Khauhathais Thiab Dathas Thiab Anpilas Fav Xeeb

1 Khaulas uas yog Ixahas tus tub nws yawg yog Khauhas, nws yawg koob yog Levis, thiab Dathas thiab Anpilas uas yog Elias tus tub, thiab Oos uas yog Pelej tus tub, lawv peb leeg yog xeem Lunpees,

2 mas lawv coj tibneeg mus sawv tawm tsam Mauxes.  Lawv coj ib pab Ixayees muaj ob puas tsib caug leej uas ua cov pejxeem li thawj uas xaiv hauv cov pejxeem los thiab yog cov uas muaj npe.

3 Lawv tuaj txoos ua ke tawm tsam Mauxes thiab Aloos thiab hais rau nkawv tias, neb ua dhau cai lawm.  Rau qhov ib tsoom tibneeg kuj dawb huv txhua tus, thiab (יחוח)Yahweh nrog nraim lawv.  Ua cas neb tsab ua loj dua (יחוח)Yahweh cov tibneeg?  

4 Thaum Mauxes hnov li ntawd, nws kuj khwb nkaus lub plhu ti nkaus av. 

5 Nws hais rau Khaulas thiab pab tibneeg ntawd tias, tagkis sawv ntxov (יחוח)Yahweh yuav qhia kom pom tias leejtwg yog nws li thiab leejtwg yog tus dawb huv, mas yuav kheev cia tus ntawd txav los ze (יחוח)Yahweh.  Tus uas (יחוח)Yahweh xaiv, (יחוח)Yahweh yuav kheev txav los ze nws.

6 Yuav tau ua li no.  Khaulas thiab koj pab tibneeg, cia li muab tej yias rau ncaig taws los. 

7 Cia li rau ncaig taws rau hauv thiab muab hmoov tshuaj tsw qab tso rau saum cov ncaig taws rau ntawm (יחוח)Yahweh xubntiag rau tagkis. Tus uas (יחוח)Yahweh xaiv yuav yog tus uas dawb huv.  Nej cov Levis ua dhau cai lawm. 

8 Mauxes hais rau Khaulas tias, nej cov Levis cia li tig ntsej mloog. 

9 Qhov uas cov Ixayees Tus Tswv muab nej cais tawm hauv cov Ixayees los xwv thiaj coj tau nej los nyob ze nws, thiab ua haujlwm hauv (יחוח)Yahweh lub tsev ntaub, thiab sawv tab meeg ntawm ib tsoom tibneeg uas tuaj txoos ua ke, thiab tu cov Ixayees, yog ib qho me me xwb lov?

10 Nws coj koj thiab koj cov kwvtij sawvdaws uas yog xeem Levis los ze nws los nej tseem nrhiav qhov uas yuav ua pov thawj thiab lov?

11 Qhov uas koj thiab koj pab tibneeg tuaj txoos ua ke, kuj yog tawm tsam (יחוח)Yahweh.  Aloos yog leejtwg es nej yuav yws nws?

12 Mauxes txib tibneeg mus hu Dathas thiab Anpilas uas yog Elias cov tub tuaj, tiamsis nkawv hais tias, wb tsis tuaj. 

13 Qhov uas koj coj peb tawm hauv lub teb chaws uas muaj kua mis thiab zib ntab ntws nto los es yuav muab peb tua pov tseg rau hauv tebchaws moj sab qhua, yog ib qho me me xwb lov? Los koj tseem tsa koj ua thawj kav peb thiab lov?  

14 Tsis tag li ntawd, koj twb tsis coj peb mus rau hauv lub tebchaws uas muaj kua mis thiab zib ntab ntws nto, thiab tsis pub teb lossis vaj txiv hmab rau peb ua qub txeeg qub teg.  Koj tseem yuav muab cov tibneeg no lub qhov muag kaus pov tseg thiab lov? Wb tsis tuaj li. 

15 Mauxes thiaj chim heev thiab hais rau (יחוח)Yahweh tias, thov tsis txhob txais yuav tej uas lawv hlawv xyeem.  Kuv kuj tsis tau txeeb lawv ib tug nees luav los yuav thiab kuv tsis tau ua ib qho phem rau ib tug twg li. 

16 Thiab Mauxes hais rau Khaulas tias, tagkis koj thiab koj pab tibneeg cia li tuaj rau ntawm (יחוח)Yahweh xub ntiag, koj tus kheej thiab koj pab tibneeg thiab Aloos tuaj.

17 Cia txhua tus nyias muab nyias lub yias rau ncaig taws thiab tso hmoov tshuaj tsw qab rau hauv. Nej ob puas tsib caug leej, txhua tus nyias coj nyias lub yias tuaj rau ntawm (יחוח)Yahweh xubntiag. Koj thiab Aloos nyias coj nyias lub yias tuaj thiab.

18 Yog li no txhua tus nyias muab nyias lub yias thiab tso ncaig taws thiab tso hmoov tshuaj tsw qab rau saum cov ncaig taws, thiab lawv nrog Mauxes thiab Aloos sawv ntawm txojkev uas nkag rau hauv lub tsev ntaub sib ntsib.

19 Khaulas sau zog nws pab tibneeg ua ke tawm tsam Mauxes thiab Aloos nkawv rau ntawm txojkev uas nkag mus rau hauv lub tsev ntaub sib ntsib. 

Mas (יחוח)Yahweh lub hwjchim ci ntsa iab tshwm plaws los rau ib tsoom tibneeg pom. 

20 (יחוח)Yahweh hais rau Mauxes thiab Aloos tias,

21 cia li ncaim ntawm cov tibneeg no mus.  Tib ntsais muag xwb, kuv yuav muab lawv rhuav tshem huvsi.

22 Nkawv txawm khwb nkaus lub plhu ti nkaus av, thov hais tias, Au (יחוח)Yahweh, uas yog tibneeg sawv daws tus ntsuj plig Tus Tswv, thaum ib tug ua txhaum xwb koj yuav cia li chim rau ib tsoom tibneeg sawvdaws lov?  

23 Mas (יחוח)Yahweh hais rau Mauxes tias,

24 cia li hais rau cov pejxeem tias, nej cia li khiav deb ntawm Khaulas thiab Dathas thiab Anpilas tej tsev ntaub. 

25 Ces Mauxes txawm sawv tsees mus rau ntawm Dathas thiab Anpilas.  Ixayees cov kev txwj laug kuj nrog nws mus. 

26 Mauxes thiaj hais rau cov pejxeem tias, nej cia li khiav deb ntawm cov tibneeg phem no tej tsev ntaub thiab txhob kov lawv ib yam abtsi li tsam ces nej raug muab rhuav tshem vim tim lawv tej kev txhaum huvsi. 

27 Cov pej xeem thiaj khiav deb ntawm Khaulas thiab Dathas thiab Anpilas tej chaw nyob mas Dathas thiab Anpilas kuj nrog ob tug pojniam thiab tej tub thiab tej menyuam yaus tawm los sawv ntawm lawv qhov rooj tsev ntaub. 

28 Thiab Mauxes hais tias, ua li no nej thiaj paub tias (יחוח)Yahweh txib kuv los ua tej haujlwm no huvsi, tsis yog kuv ua raws li kuv lub siab. 

29 Yog cov tibneeg no tuag yam li luag tsoom zeej sawvdaws lossis lub khuab raug lawv yam li luag tsoom zeej sawvdaws, kuj tsis yog (יחוח)Yahweh txib kuv los. 

30 Tiamsis yog (יחוח)Yahweh ua kom muaj ib yam tshiab tshwm los, thiab daim av rua ncauj nqos cov tibneeg no thiab lawv tej qhov txhia chaw huvsi mus, thiab lawv nqis ciaj sia kais rau hauv tub tuag teb, mas nej yuav paub tias cov tibneeg no tau saib tsis taus (יחוח)Yahweh.

31 Thaum nws hais tej lus no tag, thaj av uas lawv sawv saud txawm tu nrho. 

32 Daim av rua ncauj nqos kiag lawv thiab lawv tej tsev neeg thiab Khaulas cov tibneeg sawvdaws thiab lawv tej qhov txhia chaw huvsi.

33 Ua li no lawv thiab lawv tej qhov txhia chaw huvsi thiaj nqis ciaj sia kais rau hauv tub tuag teb.  Daim av kaw nkaus lawv cia mas lawv thiaj puam tsuaj tag ploj hauv ib tsoom tibneeg.

34 Cov Ixayees sawvdaws uas nyob ib ncig lawv, hnov lawv lub suab qw ces txawm khiav mus, thiab hais tias, ntshai tsam lub ntiajteb yuav nqos peb thiab.  35 Mas hluav taws tawm ntawm (יחוח)Yahweh los hlawv ob puas tsib caug leej uas tab tom hlawv hmoov tshuaj tsw qab xyeem ntawd. 

36 (יחוח)Yahweh hais rau Mauxes tias,

37 cia li hais kom Ele‑axas uas yog pov thawj Aloos tus tub muab tej yias rau ncaig taws rho ntawm cov nplaim taws rau ib qho thiab muab cov ncaig taws rheeb nyias nyob nyias, rau qhov cov yias ntawd tseem dawb huv,

38 yog cov yias uas cov tibneeg ntawd siv ua txhaum lawv thiaj tuag tag lawm.  Thiab muab tej yias ntawd ntaus ua tej daim nyias nyias lo rau lub thaj xyeem, rau qhov twb muab cov yias ntawd xyeem rau (יחוח)Yahweh mas dawb huv lawm. Ua li no mas tej no yuav ua lub chaw ntaus cim rau cov Ixayees. 

39 Pov thawj Ele‑axas thiaj muab cov yias tooj liab uas cov raug hluavtaws hlawv tau siv mus xyeem ntawd, los ntaus ua tej daim lo rau lub thaj xyeem,

40 ua lub chaw rau cov Ixayees nco ntsoov tias, tus uas tsis yog Aloos caj ces mas tsis txhob txav ze hlawv hmoov tshuaj tsw qab xyeem rau ntawm (יחוח)Yahweh xub ntiag tsam ces yuav zoo li Khaulas thiab nws pab tibneeg, raws li (יחוח)Yahweh kom Mauxes hais rau Ele‑axas.  

41 Hnub tom qab, ib tsoom pejxeem Ixayees sawvdaws yws Mauxes thiab Aloos tias, neb tua (יחוח)Yahweh cov tibneeg lawm.

42 Thaum cov pejxeem tuaj txoos ua ke tawm tsam Mauxes thiab Aloos, lawv tig xubntiag rau lub tsev ntaub sib ntsib, ua ciav tauv huab los laum nkaus lub tsev ntaub ntawd, thiab (יחוח)Yahweh lub hwjchim ci ntsa iab tshwm los. 

43 Mauxes thiab Aloos thiaj los rau ntawm lub tsev ntaub sib ntsib sab qhov rooj. 

44 Mas (יחוח)Yahweh hais rau Mauxes tias,

45 cia li khiav tawm ntawm cov tibneeg no mus, tib ntsais muag xwb kuv yuav rhuav tshem lawv. Ces nkawv txawm khwb nkaus lub plhu ti nkaus av. 

46 Mauxes thiaj hais rau Aloos tias, muab koj lub yias rau ncaig taws thiab muab hluavtaws ntawm lub thaj xyeem rau hauv, thiab tso hmoov tshuaj tsw qab rau hauv, thiab maj nroos coj mus rau ntawm cov pejxeem ua kevcai ntxuav lawv kev txhaum, rau qhov txojkev npau taws tawm ntawm (יחוח)Yahweh tuaj lawm, tej mob phem twb pib tshwm tuaj lawm. 

47 Aloos thiaj muab lub yias ua raws li Mauxes hais thiab khiav mus rau hauv nruab nrab cov pejxeem. Mob phem twb tshwm tuaj rau cov pejxeem lawm, mas nws rau hmoov tshuaj tsw qab rau hauv lub yias thiab ua kevcai ntxuav cov pejxeem kev txhaum.

48 Nws sawv hauv nruab nrab cov tibneeg ciaj thiab cov tibneeg tuag, mas tej mob phem ntawd thiaj ploj lawm.

49 Cov tibneeg uas tuag tej mob phem ntawd, muaj kaum plaub txhiab xya pua leej, tsis suav cov uas nrog Khaulas tuag.

50 Thaum tej mob phem ntawd ploj lawm, Aloos li rov mus cuag Mauxes rau ntawm txojkev uas nkag mus rau hauv lub tsev ntaub sib ntsib.