Kevcai Xyeem Qhov Txhia Chaw

1 (יחוח)Yahweh hais rau Mauxes tias,

2 koj cia li hais rau cov Ixayees tias, thaum nej txeem rau hauv lub tebchaws uas nej yuav nyob ntawd uas kuv pub rau nej,

3 mas yog nej leejtwg yuav muab nyuj, muab yaj, muab tshis, hlawv kub nyhiab xyeem ua kevcai hlawv huvsi xyeem, lossis ua kevcai tua xyeem pauj tej uas nws fiv cia lawd, lossis nws zoo siab pub xwb, lossis yog tej sijhawm uas teem rau nej ua kevcai noj haus, yog ua kom muaj pa tsw qab haum (יחוח)Yahweh lub siab,

4 mas tus uas coj tuaj xyeem ntawd  yuav tau muab ib feem kaum hauv ib efas hmoov mog zoo zoo ntse ib feem plaub hauv ib hees roj ua kevcai xyeem qoob loo.

5 Koj yuav npaj ib feem plaub hauv ib hees cawv txiv hmab ua kevcai hliv xyeem rau txhua tus menyuam yaj uas ua kevcai hlawv huvsi xyeem thiab ua kevcai tua xyeem. 

6 Tiamsis yog ib tug txiv yaj, mas koj yuav npaj ob feem kaum hauv ib efas hmoov mog zoo zoo ntse ib feem peb hauv ib hees roj ua kevcai xyeem qoob loo, 7 thiab koj yuav muab ib feem peb hauv ib hees cawv txiv hmab ua kevcai hliv xyeem ua kom muaj pa tsw qab haum (יחוח)Yahweh lub siab.

8 Thaum koj npaj txiv nyuj ua kevcai hlawv huvsi xyeem lossis ua kevcai tua xyeem uas yog pauj tej uas fiv cia lawd lossis ua kevcai sib raug zoo rau ()Yahweh,

9 ces muab peb feem kaum hauv ib efas hmoov mog zoo zoo ntse ib nrab hees roj ua kevcai xyeem qoob loo, 10thiab koj yuav muab ib nrab hees cawv txiv hmab ua kevcai hliv xyeem ua tej uas hlawv kub nyhiab xyeem kom muaj pa tsw qab haum (יחוח)Yahweh lub siab.

11 Nej yuav tau ua li no rau txhua tus txiv nyuj, txiv yaj, rau menyuam txiv yaj, thiab menyuam txiv tshis huvsi.

12 Yuav ua li no rau txhua tus tsiaj npaum li uas npaj tuaj. 

13 Cov Ixayees uas nyob txum tim txhua tus yuav tau ua li uas hais tag no rau thaum muab tsiaj hlawv kub nyhiab xyeem kom muaj pa tsw qab haum (יחוח)Yahweh lub siab.

14 Yog lwm haiv neeg uas nrog nej nyob lossis leejtwg uas nrog nej nyob ib txhiab ib txhis xav muab tsiaj hlawv kub nyhiab kom muaj pa tsw qab haum (יחוח)Yahweh lub siab, mas kom nws ua raws nraim li uas nej ua no.

15 Yuav tau muaj tib txoj kevcai no rau nej cov tibneeg thiab rau lwm haiv neeg uas nrog nej nyob, yog ib txoj kevcai uas coj ib tiam dhau ib tiam ib txhiab ib txhis mus li. Nej zoo li cas mas tus uas nrog nej nyob yuav zoo li ntawd rau ntawm (יחוח)Yahweh xubntiag.

16 Yuav muaj tib txoj kevcai thiab tib txoj kab ke no rau nej thiab lwm haiv neeg uas nrog nej nyob.

17 (יחוח)Yahweh hais rau Mauxes tias,

18 cia li hais rau cov Ixayees tias, thaum nej txeem mus rau hauv lub tebchaws uas kuv yuav coj nej mus ntawd,

19 thiab thaum nej tau noj tej zaub mov hauv lub teb chaws ntawd, nej yuav muab tej yam no xyeem rau (יחוח)Yahweh.

20 Muab ib qho hmoov qeb hmoov mog uas tau ntawm thawj phaum qoob loo los ua ib lub ncuav mas muab xyeem ua yam uas tau hauv lub tshav ntaus qoob los.

21 Yuav muab cov hmoov qeb hmoov mog uas tau ntawm thawj phaum qoob los xyeem rau (יחוח)Yahweh ib tiam dhau ib tiam mus ib txhis li. 

22 Yog nej yuam kev tsis yog txhob txwm ua txhaum es tsis coj raws li tej lus cob qhia huvsi uas (יחוח)Yahweh hais rau Mauxes,

23 yog txhua yam uas (יחוח)Yahweh hais cia rau Mauxes kom nej ua, txij hnub uas (יחוח)Yahweh pub nws txoj kevcai ntawd rau nej coj ib tiam dhau ib tiam mus ib txhis li,

24 mas yog tias ua txhaum uas tsis yog txhob txwm ua thiab cov pejxeem tsis paub, mas cov pejxeem sawvdaws yuav muab ib tug thav txiv nyuj ua kevcai hlawv huvsi xyeem kom muaj pa tsw qab uas haum (יחוח)Yahweh lub siab ua ke nrog tej uas ua kevcai xyeem qoob loo thiab tej uas ua kevcai hliv xyeem raws li kevcai, thiab muab ib tug txiv tshis ua kevcai xyeem daws txim.

25 Tus pov thawj yuav ua kevcai ntxuav ib tsoom Ixayees sawvdaws kev txhaum, mas thiaj zam tau lawv lub txim, vim lawv tsis yog txhob txwm ua txhaum thiab lawv twb coj tsiaj tuaj hlawv kub nyhiab xyeem rau (יחוח)Yahweh thiab muab xyeem ua kevcai daws txim rau ntawm (יחוח)Yahweh xub ntiag lawm, vim yog lawv ua txhaum, 

26 mas thiaj zam tau ib tsoom Ixayees sawv daws tej kev txhaum thiab zam tau lwm haiv neeg uas nrog lawv nyob, rau qhov ib tsoom tibneeg sawvdaws tau koom tes ua txhaum uas tsis yog txhob txwm ua lawm.  

27 Yog muaj ib tug twg ua txhaum uas tsis yog txhob txwm ua, tus ntawd yuav tau muab ib tug maum tshis hnub nyoog muaj ib xyoos ua kevcai daws txim.  

28 Tus pov thawj yuav ua kevcai ntxuav kev txhaum rau ntawm (יחוח)Yahweh xub ntiag rau tus uas tau ua txhaum uas tsis yog nws txhob txwm ua, mas yuav ua kevcai ntxuav nws kev txhaum thiaj zam tau nws lub txim.

29 Nej yuav muaj tib txoj kevcai no rau tus uas tsis yog txhob txwm ua txhaum, tsis hais cov Ixayees uas nyob txum tim thiab lwm haiv neeg uas nrog nej nyob. 30 Tiamsis yog leejtwg txhob txwm ua txhaum tsis hais cov uas nyob txum tim thiab lwm haiv neeg, kuj yog tus ntawd saib tsis taus (יחוח)Yahweh, mas tus ntawd yuav raug muab txiav tawm hauv nws haiv neeg mus.   

31 Vim nws tau saib tsis taus (יחוח)Yahweh tej lus thiab rhuav (יחוח)Yahweh tej kevcai, mas nws yuav raug muab txiav kiag tawm mus, nws yuav ris nws lub txim. 

​

Xuas Pob Zeb Ntaus Tus Uas Tsis Hwm Hnub Sabbath

32 Thaum cov Ixayees nyob hauv tebchaws moj sab qhua, lawv pom ib tug mus khaws taws rau hnub Sabbath. 

33 Cov uas pom nws khaws taws txawm coj nws los rau ntawm Mauxes thiab Aloos thiab cov pejxeem sawv daws.

34 Lawv thiaj muab tus ntawd kaw cia rau qhov tsis tau paub tseeb yuav ua li cas rau nws.

35 (יחוח)Yahweh hais rau Mauxes tias, tus txivneej ntawd yeej yuav tau tuag. Cov pejxeem sawvdaws cia li xuas pob zeb ntaus nws rau nraum ntug zos.

36 Cov pejxeem sawv daws thiaj coj nws tawm mus rau nraum ntug zos thiab xuas pob zeb muab nws ntaus kom tuag raws li (יחוח)Yahweh hais rau Mauxes. 

​

Tis Hlua Xov Rau Lub Qab Tsho

37 (יחוח)Yahweh hais rau Mauxes tias,

38 cia li hais rau cov Ixayees tias, nej yuav tau ntxhoo tw rau ntawm tej kaum qab tsho mus ib txhiab ib txhis txhua tiam li. Muab ib txoj xov xiav tis rau txhua lub kaum tw tsho,

39 xwv nej thiaj pom cov tw ntawd es thiaj nco ntsoov (יחוח)Yahweh tej lus cob qhia huvsi thiab ua raws li, kom nej thiaj tsis mus ua ib yam abtsi phem uas nej lub siab nyiam thiab nej lub qhov muag pheej ntshaw. 

40 Nej thiaj li nco ntsoov thiab ua raws li kuv tej lus cob qhia huvsi thiab ua tibneeg dawb huv rau (יחוח)Yahweh uas yog nej Tus Tswv.  

41 Kuv yog (יחוח)Yahweh, yog nej Tus Tswv uas coj nej tawm hauv Iziv tebchaws los kom kuv thiaj tau ua nej Tus Tswv.  Kuv Yog (יחוח)Yahweh uas yog nej Tus Tswv.