Aloos Txawb Lub Teeb

1 (יחוח)Yahweh hais rau Mauxes tias,

2 cia li hais rau Aloos tias, thaum yuav txawb xya lub teeb mas txawb kom ci pom kev rau ntawm tus kav teeb sab xubntiag. 

3 Mas Aloos kuj ua raws li ntawd, nws txawb cov teeb kom ci pom kev rau ntawm tus kav teeb sab xubntiag raws li (יחוח)Yahweh hais rau Mauxes.

4 Tus kav teeb ntawd ua zoo li no, yog muab kub ntaus ua lub taw thoob plaws txog ntua cov paj puavleej yog muab kub ntaus ua. Ua li no Mauxes thiaj ntaus tus kav teeb raws li tus qauv uas (יחוח)Yahweh qhia rau Mauxes. 

​

Ua Kevcai Tsa Cov Levis

5 (יחוח)Yahweh hais rau Mauxes tias,

6 cia li muab cov Levis rho tawm hauv cov Ixayees los thiab muab lawv ua kevcai ntxuav kom huv.

7 Koj yuav tau ua kevcai li no ntxuav lawv kom huv, muab cov dej uas ua kevcai ntxuav los nchos rau lawv. Kom lawv xuas chais chais plaub ib ce huvsi thiab ntxhua tej tsoos tsho ua kevcai ntxuav kom huv.

8 Kom lawv muab ib tug thav txiv nyuj thiab cov hmoov mog zoo zoo ntse roj uas ua kevcai xyeem qoob loo, thiab koj yuav muab ib tug thav txiv nyuj uas ua kevcai xyeem daws txim.

9 Thiab koj yuav coj cov Levis tuaj rau ntawm lub tsev ntaub sib ntsib thiab kom ib tsoom pejxeem Ixayees tuaj txoos ua ke. 

10 Thaum uas coj cov Levis tuaj nyob rau ntawm (יחוח)Yahweh xubntiag mas cov Ixa-yees yuav tau muab tes npuab rau saum cov Levis,

11 thiab Aloos yuav muab cov Levis xyeem rau (יחוח)Yahweh, yog yam uas rho hauv cov Ixayees cev xyeem kom lawv thiaj ua tau (יחוח)Yahweh tes haujlwm.

12 Mas cov Levis yuav muab tes npuab saum ob tug txiv nyuj taubhau, ces koj muab ib tug los ua kevcai xyeem daws txim, thiab muab ib tug los ua kevcai hlawv huvsi xyeem rau (יחוח)Yahweh thiaj ntxuav tau cov Levis kev txhaum.

13 Koj yuav kom cov Levis sawv ntsug ntawm Aloos thiab Aloos cov tub xubntiag thiab koj yuav muab lawv ua kevcai cev xyeem rau (יחוח)Yahweh.

14 Ua li no koj yuav muab cov Levis cais ntawm cov Ixayees mas cov Levis yuav yog kuv tug.

15 Thaum koj twb ua kevcai ntxuav lawv kom huv thiab ua kevcai muab lawv cev xyeem rau (יחוח)Yahweh lawd, txij ntawd mus, cov Levis yuav nkag mus ua haujlwm ntawm lub tsev ntaub sib ntsib,

16 rau qhov lawv raug muab rho tawm hauv cov Ixayees los pub kiag rau kuv.  Kuv muab lawv los ua kuv tug theej txhua tus menyuam uas yug hauv lub plab los, yog theej cov Ixayees txhua tus tub hlob,

17 rau qhov cov Ixayees txhua tus tub hlob tsis hais menyuam tibneeg menyuam tsiaj txhu los puavleej yog kuv li. Hnub uas kuv tau tua tej tub hlob hauv Iziv tebchaws huvsi, kuv cais kom lawv dawb huv rau kuv lawm.  

18 Kuv twb muab cov Levis los theej cov Ixayees txhua tus tub hlob lawm. 

19 Kuv twb muab cov Levis rho tawm hauv cov Ixayees los pub kiag rau Aloos thiab Aloos cov tub kom nyob cov Ixayees chaw ua haujlwm ntawm lub tsev ntaub sib ntsib thiab ntxuav cov Ixayees kev txhaum, kom thiaj tsis muaj vij sub vij sw los raug cov Ixayees rau thaum uas lawv tuaj ze lub chaw pe hawm

(יחוח)Yahweh. 

20 Mauxes thiab Aloos thiab ib tsoom pejxeem Ixayees sawvdaws tau ua rau cov Levis li no.  Raws li (יחוח)Yahweh hais kom Mauxes ua rau cov Levis mas cov Ixayees kuj ua raws nraim. 

21 Cov Levis kuj ua kevcai ntxuav kom huv thiab ntxhua lawv tej tsoos tsho mas Aloos ua kevcai muab lawv cev xyeem rau ntawm (יחוח)Yahweh xub ntiag thiab Aloos ua kevcai ntxuav lawv kev txhaum lawv thiaj li huv.

22 Txij thaum ntawd los cov Levis thiaj li mus ua haujlwm ntawm lub tsev ntaub sib ntsib, yog pab Aloos thiab Aloos cov tub.  Raws li (יחוח)Yahweh hais kom Mauxes ua rau cov Levis ces lawv thiaj ua tau li ntawd. 

​

Cov Levis Li Hnub Nyoog Ua Haujlwm 

23 (יחוח)Yahweh hais rau Mauxes tias,

24 no ntsig txog cov Levis, cov Levis uas hnub nyoog nees nkaum tsib xyoos rov saud, yuav nkag mus ua haujlwm ntawm lub tsev ntaub sib ntsib.

25 Thaum lawv hnub nyoog muaj tsib caug xyoo, lawv yuav tau so tsis txhob ua hauj lwm lawm. 

26 Tiamsis lawv pab tau lawv cov kwvtij ua haujlwm ntawm lub tsev ntaub sib ntsib, tiamsis tsis txhob ua haujlwm li qub.  Koj yuav ua li no rau thaum koj feeb haujlwm rau cov Levis ua.