1 Thaum Npala‑as pom tias (יחוח)Yahweh txaus siab foom koob hmoov rau Ixayees, ces nws tsis mus saib yaig saib sij li yav tag los lawm, nws cia li saib ntsoov rau tebchaws moj sab qhua.

2 Nws tsa muag saib pom cov Ixayees tsuam chaw nyob ib xeem nyob ua ib pawg. Mas (יחוח)Yahweh tus Ntsuj Plig los kav nws lub siab,

3 nws txawm ua lus mos lus muag cev lus hais tias, no yog Npe‑aus tus tub Npala‑as tej lus, yog tus uas lub qhov muag pom tseeb lawm tej lus,

4 yog tus uas hnov (יחוח)Yahweh tej lus li lus.  Nws ua yog toog pom tus uas muaj hwjchim loj kawg nkaus, thiab nws ntog lawm, tiamsis nws lub qhov muag pom tseeb. 

5 Yakhauj es, koj tej tsev ntaub zoo nkauj kawg li lauj! Ixayees es, koj tej zej zog kuj zoo nkauj kawg li lauj!

6 Yam nkaus li tej hav uas nthuav dav, thiab zoo yam li lub vaj uas nyob ntawm ntug dej, thiab zoo yam li tej ntoo tsw qab uas (יחוח)Yahweh cog cia, thiab yam li tej ntoo ciab uas nyob ntawm ntug dej. 

7 Dej yuav ntws hauv lawv tej thoob los, lawv tej tub ki yuav muaj dej ntau.  Lawv tus vajntxwv yuav loj dua vajntxwv Akas, thiab lawv lub tebchaws yuav vam meej.

8 (יחוח)Yahweh coj lawv tawm hauv Iziv tebchaws los, lawv zoo yam nkaus li tus kub nyuj qus.  Lawv yuav noj tej tebchaws uas ua yeeb ncuab thiab muab tej pob txha lov ua tej ywb yav thiab tua xub chob luag.

9 Lawv pliab lua pw yam li tus txiv tsov ntxhuav thiab yam li tus maum tsov ntxhuav.  Leejtwg yuav kav tsa kom lawv sawv? Thov cia tus uas foom koob hmoov rau nej tau koob hmoov, thov cia tus uas tsawm foom nej raug tsawm foom.

10 Npalaj txawm npau taws rau Npala‑as, thiaj npuaj teg thiab hais rau Npala‑as tias, kuv hu koj tuaj tsawm foom kuv cov yeeb ncuab, tiamsis koj foom koob hmoov rau lawv peb zaug lawm. 

11 Koj cia li khiav rov mus rau koj vaj koj tsev.  Kuv twb hais rau koj tias, kuv yeej yuav muab koj saib hlob, tiamsis (יחוח)Yahweh tav tsis kheev koj tau lawm. 

12 Ces Npala‑as hais rau Npalaj tias, kuv tsis tau hais rau koj cov tub xa xov li no lov?  

13 Txawm yog Npalaj yuav muab nws lub tsev uas muaj nyiaj muaj kub puv nkaus rau kuv los kuv yuav ua tsis tau ib yam abtsi dhau (יחוח)Yahweh tej lus, tsis hais ua zoo lossis ua phem raws li kuv lub siab. (יחוח)Yahweh hais li cas kuv tsuas hais li ntawd xwb. 

14 Nimno kuv yuav rov qab mus rau kuv cov tibneeg.  Koj cia li los, kuv yuav qhia koj paub tias yav tom hauv ntej, haiv neeg ntawd yuav ua li cas rau koj haiv neeg. 

​

Npala‑as Cev (יחוח)Yahweh Lus Zaum Plaub

15 Nws txawm ua lus mos lus muag cev lus hais tias, no yog Npe‑aus tus tub Npala‑as tej lus, yog tus uas lub qhov muag pom tseeb lawm tej lus,

16 yog tus uas hnov (יחוח)Yahweh tej lus li lus thiab paub txog tus uas loj dua ntais lub tswvyim.  Nws ua yog toog pom tus uas muaj hwjchim loj kawg nkaus, thiab nws ntog lawm, tiamsis nws lub qhov muag pom tseeb. 

17 Kuv pom lawv, tiamsis tsis yog tamsim no, kuv saib ntsoov lawv, tiamsis tsis yog lub sijhawm ze no. Ib lub hnub qub yuav tawm hauv Yakhauj los, ib tug cwj yuav tawm hauv Ixayees los, yuav tsoo Mau‑as lub hauv pliaj, thiab yuav rhuav tshem Sej caj ces sawvdaws. 

18 Edoos tebchaws yuav poob rau lwm tus, thiab Xe‑is uas ua yeeb ncuab rau cov Ixayees yuav poob rau lwm tus, tiamsis Ixayees yuav muaj zog heev zuj zus.  19 Ib tug yuav tawm hauv Yakhauj los tswjhwm kav, thiab ua kom cov uas khiav dim hauv lub moos puam tsuaj tag. 

​

Npala‑as Cev Lus Zaum Kawg

20 Npala‑as tsa muag saib rau cov Amalej thiab ua lus mos lus muag cev lus hais tias, cov Amalej yog lub tebchaws uas ua thawj, tiamsis thaum kawg yuav raug puam tsuaj. 

21 Thiab nws tsa muag saib cov Khenais thiab ua lus mos lus muag cev lus hais tias, koj lub chaw nyob ruaj khov thiab koj lub zes nyob hauv qhov zeb.

22 Txawm li ntawd los cov Khenais yuav raug puam tsuaj tag, rau thaum cov Asus ntes nej.

23 Npala‑as kuj ua lus mos lus muag cev lus hais tias, Au thaum (יחוח)Yahweh ua li no leejtwg yuav nyob tau?  

24 Tej nkoj deg yuav tuaj hauv lub moos Khithis tuaj thiab ntaus yeej Asus thiab Enpaws, tiamsis tej nkoj ntawd yuav raug puam tsuaj thiab. 

25 Ces Npala‑as txawm sawv tsees rov mus rau nws vaj nws tsev.  Thiab Npalaj kuj taug kev mus tsev thiab.