Txoj Kevcai Hla Dhau

1 Xyoo uas ob, lub ib hlis, suav txij thaum lawv tawm hauv Iziv tebchaws los, ()Yahweh hais rau Mauxes hauv tebchaws moj sab qhua Xinais tias,

2 kom cov Ixayees ua txoj Kevcai Hla Dhau raws li lub sijhawm uas teem cia.

3 Lub hli no, hnub xiab kaum plaub, thaum yuav tsaus ntuj, nej yuav tau ua Kevcai Hla Dhau raws li lub sijhawm teem cia. Nej yuav tau ua raws li tej kab ke thiab tej kevcai huvsi.

4 Mauxes thiaj hais kom cov Ixayees ua txoj Kevcai Hla Dhau. 

5 Lawv thiaj ua txoj Kevcai Hla Dhau rau lub ib hlis, hnub xiab kaum plaub, thaum tsaus ntuj ntawm tebchaws moj sab qhua Xinais.  Tej uas (יחוח)Yahweh tau hais rau Mauxes, mas cov Ixayees kuj ua txhua yam huvsi. 

6 Muaj qee tus txivneej uas qias tsis huv, vim yog kov tus tuag thiaj ua tsis tau Kevcai Hla Dhau rau hnub ntawd, lawv thiaj tuaj cuag Mauxes thiab Aloos rau hnub ntawd.

7 Lawv hais rau Mauxes tias, peb qias tsis huv vim yog peb kov tus tuag.  Ua cas yuav txwv tsis kheev peb koom nrog cov Ixayees coj (יחוח)Yahweh tej qhov txhia chaw tuaj xyeem rau lub sijhawm uas teem tseg?

8 Mas Mauxes hais rau lawv tias, nyob twj ywm tos, mus txog thaum kuv hnov saib (יחוח)Yahweh hais li cas txog nej.

9 (יחוח)Yahweh hais rau Mauxes tias, 10cia li hais rau cov Ixayees tias, yog nej cov leejtwg lossis nej cov caj ces leejtwg qias tsis huv vim yog kov tus tuag, lossis mus kev deb, tus ntawd kuj tseem ua Kevcai Hla Dhau rau (יחוח)Yahweh. 

11 Cia lawv ua Kevcai Hla Dhau rau lub ob hlis, hnub xiab kaum plaub thaum tsaus ntuj. Lawv noj ncuav tsis xyaw keeb thiab noj txuj lom iab.

12 Lawv tsis txhob tseg ib qho seem rau kaj ntug, thiab tsis txhob muab tus menyuam yaj ntawd ib tug pob txha lov li. Lawv yuav tau coj raws li tej kab ke ua Kevcai Hla Dhau txhua nqe huvsi.

13 Tiamsis tus uas huv thiab tsis tau mus kev deb uas ho tseg tsis ua Kevcai Hla Dhau mas muab nws txiav tawm hauv nws haiv neeg, vim yog nws tsis coj (יחוח)Yahweh tej qhov txhia chaw tuaj xyeem raws li lub sijhawm uas teem tseg, mas nws yuav ris nws lub txim.

14 Yog lwm haiv neeg los nrog nej nyob leejtwg thiab xav ua Kevcai Hla Dhau rau (יחוח)Yahweh, nws yuav tau coj raws li tej kab ke thiab tej kevcai uas ua Kevcai Hla Dhau. Nej muaj tib txoj kevcai rau lwm haiv neeg uas nrog nej nyob thiab rau haiv neeg Ixayees coj. 

​

Tauv Huab Nyob Saum Lub Tsev Ntaub

15 Hnub uas tsa lub tsev ntaub, tauv huab los laum nkaus lub tsev ntaub, yog lub tsev ntaub uas muaj (יחוח)Yahweh tej lus nyob rau hauv. Thaum tsaus ntuj, tauv huab uas nyob saum lub tsev ntaub ntawd, zoo yam nkaus li nplaim hluavtaws mus txog kaj ntug.

16 Muaj li no tsis tu ncua li. Nruab hnub tauv huab laum nkaus, hmo ntuj mas zoo li nplaim hluavtaws. 

17 Thaum twg tauv huab sawv saum lub tsev ntaub lawm, ces cov Ixayees kuj tshais chaw mus thaum ntawd. Tauv huab mus nqis los rau qhov twg, cov Ixayees kuj tsuam chaw nyob rau qhov ntawd.

18 Cov Ixayees kuj tshais chaw mus raws li (יחוח)Yahweh hais, thiab tsuam chaw nyob raws li (יחוח)Yahweh hais.  Tauv huab nyob saum lub tsev ntaub ntev li cas, lawv kuj nyob hauv lub chaw ntev li ntawd.

19 Txawm yog tauv huab nyob saum lub tsev ntaub ntau hnub los cov Ixayees kuj ua raws li uas (יחוח)Yahweh hais tsis tshais chaw mus li.

20 Qee zaum tauv huab nyob saum lub tsev ntaub tsis muaj pes tsawg hnub, lawv kuj nyob hauv lub chaw raws li (יחוח)Yahweh hais, thiab tshais chaw mus raws li

(יחוח)Yahweh hais.

21 Qee zaum tauv huab nyob thaum tsaus ntuj txog kaj ntug xwb. Thaum kaj ntug tauv huab sawv mus lawm, lawv kuj tshais chaw mus. Yog tauv huab nyob ib hnub ib hmos mas thaum tauv huab sawv mus lawm, lawv kuj tshais chaw mus. 

22 Txawm yog tauv huab nyob saum lub tsev ntaub ob hnub lossis ib hlis, lossis ntev dua, los cov Ixayees nyob hauv lub chaw ntev li ntawd tsis tshais chaw mus.  Thaum tauv huab sawv mus, lawv kuj tshais chaw mus thaum ntawd.

23 Lawv tsuam chaw nyob raws li (יחוח)Yahweh hais, thiab lawv tshais chaw mus raws li (יחוח)Yahweh hais. Lawv ua raws li (יחוח)Yahweh tej lus cob qhia, yog raws li tej lus uas (יחוח)Yahweh kom Mauxes hais.