Kho Mob Ntawm Lub Pas Dej​

1 Dhau ntawd, txog ib lub caij uas cov Yahdaim ua kevcai, (יהושע)Yahshua txawm mus rau nram Yeluxalees. 2 Ntawm Rooj Loog Yaj hauv Yeluxalees muaj ib lub pas dej uas lus Hebrew hu hais tias Npexathas, muaj tsib lub tsev so nkaum tshav. 3 Hauv cov tsev ntawd muaj tibneeg mob pw coob coob, tus dig muag, tus ceg tawv thiab tus tuag tes tuag taw muaj tag huvsi. 5 Muaj ib tug yawg mob tau peb caug yim xyoo los lawm nyob qhov ntawd.

6 Thaum (יהושע)Yahshua pom nws thiab paub hais tias nws pw ntawd ntev los lawm, (יהושע)Yahshua txawm hais rau nws hais tias, koj puas xav zoo kiag? 

7 Tus yawg mob ntawd teb (יהושע)Yahshua hais tias, yawg hlob, thaum dej tabtom ntas, tsis muaj leejtwg muab kuv raus rau hauv pas dej. Thaum kuv tabtom yuav nqes mus rau hauv xwb ces lwm tus twb nqes mus ua ntej lawm.

8 (יהושע)Yahshua hais rau nws hais tias, cia li sawv tsees thiab nqa kiag koj lub chaw pw thiab mus kev. 9 Tamsim ntawd nws txawm zoo kiag thiab nws nqa nws lub chaw pw thiab mus kev. Hnub ntawd yog hnub Sabbath. 10 Cov Yahdaim txawm hais rau tus uas mob zoo ntawd hais tias, hnub no yog hnub Sabbath, qhov uas koj nqa koj lub chaw pw kod kuj txhaum kevcai lawm. 11 Tus yawg ntawd teb lawv hais tias, tus uas kho kuv zoo hais rau kuv hais tias, cia li nqa kiag koj lub chaw pw thiab mus kev. 12 Lawv txawm nug nws hais tias, tus yawg uas hais kom koj nqa kiag koj lub chaw pw mus yog leejtwg? 

13 Tus uas mob zoo ntawd kuj tsis paub hais tias yog leejtwg, rau qhov (יהושע)Yahshua twb ncaim hauv cov tibneeg coob coob ntawd mus lawm. 14 Los rau tom qab, (יהושע)Yahshua ntsib tug yawg ntawd ntawm lub tuam tsev. (יהושע)Yahshua txawm hais rau nws hais tias, saib maj, koj twb zoo lawm. Tsis txhob ua txhaum dua lawm xwv thiaj tsis muaj xwm txheej phem dua li no los raug koj. 15 Tus yawg ntawd thiaj tawm mus hais rau cov Yahdaim hais tias, tus uas kho nws zoo yog (יהושע)Yahshua. 16 Vim li no cov Yahdaim thiaj tsim txom (יהושע)Yahshua rau qhov nws ua tej no rau hnub Sabbath. 17 Tiamsis (יהושע)Yahshua hais rau lawv hais tias, kuv Leej Txiv tseem ua haujlwm tsis tu ncua, kuv kuj ua thiab. 18 Vim li no cov Yahdaim yimhuab nrhiav kev txov (יהושע)Yahshua, tsis yog vim qhov uas nws tsis ua raws li tej kevcai hnub Sabbath xwb, tiamsis nws tseem hu Abba (יחוח)Yahweh ua Leej Txiv yam nkaus li nws nrog Abba (יחוח)Yahweh sib luag zos ntag.

​

Leej Tub Li Hwjchim

19 (יהושע)Yahshua hais rau lawv hais tias, kuv hais tseeb rau nej hais tias, Leej Tub yeej ua tsis tau ib yam abtsi raws li nws lub siab, tsuas yog nws ua tej uas nws pom Leej Txiv ua xwb. Vim Leej Txiv ua yam twg, Leej Tub kuj ua ib yam li ntawd. 20 Rau qhov Leej Txiv hlub Leej Tub thiab qhia txhua yam uas nws ua rau Leej Tub pom. Thiab Leej Txiv yuav qhia tej haujlwm uas loj dua li ntawd rau Leej Tub pom, mas nej yuav xav tsis thoob. 21 Leej Txiv tsa cov tibneeg tuag sawv rov los thiab pub txojsia rau lawv li cas, Leej Tub kuj yuav pub txojsia rau cov uas nws xav pub ib yam li ntawd.

22 Leej Txiv tsis txiav txim rau leejtwg, tiamsis nws muab qhov uas txiav txim cob rau Leej Tub, 23 kom txhua tus thiaj li hwm Leej Tub ib yam li hwm Leej Txiv. Tus uas tsis hwm Leej Tub tus ntawd kuj tsis hwm Leej Txiv uas txib Leej Tub los. 24 Kuv hais tseeb rau nej hais tias, tus uas mloog kuv lus thiab ntseeg tus uas txib kuv los, tus ntawd kuj tau txojsia ib txhis tsis kawg. Nws yuav tsis raug txiav txim, nws twb hla txojkev tuag mus tau txojsia lawm. 25 Kuv hais tseeb rau nej hais tias, lub sijhawm tabtom los thiab twb los txog lawm mas cov tibneeg tuag yuav hnov Abba (יחוח)Yahweh tus Tub lub suab hu thiab cov uas tau hnov yuav muaj txojsia nyob.

26 Rau qhov Leej Txiv muaj txojsia rau hauv nws tus kheej li cas, nws kuj pub Leej Tub muaj txojsia rau hauv Leej Tub tus kheej ib yam li ntawd, 27 thiab pub Leej Tub muaj hwj-chim txiav txim, rau qhov nws kuj yog Neeg Leej Tub.

28 Tsis txhob phimhwj rau tej no li, vim hais tias lub sijhawm tabtom los mas txhua tus uas nyob hauv qhov ntxa yuav hnov Leej Tub lub suab hu 29 thiab yuav tawm los. Cov uas ua zoo yuav sawv rov los tau txojsia, cov uas ua phem yuav sawv rov los raug txiav txim.

​

(יהושע)Yahshua Cov Timkhawv

30 Kuv yuav ua ib yam abtsi raws li kuv lub siab tsis tau. Kuv tau hnov li cas kuv kuj txiav txim li ntawd. Kuv yeej txiav txim ncaj rau qhov kuv tsis ua raws li kuv lub siab xwb tiamsis ua raws li tus uas txib kuv los lub siab.

31 Yog kuv rov ua timkhawv txog kuv tus kheej, kuv tej lus timkhawv kuj tsis tseeb.

32 Muaj dua ib tug ua timkhawv txog kuv, thiab kuv paub hais tias tej lus timkhawv uas nws ua txog kuv ntawd muaj tseeb. 33 Nej twb tso tibneeg mus cuag Yahchanan, thiab Yahchanan kuj ua timkhawv txog qhov tseeb. 34 Kuv tsis yuav tibneeg tej lus timkhawv. Kuv hais tej no xwv nej thiaj dim. 35 Yahchanan yog lub teeb uas taws ci lam lug thiab nej kuj zoo siab xyiv fab rau Yahchanan qhov kaj ib nyuag ntu. 36 Tiamsis tej lus timkhawv uas kuv muaj loj dua Yahchanan tej lus timkhawv, rau qhov tej haujlwm uas Leej Txiv muab cob rau kuv ua kom tiav, yog tej haujlwm uas kuv tabtom ua no, ua timkhawv txog kuv hais tias Leej Txiv txib kuv los. 37 Thiab Leej Txiv uas txib kuv los kuj ua timkhawv txog kuv. Nej tsis tau hnov nws lub suab thiab tsis tau pom nws lub cev, 38 thiab nej tsis muaj nws tej lus nyob ruaj rau hauv nej, rau qhov nej tsis ntseeg tus uas Leej Txiv txib los. 39 Nej tshawb nrhiav Abba (יחוח)Yahweh txojlus rau qhov nej xav hais tias yuav ntsib txojsia ib txhis tsis kawg hauv txojlus ntawd. Txojlus ntawd kuj ua timkhawv txog kuv, 40 tiamsis nej tsis yeem los cuag kuv xwv thiaj tau txojsia. 41 Kuv tsis txais koob meej ntawm tibneeg. 42 Tiamsis kuv paub hais tias nej tsis hlub Abba (יחוח)Yahweh. 43 Kuv tuaj hauv kuv Leej Txiv lub npe los nej tsis lees yuav kuv. Yog luag tuaj hauv lawv tus kheej lub npe, nej kuj lees yuav tus ntawd. 44 Nej yuav ua li cas ntseeg kuv, vim nej tau tej koob meej uas ib leeg muab rau ib leeg xwb, tsis yog nrhiav lub koob meej uas Abba (יחוח)Yahweh tib leeg muab. 45 Tsis txhob xav hais tias kuv yuav tshum nej rau Leej Txiv. Nws muaj nws ib tug uas tshum nej lawm. Nws yog Mauxes, tus uas nej ntseeg siab. 46 Yog nej ntseeg Mauxes, nej kuj yuav ntseeg kuv, rau qhov Mauxes twb sau qhia txog kuv lawm. 47 Yog nej tsis ntseeg Mauxes tej lus uas sau tseg, nej yuav ua li cas ntseeg kuv tej lus?