Ixayees Pe Dab Npa‑as Ntawm Pe-aus

1 Thaum cov Ixayees nyob ntawm Sithis, cov pejxeem txawm pib deev Mau‑as tej ntxhais.

2 Cov ntxhais ntawd txawm yaum cov Ixayees mus nrog lawv xyeem qhov txhia chaw rau lawv tej dab, mas cov Ixayees thiaj nrog lawv noj haus thiab pe hawm lawv tej dab.

3 Ua li ntawd cov Ixayees thiaj ua koom tu dab Npa‑as ntawm Pe‑aus. (יחוח)Yahweh txoj kev npau taws thiaj tshwm plaws rau cov Ixayees.

4 (יחוח)Yahweh hais rau Mauxes tias, cia li muab Ixayees cov thawj coj mus tua ziab tshav ntuj rau ntawm (יחוח)Yahweh xubntiag, kom (יחוח)Yahweh txojkev chim npau taws heev thiaj li thim ntawm cov Ixayees mus.

5 Mauxes thiaj hais rau cov Ixayees uas tu plaub tias, nej txhua tus cia li muab nej cov tibneeg uas ua koom tu dab Npa‑as ntawm Pe-aus tua pov tseg.

6 Ua ciav txawm muaj ib tug yawg Ixayees coj ib tug pojniam uas yog tibneeg Midees los rau hauv nws lub tsev tab meeg Mauxes thiab tab meeg ib tsoom Ixayees sawvdaws rau thaum lawv tab tom quaj ntawm lub qhov rooj tsev ntaub sib ntsib.

7 Thaum Finehas uas yog Ele‑axas tus tub thiab yog tus pov thawj Aloos tus xeeb ntxwv pom li ntawd, nws txawm sawv tsees hauv cov pejxeem mus.  Nws tuav rawv ib rab hmuv,

8 raws tus yawg Ixayees ntawd qab mus rau hauv lub tsev thiab tib nkaug hmuv tshab plaws tus yawg Ixayees ntawd, thiab tus pojniam ntawd.  Mas tej vij sub vij sw hauv cov Ixayees thiaj tu lawm. 

9 Txawm li cas kuj xij, cov uas raug vij sub vij sw tuag muaj nees nkaum plaub txhiab leej.

10 (יחוח)Yahweh hais rau Mauxes tias,

11 Finehas uas yog Ele‑axas tus tub thiab yog tus pov thawj Aloos tus xeeb ntxwv tau tswj kuv txojkev npau taws rau cov Ixayees, rau qhov nws khib xeeb ib yam li kuv khib xeeb cov pejxeem, kuv thiaj tsis muab lawv ua kom puam tsuaj rau thaum uas kuv khib xeeb. 

12 Yog li no cia li hais rau Finehas tias, kuv cog lus sib raug zoo rau nws.

13 yog tej lus cog rau nws thiab nws caj ces uas yuav ua pov thawj mus ib txhis li, rau qhov nws khib xeeb rau nws Tus Tswv (יחוח)Yahweh thiab tau ntxuav tej kev txhaum hauv cov Ixayees. 

14 Tus yawg Ixayees uas raug tua ua ke nrog tus pojniam Midees ntawd, npe hu ua Xilis Nws yog Xalus uas ua xeem Xime‑oos ib cum tus thawj tus tub.

15 Tus pojniam Midees uas raug tua ntawd npe hu ua Khoxapis.  Nws yog Xuv uas ua cov Midees ib cum tus thawj tus ntxhais.

16 (יחוח)Yahweh hais rau Mauxes tias,

17 cia li ua rau cov Midees raug txom nyem thiab ua kom lawv puam tsuaj. 

18 Rau qhov lawv tej tswvyim phem ua rau nej raug txom nyem rau thaum lawv ntxias nej ntawm Pe-aus uas yog tim tus muam Khoxapis uas yog cov Midees tus thawj tus ntxhais uas raug tua rau hnub uas raug vij sub vij sw ntawm Pe-aus.