuav poob ua luag li, kuv yuav coj lawv los txog hauv lub tebchaws thiab lawv yuav paub lub tebchaws uas nej saib tsis taus ntawd.

32 Tiamsis nej mas nej tej cev tuag yuav poob rau hauv tebchaws mooj sab qhua no.

33 Nej cov menyuam yuav yug tsiaj hauv tebchaws moj sab qhua plaub caug xyoo thiab lawv yuav raug txom nyem, vim yog tim qhov uas nej tso kuv tseg, mus txog thaum nej tej cev tuag nyob txim rau hauv tebchaws moj sab qhua no. 

34 Npaum li lub sijhawm uas nej mus tshuaj lub tebchaws tau plaub caug hnub ntawd, nej yuav ris nej lub txim plaub caug xyoo, ib hnub ua ib xyoos, thiab nej yuav paub tias kuv tsis txaus siab rau nej.

35 Kuv yog (יחוח)Yahweh tau hais cia li no. Kuv yeej yuav ua raws li no rau haiv neeg phem sawvdaws uas tuaj txoos ua ke koom siab tawm tsam kuv no. Lawv yuav ploj tag rau hauv tebchaws moj sab qhua no, lawv yuav tuag tag rau qhov ntawd. 

36 Cov tibneeg uas Mauxes txib mus tshuaj tebchaws, yog cov uas rov los hais phem txog lub tebchaws ntawd ua rau ib tsoom pejxeem yws Mauxes,

37 mas cov tibneeg uas hais phem txog lub tebchaws ntawd raug mob phem tuag tag rau ntawm (יחוח)Yahweh xub ntiag.   

38 Tiamsis Yahshua uas yog Noos tus tub thiab Khalej uas yog Yefunes tus tub uas nrog lawv ua ib pab mus tshuaj tebchaws ntawd, tsis tuag. 

39 Mauxes hais tej lus no rau cov Ixayees sawvdaws mloog, mas cov pejxeem nyuaj siab thiab quaj heev kawg li. 

40 Mas lawv sawv ntxov tsees nce mus rau pem toj siab hais tias, saib maj, peb nyob no lawm, peb yuav nce mus rau lub chaw uas (יחוח)Yahweh cog lus cia, rau qhov peb tau ua txhaum lawm.

41 Tiamsis Mauxes hais tias, ua cas nej tsis ua raws li (יחוח)Yahweh hais? Qhov uas nej ua yuav tsis tiav.

42 Tsis txhob nce mus tsam ces nej yuav tuag tag rau ntawm yeeb ncuab xubntiag, rau qhov (יחוח)Yahweh tsis nrog nraim nej.

43 Cov Amalej thiab cov Khana‑as nyob ntawm nej hauv ntej, nej yuav tuag tag rau lawv hniav ntaj hniav riam. Vim nej tso (יחוח)Yahweh tseg, (יחוח)Yahweh yuav tsis nrog nraim nej lawm.

44 Txawm yog (יחוח)Yahweh lub phij xab sib cog lus thiab Mauxes tsis tawm hauv lub zos mus los lawv tseem yuam qhe nce mus pem toj siab. 

45 Cov Amalej thiab cov Khana‑as uas nyob pem toj siab nqis los ntaus yeej lawv thiab muab lawv ntiab mus txog lub moos Haumas.