Npalaj Txib Tibneeg Mus Hu Npala‑as

1 Cov Ixayees txawm tshais chaw mus tsuam chaw nyob hauv lub tiaj Mau‑as ntawm ntug dej Yaladees sab hnub tuaj uas ncaj lub moos Yelikhaus. 

2 Npalaj uas yog Xipaus tus tub kuj pom txhua yam uas cov Ixayees tau ua rau cov Amaulais. 

3 Cov Mau‑as ntshai haiv neeg ntawd heev kawg, rau qhov lawv coob heev, cov Mau‑as ntshai cov Ixayees heev ua tshees nyho.

4 Cov Mau‑as thiaj hais rau Midees cov thawj tias, nimno pab niag tibneeg coob no, yuav noj txhua yam ib ncig peb tag yam nkaus li nyuj noj zaub hauv teb.  Yog li no, Npalaj uas yog Xipaus tus tub uas ua vajntxwv hauv

Mau‑as tebchaws rau lub sijhawm ntawd,

5 thiaj txib tibneeg mus hu Npala‑as uas yog Npe‑aus tus tub ntawm lub moos Pethaus uas nyob ze tus dej Yufetis hauv lub tebchaws uas yug nws hais tias, saib maj, ib haiv neeg tawm hauv Iziv tebchaws los, nkag puv nkaus lub ntiajteb lawm. Lawv tuaj nyob ti nkaus ntawm kuv lawm.

6 Thov koj tuaj pab kuv tsawm foom haiv neeg ntawd, rau qhov lawv muaj zog heev dua kuv.  Tej zaum kuv yuav ntaus yeej lawv thiab ntiab tau lawv tawm hauv lub tebchaws mus. Kuv yeej paub tias koj foom koob hmoov rau tus twg, tus ntawd yuav tau koob hmoov, thiab koj tsawm foom tus twg, tus ntawd yuav raug tej lus foom tsis zoo ntawd. 

7 Mau‑as cov thawj thiab Midees cov thawj thiaj coj ib co nqi ntiav tsawm foom mus. Lawv tuaj txog Npala‑as thiab hais Npalaj tej lus rau Npala‑as. 

8 Npala‑as hais rau lawv tias, hmo no nej pw ntawm no, mas

(יחוח)Yahweh hais li cas rau kuv, kuv li coj tej lus ntawd los qhia rau nej. Mau‑as cov thawj thiaj li nrog Npala‑as nyob ntawd.   

9 Mas (יחוח)Yahweh los hais rau Npala‑as tias, cov tibneeg uas nrog koj nyob yog leej twg?

10 Npala‑as teb (יחוח)Yahweh tias, Mau‑as tus vajntxwv Npalaj uas yog Xipaus tus tubtxib lawv tuaj hais rau kuv tias,

11 saib maj, ib haiv neeg tawm hauv Iziv tebchaws los, nkag puv nkaus lub ntiajteb lawm.  Thov koj tuaj pab kuv tsawm foom haiv neeg ntawd. Tej zaum kuv yuav ntaus yeej lawv thiab ntiab tau lawv tawm hauv lub tebchaws mus.

12 (יחוח)Yahweh hais rau Npala‑as tias, koj tsis txhob nrog lawv mus. Tsis txhob tsawm foom cov tibneeg ntawd, rau qhov kuv twb foom koob hmoov rau lawv lawm. 

13 Tagkis sawv ntxov Npala‑as kuj sawv los hais rau Npalaj cov thawj coj tias, nej cia li rov qab mus rau nej teb nej chaw, rau qhov (יחוח)Yahweh tsis kheev kuv nrog nej mus. 

14 Yog li ntawd, Mau‑as cov thawj thiaj sawv

tsees rov mus cuag Npalaj thiab hais tias, Npala‑as tsis kam nrog peb tuaj.

15 Npalaj thiaj txib dua ib co thawj coj coob dua thiab muaj meej mom loj dua thawj pab rov qab mus. 

16 Lawv tuaj txog Npala‑as thiab hais rau nws tias, Npalaj uas yog Xipaus tus tub hais li no tias, tsis txhob cia muaj ib yam abtsi tab kaum qhov uas koj tuaj cuag kuv. 

17 Kuv yeej yuav muab koj saib hlob, koj xav kom kuv ua abtsi kuv yeej yuav ua li ntawd.  Thov koj tuaj pab kuv tsawm foom haiv neeg ntawd. 

18 Tiamsis Npala‑as teb Npalaj cov thawj coj tias, txawm yog Npalaj yuav muab nws lub tsev uas muaj nyiaj muaj kub puv nkaus rau kuv los kuv yuav ua tsis tau ib yam abtsi dhau tej uas (יחוח)Yahweh uas yog kuv Tus Tswv kom kuv ua, tsis hais loj los me. 

19 Thov nej pw ib hmos ntawm no tso, xwv kuv thiaj li paub tias (יחוח)Yahweh hais abtsi tsav ntxiv rau kuv. 

20 Mas (יחוח)Yahweh los hais rau Npala‑as hmo ntawd tias, yog cov tibneeg ntawd tuaj hu koj, koj cia li sawv tsees nrog lawv mus, tiamsis koj yuav tau ua raws li uas kuv hais rau koj xwb. 

​

Tubtxib Saum Ntuj Thiab Npala‑as Tus Nees Luav

21 Tagkis sawv ntxov Npala‑as thiaj sawv nog eeb rau nws tus nees luav nrog Mau‑as cov thawj mus.

22 Tiamsis (יחוח)Yahweh npau taws rau qhov uas Npala‑as mus, mas (יחוח)Yahweh tus tubtxib saum ntuj thiaj los sawv tav Npala‑as kev tawm tsam nws.  Npala‑as caij nees luav thiab muaj ob tug tub qhe nrog nws mus. 

23 Thaum tus nees luav pom (יחוח)Yahweh tus tubtxib saum ntuj tuav rawv ntaj sawv hauv txojkev, nees luav txawm lug kiag rau tom ntug kev mus rau tom daim teb.  Mas Npala‑as nplawm tus nees luav rov qab los taug txojkev. 

24 Ces (יחוח)Yahweh tus tubtxib saum ntuj txawm mus sawv rau ntu kev nqaim uas muaj ob sab ntsa loog xov tej vaj txiv hmab thaiv ob sab kev. 

25 Thaum tus nees luav pom (יחוח)Yahweh tus tubtxib saum ntuj, ces txawm zam mus ti nkaus ntsa loog tais Npala‑as txhais kotaw rau ntawm ntsa loog.  Npala‑as kuj rov nplawm tus nees luav dua.   

26 Mas (יחוח)Yahweh tus tubtxib ho mus sawv rau tom hauv ntej uas kev nqaim heev tsis tau chaw zam rau sab xis los sab laug li. 

27 Thaum tus nees luav pom (יחוח)Yahweh tus tubtxib saum ntuj ces txawm txhos caug ntua, Npala‑as tseem caij sau nrob qaum. Npala‑as npau taws heev thiaj xuas nws tus pas nrig nplawm tus nees luav. 

28 Mas (יחוח)Yahweh qheb nees luav qhov ncauj, nees luav thiaj hais rau Npala‑as tias, kuv ua li cas rau koj es koj ntaus kuv peb zaug li no?

29 Npala‑as hais rau nees luav tias, vim koj txhob txwm zes kuv. Yog muaj ntaj nyob hauv kuv txhais tes nimno ces kuv twb muab koj tua kiag lawm. 

30 Tus nees luav hais rau Npala‑as tias, kuv tsis yog koj tus nees luav uas koj niaj hnub caij tag koj sim neej los txog niaj hnub nimno lov? Kuv tau ua li no rau koj lov? Npala‑as teb tias, tsis tau ua.

31 Ces tamsim ntawd (יחוח)Yahweh qheb Npala‑as lub qhov muag, nws thiaj pom (יחוח)Yahweh tus tubtxib saum ntuj tuav rawv ntaj sawv hauv txojkev. Npala‑as txawm nyo haus khwb nkaus hauv av. 

32 (יחוח)Yahweh tus tubtxib saum ntuj hais rau Npala‑as tias, ua cas koj ntaus koj tus nees luav peb zaug li no? Twb yog kuv tuaj tav koj, vim koj tawv nyom kuv taug txojkev no. 

33 Tus nees luav pom kuv mas lug kuv peb zaug. Yog nws tsis lug ntawm kuv ces puag ta kuv twb muab koj tua lawm es cia tus nees luav dim. 

34 Ces Npala‑as txawm hais rau (יחוח)Yahweh tus tubtxib saum ntuj tias, kuv tau ua txhaum muaj txim lawm rau qhov kuv tsis paub tias koj sawv hauv txojkev tav kuv. Yog li ntawd, nimno yog koj tsis pom zoo ces kuv yuav rov qab mus. 

35 (יחוח)Yahweh tus tubtxib saum ntuj hais rau Npala‑as tias, cia li nrog cov txivneej ntawd mus, tiamsis koj yuav tau hais tej lus uas kuv kom koj hais xwb.  Npala‑as thiaj nrog Npalaj cov thawj coj mus.

36 Thaum Npalaj hnov tias Npala‑as tuaj lawm, nws txawm mus tos Npala‑as rau ntawm Mau‑as lub moos uas ti nkaus ciam teb uas muaj tus dej Anoos ua ciam teb.

37 Npalaj hais rau Npala‑as tias, kuv twb tso tibneeg tuaj hu koj los tsis yog? Ua cas koj tsis tuaj cuag kuv? Kuv tsis muaj peevxwm muab koj saib hlob lov?  

38 Npala‑as hais rau Npalaj tias, kuv twb tuaj txog koj lawm nev.  Nimno kuv yuav hais tau abtsi?  Kuv yuav tau hais tej lus uas (יחוח)Yahweh muab tso rau hauv kuv lub qhov ncauj xwb.

39 Ces Npala‑as txawm nrog Npalaj mus txog lub moos Khiliyas Huxaus. 

40 Ces Npalaj txawm muab nyuj thiab yaj tua xyeem thiab muab ib txhia rau Npala‑as thiab cov thawj coj uas nrog nws ua ke.

41 Hnub tom qab Npalaj kuj coj Npala‑as nce mus rau pem lub roob Npamau Npa‑as, nyob qhov chaw ntawd, nws saib pom cov Ixayees ib txhia.