Mauxes Ntaus Phab Zeb

1 Ib tsoom Ixayees sawvdaws los txog tebchaws moj sab qhua Xees rau lub ib hlis, thiab lawv tsuam chaw nyob ntawm Khades. Ces Mili‑as txawm tuag thiab muab faus rau qhov ntawd.

2 Qhov chaw ntawd cov pejxeem tsis muaj dej haus, lawv thiaj tuaj txoos ua ke tawm tsam Mauxes thiab Aloos.

3 Lawv nrog Mauxes sib cav hais tias, thaum peb cov kwvtij tuag tag rau ntawm

(יחוח)Yahweh xubntiag, cia peb tuag thiab kuj zoo dua.

4 Ua cas koj coj (יחוח)Yahweh cov tibneeg los rau hauv tebchaws moj sab qhua no es peb thiab peb tej tsiaj txhu yuav tuag tag rau ntawm no?

5 Ua cas koj coj peb tawm hauv Iziv tebchaws, coj peb los rau lub chaw phem no? Tsis muaj qoob loo, tsis muaj txiv cev, tsis muaj txiv hmab, tsis muaj txiv ntsiav kws, thiab tsis muaj dej haus kiag li. 

6 Ces Mauxes thiab Aloos txawm tawm ntawm cov pejxeem mus rau ntawm lub qhov rooj tsev ntaub sib ntsib thiab khwb nkaus rau hauv av. (יחוח)Yahweh lub hwjchim ci ntsa iab tshwm rau nkawv,

7 mas (יחוח)Yahweh hais rau Mauxes tias,

8 cia li coj tus pas nrig, thiab koj thiab koj tus tijlaug Aloos hu cov pejxeem tuaj ua ke. Neb cia li hais rau phab zeb tab meeg lawv kom txhawv dej los. Ua li no koj thiaj muab tau dej ntawm phab zeb los rau ib tsoom pejxeem thiab lawv tej tsiaj txhu haus.

9 Mauxes txawm coj tus pas nrig ntawm (יחוח)Yahweh xubntiag mus, raws li (יחוח)Yahweh tau hais rau nws. 

10 Mauxes thiab Aloos thiaj hu cov pejxeem tuaj ua ke rau ntawm phab zeb thiab Mauxes hais rau lawv tias, nej cov niag tibneeg ntxeev siab, cia li tig ntsej mloog.  Yuav cia wb ua dej txhawv hauv phab zeb no los rau nej lov?  

11 Mauxes txawm tsa tes kiag xuas pas nrig ntaus phab zeb ntawd ob nplawg. Ces dej txawm txhawv los hlob hlob, mas cov pejxeem thiab lawv tej tsiaj txhu thiaj tau dej haus.

12 (יחוח)Yahweh hais rau Mauxes thiab Aloos tias, vim neb tsis ntseeg kuv, tsis hwm kuv ua tus dawb huv tab meeg cov Ixayees, vim li no neb yuav tsis tau coj cov pejxeem no mus rau hauv lub teb chaws uas kuv twb muab rau lawv lawm.  

13 Cov dej ntawd yog cov dej Melinpas, yog qhov chaw uas lawv nrog ()Yahweh sib cav thiab (יחוח)Yahweh tau ua nws txojkev dawb huv tshwm rau hauv lawv nruab nrab. 

​

Edoos Tsis Kheev Cov Ixayees Hla Lawv Lub Tebchaws

14 Mauxes tso tibneeg xa xov ntawm Khades mus hais rau Edoos tus vajntxwv tias, koj tus kwvtij Ixayees hais li no tias, koj yeej paub txog tej kev txom nyem uas peb raug lawm. 

15 Peb tej poj koob yawm txwv tau tsiv mus rau Iziv tebchaws thiab peb nyob hauv Iziv tebchaws ntev heev. Cov Iziv tsim txom peb thiab peb tej poj koob yawm txwv.

16 Mas thaum peb quaj rau (יחוח)Yahweh, nws kuj hnov peb lub suab thiab txib ib tug tubtxib saum ntuj los thiab nws coj peb tawm hauv Iziv tebchaws, mas nimno peb los nyob ntawm lub moos Khades uas npuas koj ciam teb.

17 Thov cia peb hla koj lub tebchaws mus. Peb yuav tsis hla hauv koj tej liaj teb lossis hauv koj tej vaj txiv hmab, thiab peb yuav tsis haus koj tej qhov dej.  Peb yuav taug vajntxwv txoj niag kev loj xwb, peb yuav tsis tig mus rau sab xis lossis mus rau sab laug, mus txog thaum peb hla dhau koj lub tebchaws. 

18 Tiamsis Edoos tus vajntxwv hais rau Mauxes tias, koj hla tsis tau kiag li, yog koj tuaj kuv yuav xuas ntaj tiv koj.

1 9Cov Ixayees hais rau Edoos tus vajntxwv tias, peb yuav taug txoj niag kev loj xwb.  Yog peb haus koj cov dej, tsis hais peb thiab peb tej tsiaj txhu, peb yuav them nqi rau koj.  Thov koj cia peb xuas kotaw hla mus, tsuas yog li no xwb. 

20 Tiamsis nws teb tias, nej hla mus tsis tau li.  Cov Edoos txawm txhij tub rog coob muaj zog heev tuaj tawm tsam lawv.

21 Yog li no Edoos thiaj tsis kheev Ixayees hla nws lub tebchaws, cov Ixayees thiaj lug ntawm nws mus lawm. 

​

Aloos Tuag Ntawm Lub Roob Haus

22 Ib tsoom Ixayees sawvdaws thiaj tawm ntawm Khades los txog lub roob Haus.

23 Ntawm lub roob Haus no, (יחוח)Yahweh thiaj hais rau Mauxes thiab Aloos ntawm Edoos ciam teb tias,

24 Aloos yuav raug coj mus nrog nws tej poj koob yawm txwv nyob. Nws yuav tsis tau mus rau hauv lub tebchaws uas kuv muab rau cov Ixayees, rau qhov neb ob leeg ntxeev siab rau tej lus uas kuv hais rau neb ntawm cov dej Melinpas.

25 Cia li coj Aloos thiab nws tus tub Ele‑axas mus rau saum lub roob Haus. 

26 Mas hle Aloos cev tsoos muab rau nws tus tub Ele‑axas hnav.  Aloos yuav raug coj mus nrog nws tej poj koob yawm txwv nyob, nws yuav tuag rau qhov ntawd.

27 Mauxes kuj ua raws (יחוח)Yahweh hais.  Lawv thiaj nce mus rau saum lub roob Haus tab meeg cov pejxeem sawvdaws.

28 Ces Mauxes txawm hle Aloos cev tsoos muab rau nws tus tub Ele‑axas hnav, ces Aloos txawm tu siav rau saum lub ncov roob ntawd lawm.  Ces Mauxes thiab Ele‑axas thiaj nqis saum lub roob los.

29 Thaum cov pejxeem sawvdaws pom tias Aloos tuag lawm, cov Ixayees sawv daws quaj ntsuag Aloos tau peb caug hnub.