Npala‑as Cev (יחוח)Yahweh Lus Zaum Ib

1 Npala‑as hais rau Npalaj tias, koj cia li ua xya lub thaj xyeem rau kuv siv thiab npaj xya tus txiv nyuj, xya tus txiv yaj rau kuv ntawm no.

2 Npalaj ua raws li Npala‑as hais, mas Npalaj thiab Npala‑as muab ib tug txiv nyuj nrog ib tug txiv yaj xyeem rau saum txhua lub thaj.

3 Mas Npala‑as hais rau Npalaj tias, koj cia li mus sawv rau ntawm tej uas koj muab hlawv xyeem ib sab es kuv yuav mus. Tej zaum (יחוח)Yahweh yuav los ntsib kuv.  Mas nws qhia yam twg rau kuv, kuv yuav hais rau koj. Ces Npala‑as txawm nce mus rau saum lub ncov roob do Hau.

4 (יחוח)Yahweh los ntsib Npala‑as thiab Npala‑as hais rau (יחוח)Yahweh tias, kuv ua xya lub thaj xyeem thiab muab ib tug txiv nyuj thiab ib tug txiv yaj xyeem rau saum txhua lub thaj. 

5 (יחוח)Yahweh muab lus rau hauv Npala‑as lub qhov ncauj thiab hais tias, cia li rov mus cuag Npalaj thiab hais tej lus no rau nws. 

6 Npala‑as thiaj rov los cuag Npalaj, mas Npalaj thiab Mau‑as cov thawj tseem sawv ntsug ntawm tej uas muab hlawv xyeem ib sab. 

7 Npala‑as thiaj ua lus mos lus muag cev lus hais tias, Npalaj tau coj kuv tuaj ntawm Alas tebchaws tuaj, Mau‑as tus vajntxwv coj kuv tuaj pem tej roob uas nyob sab hnub tuaj tuaj, cia li tuaj pab kuv tsawm foom Yakhauj thiab thuam Ixayees. 

8 Kuv yuav tsawm foom tus uas (יחוח)Yahweh tsis foom tau li cas? Kuv yuav thuam tus uas (יחוח)Yahweh tsis thuam tau li cas?  

9 Kuv nyob saum roob tsuas pom lawv, kuv nyob saum ncov roob saib ntsoov lawv.  Saib maj, ib haiv neeg nws nyob nws ib cag xwb, tsis suav rau hauv lwm haiv neeg. 

10 Leejtwg yuav suav txheeb tej hmoov av hauv Yakhauj lossis suav txheeb cov Ixayees ib feem hauv plaub? Thov cia kuv tuag yam li tus tibneeg ncaj ncees, thiab thov cia kuv lub neej thaum kawg zoo ib yam li lawv. 

11 Ces Npalaj txawm hais rau Npala‑as tias, koj tau ua abtsi rau kuv? Kuv hu koj tuaj tsawm foom kuv cov yeeb ncuab, tiamsis koj tsuas yog foom koob hmoov rau lawv xwb. 

12 Npala‑as txawm teb tias, kuv yuav tau ceev faj hais tej lus uas (יחוח)Yahweh muab rau hauv kuv lub qhov ncauj los tsis yog?

​

Npala‑as Cev (יחוח)Yahweh Lus Zaum Ob

13 Mas Npalaj hais rau Npala‑as tias, koj nrog kuv mus dua ib qho chaw uas saib pom ntsoov lawv, tiamsis koj yuav pom lawv ib txhia xwb, yuav tsis pom tag nrho huvsi.  Koj tuaj qhov chaw ntawd pab kuv tsawm foom lawv.

14 Ces Npalaj txawm coj Npala‑as mus txog Xaufis daim teb nce mus txog lub ncov roob Pixakas, mas nws tib xya lub thaj xyeem thiab muab ib tug txiv nyuj nrog ib tug txiv yaj tua xyeem rau saum txhua lub thaj. 

15 Npala‑as hais rau Npalaj tias, koj cia li sawv ntawm tej uas koj muab hlawv xyeem ntawd ib sab rau thaum kuv mus cuag (יחוח)Yahweh tim ub.

16 Mas (יחוח)Yahweh los ntsib Npala‑as thiab muab lus rau hauv Npala‑ as lub qhov ncauj hais tias, cia li rov qab mus cuag Npalaj thiab hais tej lus no rau nws. 

17 Npala‑as thiaj rov los cuag Npalaj, mas Npalaj thiab Mau‑as cov thawj tseem sawv ntsug ntawm tej uas muab hlawv xyeem ib sab. Npalaj thiaj nug nws hais tias, (יחוח)Yahweh hais li cas?

18 Npala‑as thiaj ua lus mos lus muag cev lus hais tias, Npalaj cia li sawv tsees tig ntsej mloog, Xipaus tus tub es, cia li mloog kuv hais.

19 (יחוח)Yahweh tsis yog tibneeg uas yuav hais dag, nws tsis yog tibneeg cov tub uas yuav ntxeev dua siab. Nws twb hais lawm, nws yuav tsis ua raws li ntawd lov? Nws twb cog lus tseg lawm, nws yuav tsis ua kom tiav lov?

20 ()Yahweh kom kuv foom koob hmoov. Nws twb foom koob hmoov lawm, kuv muab thim tsis tau.

21 Tsis pom muaj kev txom nyem los rau Yakhauj, thiab tsis pom muaj kev ceeblaj los rau Ixayees. (יחוח)Yahweh uas yog lawv Tus Tswv nrog nraim lawv, thiab muaj suab qw tias, ib tug vajntxwv nyob hauv lawv. 

22 (יחוח)Yahweh coj lawv tawm hauv Iziv tebchaws los, nws zoo yam nkaus li tus kub nyuj qus rau lawv. 

23 Tsis muaj kev tso dab tom Yakhauj, tsis muaj kev saib yaig saib sij txov Ixayees.  Nimno luag yuav hais txog Yakhauj thiab Ixayees tias, saib (יחוח)Yahweh tau ua li cas lawm.

24Saib maj, ib haiv neeg sawv tsees yam nkaus tus maum tsov ntxhuav, thiab sawv ntsug yam nkaus tus txiv tsov ntxhuav, tsis yeem pw mus txog thaum uas noj tus qauv, thiab haus tej uas nws tom tau li ntshav. 

25 Ces Npalaj txawm hais rau Npala‑as tias, tsis txhob tsawm foom thiab tsis txhob foom koob hmoov rau lawv kiag li.

26 Mas Npala‑as teb Npalaj tias, kuv twb hais rau koj tias, txhua yam uas (יחוח)Yahweh hais, kuv ua raws nraim, los tsis yog?

 

Npala‑as Cev (יחוח)Yahweh Lus Zaum Peb 

27 Npalaj txawm hais rau Npala‑as tias, cia li nrog kuv mus, kuv yuav coj koj mus dua ib qho chaw. Tej zaum (יחוח)Yahweh yuav txaus siab cia koj tuaj qhov chaw ntawd pab kuv tsawm foom lawv. 

28 Npalaj txawm coj Npala‑as mus txog lub ncov roob Pe‑aus uas saib ntsoov rau ntuj nrag teb do. 

29 Npala‑as hais rau Npalaj tias, koj ua xya lub thaj xyeem rau kuv siv thiab npaj xya tus txiv nyuj, xya tus txiv yaj rau kuv ntawm no.

30 Npalaj txawm ua raws li Npala‑as hais, mas muab ib tug txiv nyuj nrog ib tug txiv yaj xyeem rau saum txhua lub thaj.