Tej Haujlwm Uas Tu Rau cov Pov Thawj Thiab cov Levis

1 (יחוח)Yahweh hais rau Aloos tias, yog ua txhaum rau qhov chaw uas pe hawm kuv mas koj thiab koj cov tub thiab koj lub xeem yuav ris lub txim. Yog ua txhaum rau qhov uas koj ua pov thawj mas koj thiab koj cov tub yuav ris lub txim. 

2 Mas koj cia li coj koj cov kwvtij uas yog xeem Levis uas yog koj yawg koob lub xeem tuaj nrog koj koom ua ke xwv thiaj pab tau koj rau thaum koj thiab koj cov tub ua haujlwm ntawm lub tsev ntaub uas muaj (יחוח)Yahweh tej lus. 

3 Lawv yuav ua num rau koj thiab ua txhua yam haujlwm rau ntawm lub tsev ntaub, tiam sis tsis txhob kheev lawv txav los ze tej twj uas siv hauv lub chaw pe hawm kuv thiab lub thaj xyeem, tsam ces lawv thiab nej tuag. 

4 Lawv yuav tuaj koom nrog koj thiab lawv yuav saib xyuas lub tsev ntaub sib ntsib thiab tu txhua yam haujlwm rau lub tsev ntaub.  Tiamsis dua lwm xeem mas tsis txhob kheev tuaj ze nej.

5 Nej yuav tau saib thiab tu tej hauj lwm ntawm lub chaw pe hawm kuv thiab tej haujlwm ntawm lub thaj xyeem, xwv kuv txojkev npau taws thiaj tsis poob rau saum cov Ixayees dua li lawm.

6 Kuv xaiv nej cov kwvtij Levis tawm hauv cov Ixayees los.  Lawv raug muab xyeem rau (יחוח)Yahweh thiab muab pub rau nej ua tej haujlwm hauv lub tsev ntaub sib ntsib.

7 Mas koj thiab koj cov tub yuav ua pov thawj xwb thiaj ua tau txhua yam haujlwm ntawm lub thaj xyeem thiab tej haujlwm ntawm daim ntaub thaiv sab hauv.  Nej yuav tau tu tej haujlwm no. Kuv pub qhov uas ua pov thawj rau nej, mas lwm tus uas txav los ze yuav raug muab tua pov tseg.

8 Mas (יחוח)Yahweh hais rau Aloos tias, thaum ua kevcai xyeem rau kuv mas tej uas tsis muab hlawv xyeem, kuv muab ua koj tug, yog txhua yam dawb huv uas cov Ixayees coj tuaj xyeem. Kuv muab tej no tu rau koj thiab koj cov tub ua nej feem mus ib txhis.

9 Tej uas dawb huv kawg nkaus uas tsis muab hlawv xyeem yog koj ntiag tug. Txhua yam uas lawv muab xyeem, tsis hais ua kevcai xyeem qoob loo, ua kevcai xyeem daws txim, ua kevcai ntxuav kev txaug kev txhaum uas lawv muab xyeem rau kuv, mas yog yam uas dawb huv kawg nkaus pub rau koj thiab koj cov tub. 

10 Koj yuav tau noj tej no rau hauv ib qho chaw uas dawb huv kawg nkaus. Cov txivneej txhua tus noj tau. Yog yam uas dawb huv rau koj.

11 Tej no kuj yog koj li thiab, yog tej uas cov Ixayees muab xyeem ua kevcai cev xyeem. Kuv muab tej no tu rau koj thiab koj tej tub thiab tej ntxhais ua lawv feem mus ib txhis.  Koj tsev neeg txhua tus uas huv noj tau. 

12 Tej roj uas zoo kawg nkaus thiab tej cawv txiv hmab, thiab tej qoob loo uas zoo kawg nkaus uas yog thawj phaum uas lawv coj tuaj xyeem rau ()Yahweh, kuv muab ua koj tug.

13 Txhua yam txiv ntoo hauv lawv lub tebchaws uas siav thawj phaum es lawv coj tuaj xyeem rau (יחוח)Yahweh, kuj yog koj li. Koj tsev neeg txhua tus uas huv noj tau. 

14 Txhua yam hauv cov Ixayees uas raug muab cais pub rau kuv, kuj yog koj li.  

15 Txhua tus tub hlob uas yug hauv plab los, tsis hais tibneeg li lossis tsiaj txhu li uas lawv muab xyeem rau (יחוח)Yahweh, kuj yog koj li. Tiamsis koj yuav tau txhiv tibneeg thawj tug menyuam thiab yuav tau txhiv cov tsiaj txhu uas qias tsis huv thawj tug menyuam. 

16 Thaum menyuam tibneeg muaj ib hlis, koj yuav tau txhiv. Koj yuav tau tu tus nqi txhiv ua tsib sekhees nyiaj, raws li sekhees uas siv hauv lub chaw pe hawm (יחוח)Yahweh, ib sekhees yog nees nkaum kelas. 

17 Tiamsis thawj tug menyuam nyuj lossis yaj lossis tshis, koj tsis txhob muab txhiv, vim yog yam uas dawb huv. Koj yuav tau muab cov ntshav nchos rau saum lub thaj thiab muab cov roj hlawv kub nyhiab xyeem kom muaj pa tsw qab haum (יחוח)Yahweh lub siab.

18 Tiamsis cov nqaij yog koj li, ib yam li lub hauv nrob uas muab cev xyeem thiab txhais ncej qab xis uas yog koj li. 

19 Txhua yam dawb huv uas cov Ixayees coj tuaj xyeem rau (יחוח)Yahweh, kuv muab tu rau koj thiab koj tej tub tej ntxhais uas nrog koj nyob ua nej feem mus ib txhis. No yog lo lus cog tseg ruaj khov rau koj thiab koj caj ces tab meeg (יחוח)Yahweh xubntiag mus ib txhis.

20 (יחוח)Yahweh hais rau Aloos tias, koj yuav tsis tau av ua qub txeeg qub teg rau hauv lub tebchaws no thiab koj yuav tsis nrog lawv muaj feem li.  Kuv yog koj li feem thiab koj li qub txeeg qub teg rau hauv cov Ixayees. 

21 Txhua yam uas cov Ixayees pub ib feem kaum rau kuv mas kuv muab ua qub txeeg qub teg rau cov Levis ntxiv tej nuj nqis uas lawv ua, yog tej haujlwm uas lawv ua ntawm lub tsev ntaub sib ntsib. 

22 Txij no mus cov Ixayees yuav tsis tau txav ze lub tsev ntaub sib ntsib, ntshai tsam lawv raug txim ces lawv tuag. 

23 Cov Levis yuav ua dej ua num ntawm lub tsev ntaub sib ntsib mas lawv yuav tau ris tej uas lawv ua txhaum, yog ib txoj kevcai uas nej yuav coj txhua tiam ib txhiab ib txhis mus li.  Lawv yuav tsis muaj qub txeeg qub teg hauv cov Ixayees.

24 Rau qhov ib feem kaum uas cov Ixayees coj tuaj pub rau (יחוח)Yahweh, mas kuv twb muab pub ua qub txeeg qub teg rau cov Levis lawm.  Vim li no kuv thiaj hais txog lawv tias, lawv yuav tsis nrog cov Ixayees tau qub txeeg qub teg.

25 (יחוח)Yahweh hais rau Mauxes tias,

26 yog li no, cia li hais rau cov Levis tias, thaum nej tau ib feem kaum ntawm cov Ixayees uas kuv muab ua qub txeeg qub teg rau nej, mas nej yuav muab tej uas nej tau los ntawd rho ib feem kaum pub rov rau (יחוח)Yahweh. 

27 Tej uas nej pub ntawd kuj suav ib yam nkaus li tej uas tau hauv lub tshav ntaus qoob los, thiab tau ntawm lub rhawv tsuam kua txiv hmab los. 

28 Ua li no nej kuj yuav tau muab tej uas rho ntawm txhua yam uas cov Ixayees pub ib feem kaum es nej tau txais lawd, rho ib qho xyeem rau (יחוח)Yahweh, mas nej yuav muab tej uas xyeem rau (יחוח)Yahweh ntawd pub rau pov thawj Aloos. 

29 Txhua yam uas nej tau txais lawm mas tej uas nej yuav tau muab pub rau (יחוח)Yahweh mas yuav tau pub tej uas zoo kawg nkaus thiab tej uas dawb huv xwb.

30 Mas koj yuav hais rau lawv tias, thaum nej tau pub tej uas zoo kawg nkaus ntawd mas tej uas tshuav ntawd yuav suav ua cov Levis li feem yam nkaus li tej qoob uas tau hauv lub tshav ntaus qoob los thiab yam nkaus li tej kua txiv hmab uas tau ntawm lub rhawv tsuam los. 

31 Nej muab tej no noj rau lub chaw twg kuj tau, nej thiab nej tsev neeg noj tau, rau qhov yog tej uas ntxiv rau tej dej num uas nej ua ntawm lub tsev ntaub sib ntsib. 

32 Thaum nej muab yam uas zoo kawg nkaus pub lawm mas nej yuav tsis raug txim rau tej uas nej pub ntawd. Nej tsis txhob ua puas tsuas cov Ixayees tej qhov txhia chaw uas dawb huv, tsam ces nej tuag.