Kevcai Ntxuav Tus Uas Qias Tsis Huv

1 (יחוח)Yahweh hais rau Mauxes thiab Aloos tias,

2 ntawm no mus yog ib txoj kevcai uas (יחוח)Yahweh kom ua. Cia li hais rau cov Ixayees kom coj ib tug maum nyuj liab uas tsis muaj chaw thuam li thiab tsis tau hai dua tsheb tuaj rau koj. 

3 Neb yuav muab tus nyuj ntawd rau pov thawj Ele‑axas, mas muab cab rau nraum ntug zos thiab muab tua kiag rau ntawm Ele‑axas xub ntiag.

4 Pov thawj Ele‑axas yuav muab nws ntiv tes raus cov ntshav nyuj nchos rau ntawm lub tsev ntaub sib ntsib sab hnub tuaj xya zaus.

5 Lawv yuav muab tus maum nyuj hlawv tab meeg Ele‑axas, hlawv daim tawv, tej nqaij, tej ntshav, tej quav huvsi.

6 Tus pov thawj yuav muab me ntsis ntoo ciab thiab zaub txig theem thiab xov liab pov rau hauv cub hluavtaws uas hlawv tus nyuj ntawd,

7 mas tus pov thawj li ntxhua nws cev tsoos tsho thiab da dej mam li mus rau hauv lub zos.  Tus pov thawj yuav qias tsis huv mus txog tsaus ntuj.

8 Tus uas hlawv tus maum nyuj ntawd los yuav ntxhua nws cev tsoos tsho thiab da dej, nws yuav qias tsis huv mus txog tsaus ntuj.   

9 Ib tug txivneej uas huv yuav tau mus yawm tej tshauv uas hlawv tus maum nyuj ntawd coj los rau lub chaw uas huv sab nraum ntug zos, mas muab cov tshauv ntawd khaws cia rau ib tsoom Ixayees sawvdaws siv ua dej ua kevcai ntxuav kev phem kev qias thiab ntxuav lub txim.

10T us uas yawm cov tshauv uas hlawv tus maum nyuj ntawd yuav ntxhua nws cev tsoos tsho, nws yuav qias tsis huv mus txog tsaus ntuj. No yog ib txoj kevcai uas cov Ixayees thiab lwm haiv neeg uas nrog nej nyob yuav tau coj mus ib txhiab ib txhis li. 

11 Leejtwg kov tej cev tuag mas yuav qias tsis huv xya hnub.

12 Hnub uas peb thiab hnub uas xya, nws yuav muab cov dej ntawd los ua kevcai ntxuav nws thiaj li huv.  Yog nws tsis ua kevcai ntxuav rau hnub peb thiab hnub xya, nws yuav qias tsis huv. 

13 Leejtwg kov tej tuag, yog kov raug tej tuag lub cev es tsis ua kevcai ntxuav mas tus ntawd ua puas tsuas (יחוח)Yahweh lub tsev ntaub lawm, mas tus ntawd yuav raug muab txiav tawm hauv cov Ixayees mus, rau qhov nws tsis tau muab cov dej uas ua kevcai ntxuav kev phem kev qias los ntov nws, nws thiaj qias tsis huv, nws kev qias tseem lo nws.

14 Ntawm no mus yog tej kevcai uas yuav coj rau thaum ib tug tuag rau hauv lub tsev ntaub. Txhua tus uas nkag rau hauv tsev thiab txhua tus uas nyob hauv tsev yuav qias tsis huv xya hnub.

15 Txhua lub twj taig uas tsis muaj hau vov kuj qias tsis huv.

16 Yog leejtwg mus rau sab nraum ntug zos mus kov raug tej tibneeg uas raug ntaj tuag, lossis tej cev tuag, lossis pob txha tibneeg, lossis qhov ntxa, mas tus ntawd yuav qias tsis huv xya hnub.

17 Tus uas qias tsis huv no mas yuav muab cov tshauv uas hlawv tus nyuj xyeem daws txim thiab muab dej cag hliv xyaw rau hauv lub phaj.

18 Ib tug uas huv yuav muab ib re nplooj zaub txig theem raus cov dej ntawd nchos rau lub tsev ntaub thiab tej twj uas siv huvsi thiab nchos rau tej tibneeg uas nyob hauv thiab nchos rau tus uas mus kov pob txha, lossis kov tus raug tua tuag, lossis tej cev tuag, lossis lub qhov ntxa. 

19 Tus uas huv ntawd yuav muab nchos rau tus uas qias tsis huv rau hnub uas peb thiab hnub uas xya. Ua li no mas hnub uas xya yuav ua kevcai ntxuav tus ntawd kom huv mas tus ntawd yuav ntxhua nws cev tsoos tsho thiab da dej, thaum tsaus ntuj nws thiaj li huv. 

20 Tus uas qias tsis huv es tsis ua kevcai ntxuav mas tus ntawd yuav raug muab txiav tawm hauv ib tsoom Ixayees mus, rau qhov nws ua puas tsuas lub chaw pe hawm (יחוח)Yahweh.  Vim nws tsis tau muab cov dej uas ua kevcai ntxuav kev phem kev qias los ntov nws, nws thiaj qias tsis huv.

21 No yog ib txoj kevcai uas lawv yuav coj ib txhiab ib txhis mus li.  Tus uas muab cov dej uas ua kevcai ntxuav kev qias ntawd nchos kuj yuav ntxhua nws cev tsoos tsho. Tus uas kov cov dej uas ntxuav kev qias ntawd, nws kuj yuav qias tsis huv mus txog tsaus ntuj.

22 Tus uas qias tsis huv kov raug yam twg mas yam ntawd kuj qias tsis huv. Thiab leejtwg kov raug yam ntawd, nws kuj qias tsis huv mus txog tsaus ntuj thiab.