Cov Khana‑as Ua Rog Rau Cov Ixayees

1 Thaum cov Khana‑as tus vajntxwv uas kav lub moos Alaj uas nyob hauv Nekes hnov tias, cov Ixayees tab tom taug txojkev Athalis los, nws txawm ua rog rau cov Ixayees thiab ntes tau qee leej coj mus lawm. 

2 Mas cov Ixayees cog lus rau (יחוח)Yahweh tias, yog koj muab cov tibneeg no rau hauv peb txhais tes mas peb yuav muab lawv tej moos ua kom puam tsuaj huvsi li. 

3 (יחוח)Yahweh kuj mloog cov Ixayees lub suab thov, nws thiaj muab cov Khana‑as rau hauv lawv txhais tes. Lawv thiaj muab cov Khana‑as thiab lawv tej moos ua puam tsuaj tag huvsi, mas thiaj hu thaj chaw ntawd hu ua Haumas. 

Tus Nab Tooj

4 Lawv tawm ntawm roob Haus taug txojkev uas mus rau Hiavtxwv Liab kom thiaj lug dhau Edoos tebchaws mus. Thaum lawv tab tom taug kev, cov pejxeem ua tsis tau siab ntev. 

5 Cov pejxeem thiaj thuam yws (יחוח)Yahweh thiab Mauxes hais tias, ua li cas neb yuav coj peb tawm hauv Iziv tebchaws los tuag rau hauv tebchaws moj sab qhua no? Vim tsis muaj mov noj, tsis muaj dej haus, thiab peb dhuav tej zaub mov uas tsis muaj qabhau no hwv lawm. 

6 (יחוח)Yahweh thiaj tso nab muaj taug heev los rau hauv cov Ixayees mas cov nab tom lawv, cov Ixayees thiaj tuag coob heev.   

7 Cov pejxeem thiaj tuaj cuag Mauxes thiab hais tias, peb tau ua txhaum, vim peb tau thuam yws (יחוח)Yahweh thiab koj. Thov koj thov (יחוח)Yahweh muab cov nab no coj tawm ntawm peb mus.  Mauxes thiaj thov (יחוח)Yahweh pab cov pejxeem.

8 (יחוח)Yahweh hais rau Mauxes tias, koj cia li ua ib tug nab muaj taug, muab teem rau saum ib tug ncej. Txhua tus uas raug nab tom thaum lawv tsa muag saib tus nab ntawd mas lawv yuav ciaj sia nyob.

9 Ces Mauxes txawm muab tooj liab ua ib tug nab teem rau saum ib tug ncej. Yog leej twg raug nab tom es nws tsa muag saib tus nab tooj ntawd nws thiaj muaj txojsia nyob. 

​

Cov Ixayees Mus Txog Mau‑as

10 Cov Ixayees sawv kev mus tsuam chaw nyob rau ntawm Aunpaus.

11 Lawv ho sawv kev ntawm Aunpaus mus tsuam chaw nyob rau ntawm Iye‑anpalis hauv tebchaws moj sab qhua uas ncaj Mau‑as sab hnub tuaj. 

12 Lawv ho sawv kev qhov ntawd mus tsuam

chaw nyob rau hauv lub hav Xelej.

13 Lawv ho sawv kev qhov ntawd mus tsuam chaw nyob rau ntawm tus dej Anoos sab tid uas yog nyob hauv tebchaws moj sab qhua hauv cov Amau-

lais lub tebchaws, rau qhov tus dej Anoos yog Mau‑as tus ciam teb, yog nyob Mau‑as thiab Amaulais ntu nruab nrab.

14 Vim li no hauv phau ntawv uas hais txog (יחוח)Yahweh ua rog thiaj muaj hais tias, Vahes hauv Xufas, thiab tej kwj hav ntawm Anoos,

15 thiab tej hauv hav mus txog ntua lub moos As thiab nthuav mus txog Mau‑as ciam teb.

16 Lawv tawm qhov ntawd mus txog Npe‑aws uas yog lub qhov dej uas (יחוח)Yahweh hais rau Mauxes tias, cia li sau cov pejxeem los ua ke, kuv yuav pub dej rau lawv.

17 Cov Ixayees thiaj hu txoj nkauj no hais tias, lub qhov dej cia li txhawv dej los, cia peb hu nkauj,

18 yog lub qhov dej uas cov thawj khawb cia, yog lub uas cov uas ua hlob khawb tseg, lawv siv tej cwj nres thiab tej pas nrig. Lawv ho tawm ntawm tebchaws moj sab qhua mus txog Mathanas,

19 thiab tawm ntawm Mathanas mus txog Nahali‑ees, thiab tawm ntawm Nahali‑ees mus txog Npamauj,

20 thiab tawm ntawm Npa-mauj mus txog lub hav hauv Mau‑as tebchaws ze hauv roob Pixakas uas saib ntsoov rau ntuj nrag teb do. 

​

Cov Ixayees Kov Yeej Xihoos

21 Cov Ixayees txib tibneeg mus cuag Xihoos uas yog cov Amaulais tus vajntxwv mas hais tias,

22 thov cia peb hla koj lub tebchaws mus. Peb yuav tsis nkag rau hauv koj tej liaj teb, koj tej vaj txiv hmab, peb yuav tsis haus koj tej qhov dej. Peb yuav taug vajntxwv txoj niag kev loj mus kom dhau plaws koj lub teb chaws.

23 Tiamsis Xihoos tsis kheev cov Ixayees hla nws lub tebchaws. Nws txhij tub rog tuaj tawm tsam cov Ixayees hauv tebchaws moj sab qhua, nws tuaj nrog cov Ixayees ntaus rog ntawm Yahaj.

24 Cov Ixayees xuas ntaj tua nws tuag thiab txeeb tau nws lub tebchaws txij ntua tus dej Anoos mus txog ntua dej Yanpos mus ti nkaus Asmoos ciam teb, vim Asmoos ciam teb ruaj khov.

25 Cov Ixayees txeeb tau tej moos no huvsi thiab cov Ixayees mus nyob hauv cov Amaulais txhua lub moos thiab nyob hauv lub nroog Hesanpoos thiab nyob thoob plaws tej zej zog.

26 Hesanpoos yog cov Amaulais tus vajntxwv Xihoos lub nroog loj.  Nws yog tus uas ua rog rau cov Mau‑as tus vajntxwv uas kav ua nws ntej thiab nws txeeb tau Mau‑as tebchaws huvsi mus txog ntua tus dej Anoos. 

27 Vim li no cov uas txawj phim lus txiaj thiaj hais tias, cia li tuaj rau Hesanpoos, tuaj rhawv, tuaj tsim kho Xihoos lub nroog,

28 vim yog muaj hluavtaws tawm hauv Hesanpoos, muaj nplaim taws tawm hauv Xihoos lub nroog mus kub Mau‑as lub moos As thiab cov uas ua hlob hauv tej roob Anoos puam tsuaj tag. 

29 Mau‑as es, koj yuav raug txom nyem lauj, Khemauj cov tibneeg es, nej yuav raug puam tsuaj lauj! Khemauj tau ua rau nws tej tub khiav poob tebchaws tag, thiab ua rau nws tej ntxhais poob rau hauv Amaulais tus vajntxwv Xihoos tes.

30 Peb twb tua lawv pov tseg huvsi. Hesanpoos puam tsuaj mus txog ntua Dinpoos. Peb rhuav tshem lawv mus txog ntua Naufas thiab txog ntua Medenpas. 

​

Cov Ixayees Kov Yeej Npasas Tus Vajntxwv Aus

31 Yog li no cov Ixayees thiaj tau nyob hauv cov Amaulais lub tebchaws.

32 Mas Mauxes txib tibneeg mus tshuaj lub moos Yaxaws, thiab lawv kuj txeeb tau tej zej zog ib ncig ntawd thiab muab cov Amaulais uas nyob hauv ntiab khiav mus.

33 Lawv tig hlo taug txoj kev uas mus pem Npasas, mas Npasas tus vajntxwv Aus thiab nws cov pejxeem sawv daws kuj tawm tuaj ua rog rau ntawm Ede‑is. 

34 Tiamsis (יחוח)Yahweh hais rau Mauxes tias, tsis txhob ntshai nws, rau qhov kuv twb muab nws rau hauv koj txhais tes, muab kiag nws cov pejxeem thiab nws lub tebchaws huvsi, mas koj yuav ua rau nws ib yam nkaus li koj twb ua rau cov Amaulais tus vajntxwv Xihoos uas nyob hauv Hesanpoos. 

35 Lawv thiaj li tua Aus thiab nws cov tub thiab nws cov pejxeem sawvdaws tsis tshuav ib tug li. Lawv thiaj txeeb kiag nws lub teb chaws.