Aloos Tus Pas Nrig

1 (יחוח)Yahweh hais rau Mauxes tias,

2 cia li hais rau cov Ixayees kom coj txhua xeem li pas nrig tuaj, yog txhua xeem tus thawj tus pas nrig, huvsi yog kaum ob tug. Cia li sau txhua tus tswv pas ntawd lub npe rau nws tus pas nrig. 

3 Sau Aloos lub npe rau xeem Levis tus pas nrig.  Txhua xeem tus thawj yuav tau muaj ib tug pas nrig. 

4 Koj yuav muab cov pas nrig ntawd tso rau hauv lub tsev ntaub sib ntsib rau ntawm lub phij xab uas rau (יחוח)Yahweh tej lus sab xubntiag, yog lub chaw uas kuv ntsib nej. 

5 Tus uas kuv xaiv lawm, nws tus pas nrig yuav hlav nplooj, ua li no kuv thiaj ua rau cov Ixayees lub suab yws uas lawv yws koj ntsiag mus. 

6 Mauxes thiaj hais li no rau cov Ixayees mas lawv txhua xeem, cov thawj txhua tus thiaj muab ib leeg ib tug pas nrig rau Mauxes, huvsi yog kaum ob tug pas nrig.  Mas Aloos tus pas nrig kuj nyob hauv cov ntawd thiab. 

7 Mas Mauxes muab cov pas nrig ntawd tso rau ntawm (יחוח)Yahweh xubntiag hauv lub tsev ntaub uas muaj (יחוח)Yahweh tej lus. 

8 Tagkis tom qab, Mauxes nkag mus rau hauv lub tsev ntaub uas muaj (יחוח)Yahweh tej lus, ua ciav Aloos tus pas nrig uas yog xeem Levis tus, tau hlav nplooj ua cos tawg paj thiab txi txiv duaj deg siav lawm. 

9 Mauxes txawm coj tej pas nrig ntawd huvsi ntawm (יחוח)Yahweh lub xubntiag los rau cov Ixayees sawvdaws. Lawv tshuaj saib thiab nyias txais nyias tus pas nrig los. 

10 (יחוח)Yahweh hais rau Mauxes tias, cia li coj Aloos tus pas nrig rov mus tso rau ntawm lub phij xab uas muaj (יחוח)Yahweh tej lus sab xubntiag, muab khaws cia ua lub cim rau cov uas ntxeev siab, xwv koj thiaj tswj tau qhov uas lawv yws kuv, lawv thiaj tsis tuag. 

11 Mauxes kuj ua li ntawd. (יחוח)Yahweh hais kom nws ua li cas, nws kuj ua raws nraim li ntawd.

12 Cov Ixayees hais rau Mauxes tias, saib maj, peb puam tsuaj, peb liamsim, peb sawvdaws liamsim tag lawm.

13 Txhua tus uas txav los ze (יחוח)Yahweh lub tsev ntaub yuav tuag.  Peb yuav tuag tag huvsi lov?