Cov Xeem Uas Nyob Sab Ntug Dej Yaladees Hnub Tuaj

1 Xeem Lunpees thiab xeem Nkas muaj tsiaj txhu coob coob mas lawv pom tias Yaxaws tebchaws thiab Kile‑as tebchaws yog chaw zoo yug tsiaj txhu.

2 Vim li ntawd, xeem Nkas thiab xeem Lunpees thiaj li tuaj cuag Mauxes thiab pov thawj Ele‑axas thiab cuag cov uas ua hlob hauv ib tsoom pejxeem mas hais tias,

3 Athalaus, Dinpoos, Yaxaws, Nilas, Hesanpoos, Ele‑ales, Xenpas, Nenpaus thiab Npe‑oos,

4 tej no yog lub tebchaws uas (יחוח)Yahweh twb kov yeej rau ntawm cov Ixayees lub xubntiag, yog chaw zoo yug tsiaj txhu, mas peb uas yog koj cov tub qhe muaj tsiaj txhu.

5 Thiab lawv hais tias, yog tias koj txaus siab rau peb mas thov muab lub tebchaws no pub rau peb uas yog koj cov tub qhe ua peb li teej tug.  Thov tsis txhob coj peb hla tus dej Yaladees mus.

6 Mauxes hais rau xeem Nkas thiab xeem Lunpees tias, tsim nyog nej cov kwvtij mus ua rog es cia nej nyob nej twjywm ntawm no lov?

7 Ua cas nej yuav ua rau cov Ixayees lub siab qaug zog tsis xav hla mus rau hauv lub teb chaws uas (יחוח)Yahweh pub rau lawv?

8 Nej txiv twb ua li no rau thaum kuv txib lawv mus ntawm Khades Npanias mus tshuaj lub tebchaws ntawd. 

9 Thaum lawv mus txog lub hav Ekhaus thiab tau pom lub tebchaws ntawd lawm, lawv kuj ua rau cov Ixayees lub siab qaug zog tag tsis xav txeem mus rau hauv lub tebchaws uas (יחוח)Yahweh twb pub rau lawv. 

10 Mas hnub ntawd (יחוח)Yahweh thiaj npau taws rau lawv, nws thiaj cog lus tawv hais tias,

11 txhua tus uas tawm hauv Iziv tebchaws los uas hnub nyoog muaj nees nkaum xyoo rov saud mas tsis muaj ib tug uas yuav pom lub tebchaws uas kuv cog lus tseg tias kuv yuav pub rau Anplaham, Ixaj thiab Yakhauj, rau qhov lawv tsis ua raws li kuv hais kawg siab kawg ntsws,

12 tsuas yog Yefunes uas yog cum Khenas tus tub Khalej thiab Noos tus tub Yahshua thiaj yuav pom xwb, vim nkawv ua raws li (יחוח)Yahweh hais kawg siab kawg ntsws. 

13 (יחוח)Yahweh thiaj npau taws rau cov Ixayees nws thiaj ua rau lawv mus mus los los hauv tebchaws moj sab qhua tau plaub caug xyoos mus txog thaum lawv tiam tibneeg uas ua tej uas (יחוח)Yahweh pom tias phem ntawd puam tsuaj tag huvsi. 

14 Saib maj, nej tau hlob los nyob nej txiv chaw lawm ua ib pab noob menyuam txhaum thiab ua rau (יחוח)Yahweh yim huab npau taws rau cov Ixayees.

15 Yog nej ntxeev siab tsis ua raws li nws hais, nws yuav tso lawv tseg rau hauv tebchaws moj sab qhua dua ib zaug thiab mas nej yuav ua rau cov tibneeg no puam tsuaj tag huvsi.

16 Lawv txawm los cuag nws mas hais tias, peb yuav ua nkuaj rau peb tej yaj tej tshis nyob ntawm no, thiab ua vaj ua tsev ua moos rau peb cov menyuam nyob, 17 tiamsis peb yuav coj cuab yeej ua rog thiab peb npaj txhij ua cov Ixayees ntej mus txog thaum uas coj lawv mus txog chaw.  Peb tej menyuam yaus yuav nyob hauv tej moos uas muaj ntsa loog, vim yog ntshai tej tibneeg uas nyob hauv lub tebchaws no.

18 Peb yuav tsis rov qab mus tsev txog thaum uas cov Ixayees txhua tus tau teb tau chaw ua qub txeeg qub teg. 

19 Peb yuav tsis nrog lawv tau sab ntug dej Yaladees hnub poob tid ua qub txeeg qub teg, vim peb twb tau qub txeeg qub teg sab ntug dej Yaladees hnub tuaj tim no lawm.

20 Mauxes thiaj hais rau lawv tias, yog nej ua li no, yog nej coj cuab yeej ua rog mus ua rog tab meeg (יחוח)Yahweh,

21 thiab nej txhua tus uas coj cuab yeej hla tus dej Yaladees tab meeg (יחוח)Yahweh mus txog thaum (יחוח)Yahweh ntiab nws cov yeeb ncuab khiav ntawm nws lub xubntiag mus tag,

22 thiab lub tebchaws ntawd swb kiag rau ntawm (יחוח)Yahweh xubntiag lawm, mas nej mam li rov qab los, nej thiaj li dim tej lus uas nej cog rau (יחוח)Yahweh thiab cov Ixayees.  Lub tebchaws no yuav poob ua nej tug ua nej qub txeeg qub teg tab meeg (יחוח)Yahweh.

23 Tiamsis yog nej tsis ua li no mas yeej yog nej ua txhaum rau (יחוח)Yahweh lawm ntag, nej cia li paub tseeb tias nej yuav raug nej lub txim. 

24 Cia li ua tej moos rau nej cov menyuam thiab ua nkuaj rau nej tej yaj tej tshis thiab ua raws li uas nej cog lus cia lawd.   

25 Xeem Nkas thiab xeem Lunpees hais rau Mauxes tias, yawg hlob, peb uas yog koj cov tub qhe yuav ua raws li uas koj hais kom peb ua.

26 Peb cov menyuam yaus thiab peb cov pojniam thiab peb tej yaj tej tshis thiab peb tej tsiaj txhu huvsi yuav nyob tej moos hauv Kile‑as tebchaws no.

27 Tiamsis peb uas yog koj cov tub qhe txhua tus txivneej yuav coj cuab yeej ua rog hla mus ua rog tab meeg (יחוח)Yahweh raws li uas koj hais kom peb ua. 

28 Mauxes thiaj li hais txog ob xeem ntawd rau pov thawj Ele‑axas thiab Noos tus tub Yahshua thiab txhua cum tus thawj hauv Ixayees cov xeem.

29 Mauxes hais rau lawv tias, yog xeem Nkas thiab xeem Lunpees txhua tus uas coj cuab yeej ua rog tab meeg (יחוח)Yahweh yuav nrog nej hla tus dej Yaladees mus es yog lub tebchaws swb nej lawm ces nej cia li muab lub tebchaws Kile‑as rau lawv ua lawv tug.

30 Tiamsis yog lawv tsis coj cuab yeej nrog nej hla mus, lawv yuav nrog nej tau Khana‑as tebchaws ua lawv tug. 

31 Xeem Nkas thiab xeem Lunpees teb tias, (יחוח)Yahweh hais rau peb uas yog koj cov tub qhe li cas ces peb yuav ua li ntawd. 

32 Peb yuav coj cuab yeej hla tab meeg (יחוח)Yahweh mus rau hauv Khana‑as tebchaws, tiam-sis peb tej teb uas ua peb tug, ua peb qub txeeg qub teg yuav nyob sab dej Yaladees tim no. 

33 Mauxes thiaj muab tej tebchaws no rau xeem Nkas thiab xeem Lunpees thiab rau Yahxej tus tub Manaxes xeem ib nrab, yog muab cov Amaulais tus vajntxwv Xihoos lub tebchaws thiab muab vajntxwv Aus lub tebchaws Npasas rau lawv, tag nrho tebchaws thiab tej moos thiab tej tebchaws uas nyob ib ncig, yog tej moos thoob plaws lub tebchaws ntawd huvsi.

34 Mas xeem Nkas thiaj li rhawv tej moos no, yog Dinpoos, Athalaus, Alau‑ aws,

35 Athausofas, Yaxaws, Yaunpehas,

36 Npenilas thiab Npehalas, yog tej moos uas muaj ntsa loog, thiab lawv ua nkuaj yaj nkuaj tshis.

37 Xeem Lunpees rhawv tej moos no, yog Hesanpoos, Ele‑ales, Khiliyatha‑is,   38 Nenpaus thiab Npa‑as Me‑oos, (ob lub moos no yuav txauv dua npe tshiab) thiab Ximas.  Lawv txauv dua npe tshiab rau tej moos uas lawv rhawv ntawd. 

39 Manaxes tus tub Makhis cum mus txeeb tau tebchaws Kile‑as thiab ntiab cov Amaulais uas nyob ntawd khiav tag. 

40 Mauxes muab tebchaws Kile‑as rau Makhis uas yog Manaxes tus tub mas nws mus nyob rau hauv.

41 Manaxes tus tub Ya‑is mus txeeb tau lawv tej zej zog thiaj li tis npe hu ua Havauya‑is.

42 Naunpas mus txeeb tau Khenaj thiab tej zej zog ib ncig ntawd, thiaj tis npe hu ua Naunpas raws li nws lub npe.