YAHCHANAN 6

Pub Mov Rau Tsib Txhiab Leej Noj

(Mth. 14:13-21; Ych. Mk. 6:30-44;  Lk. 9:10-17)

1 Dhau ntawd (יהושע)Yahshua hla Hiavtxwv Kalilais uas yog Hiavtxwv Thinpelas mus rau sab tim ub. 2 Muaj tibneeg coob coob raws nws qab mus vim yog lawv pom tej txujci tseem ceeb uas (יהושע)Yahshua ua rau cov tibneeg muaj mob.

3 (יהושע)Yahshua nce mus rau pem roob nrog nws cov thwjtim zaum ua ke.

4 Thaum ntawd ze lub sijhawm uas cov Yahdaim ua kevcai Hla Dhau. 5 Thaum (יהושע)Yahshua tsa muag saib pom tibneeg coob heev tuaj cuag nws, nws txawm hais rau Philip hais tias, peb yuav mus yuav mov qhovtwg los rau cov tibneeg no noj? 6 (יהושע)Yahshua hais li ntawd sim Philip, rau qhov (יהושע)Yahshua yeej paub hais tias nws yuav ua abtsi. 7 Philip teb (יהושע)Yahshua hais tias, ob puas denalias ntshe yuav tau mov los twb tsis txaus lawv ib leej noj ib nyuag kaug.

8 Simon Kepha tus kwv Andrew uas yog ib tug thwjtim hais rau (יהושע)Yahshua hais tias, 9 muaj ib tug tub nyob no, muaj tsib lub ncuav qeb thiab ob tug ntses. Tiamsis qhov nyuag no yuav ua li cas txaus rau tibneeg coob li no noj?

10 (יהושע)Yahshua hais tias, kom cov tibneeg zaum. Qhov chaw ntawd muaj nyom ntau, ces cov tibneeg txawm zaum. Suav cov txivneej xwb muaj kwvlam li tsib txhiab leej.

11 (יהושע)Yahshua txawm muab cov ncuav thiab ob tug ntse ntawd los thiab nws ua Abba (יחוח)Yahweh tsaug tag. Nws muab faib rau cov tibneeg zaum ntawd noj mas lawv yeej noj seem noj so thiab noj tsau npo li. 12 Thaum lawv noj tsau lawm, (יהושע)Yahshua hais rau cov thwjtim hais tias, cia li khaws tej uas lawv noj tsis tag cia, tsis txhob cia ib nyuag qho poob xuam mus. 13 Lawv txawm khaws tej uas cov tibneeg ntawd noj tsis tag ntawm tsib lub ncuav qeb ntawd tau kaum ob tawb puv nkaus. 14 Thaum cov tibneeg pom tej txujci tseem ceeb uas (יהושע)Yahshua ua ntawd, lawv txawm hais tias, tus no yeej yog tus xibhwb cev Abba (יחוח)Yahweh lus uas yuav los rau hauv ntiajteb tiag tiag li. 15 Thaum (יהושע)Yahshua paub hais tias lawv twb yuav tuaj yuam nws coj mus tsa ua vajntxwv, nws txawm nce ib leeg mus pem roob lawm.

​

(יהושע)Yahshua Mus Kotaw Saum Nplaim Dej

(Mth. 14:22-33; Ych. Mk. 6:45-52)

16 Thaum yuav tsaus ntuj, (יהושע)Yahshua cov thwjtim txawm mus rau nram hiav-txwv, 17 thiab nce nkoj hla hiavtxwv mus rau lub moos Khapena-us. Thaum ntawd twb tsaus ntuj zuag lawm. (יהושע)Yahshua tseem tsis tau los txog rau ntawm lawv.

18 Txawm muaj cua daj cua dub ntsawj dej ntas cuag abtsi. 19 Thaum lawv nquam nkoj mus kwvlam li tsib rau kilumev lawm, lawv pom (יהושע)Yahshua mus kotaw saum nplaim dej hiavtxwv tabtom tuaj ze lub nkoj. Lawv ntshai kawg,

20 tiamsis(יהושע)Yahshua hais rau lawv hais tias, yog kuv xwb. Tsis txhob ntshai 21 Lawv thiaj zoo siab hlo cia (יהושע)Yahshua nce rau hauv lub nkoj. Tamsim ntawd lub nkoj txawm mus txog ntua tim ntug lawm, yog qhov chaw uas lawv yuav mus ntag.

​

(יהושע)Yahshua Yog Cov Mov Pub Txojsia

22 Hnub tom qab cov tibneeg uas tseem nyob sab ntug dej hiavtxwv tim ub pom hais tias tsuas muaj tib lub nkoj nyob ntawd xwb thiab twb tsis pom (יהושע)Yahshua nrog cov thwj tim nce nkoj mus, tsuas yog (יהושע)Yahshua cov thwjtim mus xwb. 23 Tamsim ntawd muaj dua ib co nkoj tuaj ntawm Thinpelas tuaj nres ze lub chaw uas lawv tau noj ncuav uas (יהושע)Yahshua ua Abba (יחוח)Yahweh tsaug lawd. 24 Thaum cov tibneeg ntawd pom hais tias (יהושע)Yahshua thiab nws cov thwjtim tsis nyob qhov ntawd lawm, lawv txawm nce tej nkoj ntawd mus nrhiav (יהושע)Yahshua rau ntawm lub moos Khapena-us. 25 Thaum lawv ntsib (יהושע)Yahshua sab hiavtxwv tim ub lawv hais rau nws hais tias, Lanpis, koj tuaj rau ntawm no thaum twg lawm? 

26 (יהושע)Yahshua teb lawv hais tias, kuv hais tseeb rau nej hais tias, qhov uas nej nrhiav kuv tsis yog vim nej pom tej txujci tseem ceeb tiamsis yog nej tau noj ncuav tsau lawm. 27 Tsis txhob ua haujlwm nrhiav tej mov uas txawj lwj, tiamsis yuav tsum nrhiav tej mov uas nyob ruaj thiaj tau txojsia ib txhis tsis kawg, uas Neeg Leej Tub yuav pub rau nej. Rau qhov Abba ((יחוח)Yahweh uas yog Leej Txiv twb nias hom thawj qhwv nws lawm.

28 Lawv txawm hais rau (יהושע)Yahshua hais tias, peb yuav tsum ua li cas thiaj ua tau Abba (יחוח)Yahweh tes haujlwm 29 (יהושע)Yahshua teb lawv hais tias, Abba (יחוח)Yahweh tes haujlwm yog li no, yog ntseeg tus uas Abba (יחוח)Yahweh txib los. 30 Lawv txawm hais rau nws hais tias, yog li ntawd koj yuav ua txujci abtsi rau peb pom peb thiaj li ntseeg koj? Koj yuav ua abtsi? 

31 Peb tej poj koob yawm txwv tau noj mana hauv tebchaws moj sab qhua, raws li muaj lus sau cia hais tias, nws pub zaub mov saum ntuj rau lawv noj.

32 (יהושע)Yahshua txawm hais rau lawv hais tias, kuv hais tseeb rau nej hais tias, tsis yog Mauxes pub cov mov saum ntuj rau nej. Tiamsis kuv Leej Txiv pub cov tseem mov saum ntuj los rau nej.  33 Rau qhov Abba (יחוח)Yahweh cov mov yog tus uas los saum ntuj los thiab pub txojsia rau tibneeg ntiajteb. 34 Lawv hais rau nws hais tias, Xibhwb, thov pub cov mov ntawd rau peb noj mus li.

35 (יהושע)Yahshua hais rau lawv hais tias, kuv yog cov mov pub txojsia. Tus uas los cuag kuv yuav tsis tshaib, thiab tus uas ntseeg kuv yuav tsis nqhis dua li lawm. 36 Tiamsis kuv hais rau nej hais tias nej twb pom kuv los nej tseem tsis ntseeg kuv. 37 Txhua tus uas Leej Txiv muab pub rau kuv yeej yuav los cuag kuv. Thiab tus uas los cuag kuv, kuv yuav tsis muab laim pov tseg kiag li. 38 Rau qhov kuv los saum ntuj los tsis yog los ua raws li kuv lub siab xwb tiamsis ua raws li tus uas txib kuv los lub siab. 39 Tus uas txib kuv los lub siab xav li no, yog txhua tus uas nws muab cob rau kuv lawd yuav tsis ploj ib tug li, thiab hnub kawg kuv yuav tsa kom tus ntawd ciaj sawv rov los. 40 Rau qhov kuv Leej Txiv lub siab xav li no, yog txhua tus uas pom Leej Tub thiab ntseeg nws yuav tau txojsia ib txhis tsis kawg thiab kuv yuav tsa tus ntawd ciaj sawv rov los rau hnub kawg. 41 Thaum ntawd cov Yahdaim txawm yws (יהושע)Yahshua rau qhov nws hais tias, kuv yog cov mov uas los saum ntuj los. 42 Lawv txawm hais tias, tus no yog (יהושע)Yahshua, uas yog Yahseph tus tub los tsis yog? Nws niam nws txiv peb kuj paub. Ua li cas nimno nws yuav hais tias, kuv nqes saum ntuj los no?

 43 (יהושע)Yahshua teb lawv hais tias, tsis txhob sib yws kiag li.

44 Tsis muaj leejtwg yuav los cuag tau kuv, tsuas yog Leej Txiv uas txib kuv los rub nws los xwb, thiab kuv yuav tsa tus ntawd ciaj sawv los rau hnub kawg.

45 Muaj lus sau cia rau hauv cov xibhwb cev Abba (יחוח)Yahweh lus phau ntawv hais tias, Abba (יחוח)Yahweh yuav qhuab qhia lawv txhua tus. Txhua tus uas tau mloog thiab tau kawm paub ntawm Leej Txiv kuj los cuag kuv. 46 Tsis muaj leejtwg tau pom Leej Txiv tsuas yog tus uas los ntawm Abba (יחוח)Yahweh los, nws thiaj tau pom Leej Txiv lawm. 47 Kuv hais tseeb rau nej hais tias, tus uas ntseeg kuj muaj txojsia ib txhis tsis kawg. 48 Kuv yog cov mov pub txojsia.

49 Nej tej poj koob yawm txwv tau noj mana hauv tebchaws moj sab qhua los lawv kuj tuag tag lawm. 50 No yog cov mov uas los saum ntuj los mas tus uas tau noj lawm yuav tsis tuag. 51 Kuv yog cov mov pub txojsia uas los saum ntuj los. Yog leejtwg noj cov mov no, tus ntawd yuav muaj txojsia nyob mus ib txhis tsis kawg. Thiab cov mov uas kuv yuav pub rau lub ntiajteb muaj txojsia kuj yog kuv lub cev nqaij. 52 Cov Yahdaim txawm sib cav hais tias, tus no yuav muab nws cev nqaij rau peb noj li cas? 53 (יהושע)Yahshua thiaj hais rau lawv hais tias, kuv hais tseeb rau nej hais tias, yog nej tsis tau noj Neeg Leej Tub cev nqaij thiab tsis tau haus nws cov ntshav, mas nej yuav tsis tau txojsia.

54 Tus uas noj kuv cev nqaij thiab haus kuv cov ntshav mas tau txojsia ib txhis tsis kawg, thiab kuv yuav tsa nws ciaj sawv los rau hnub kawg. 55 Rau qhov kuv cev nqaij yog cov tseem mov thiab kuv cov ntshav yog cov tseem dej haus.

56 Tus uas noj kuv cev nqaij thiab haus kuv cov ntshav, tus ntawd nyob hauv kuv thiab kuv kuj nyob hauv nws. 57 Leej Txiv uas muaj txojsia nyob txib kuv los thiab kuv muaj txojsia vim yog muaj Leej Txiv. Tus uas noj kuv yuav muaj txojsia vim yog muaj kuv ib yam li ntawd. 58 No yog cov mov uas nqes saum ntuj los, tsis thooj li tej mov uas nej tej poj koob yawm txwv noj thiab lawv tuag tag lawm. Tus uas noj cov mov no yuav muaj txojsia nyob mus ib txhis tsis kawg. 59 Tej lus no (יהושע)Yahshua hais rau thaum nws qhuab qhia hauv lub tsev sablaj ntawm lub moos Khapena-us.

​

Tej Lus Pub Txojsia

60 Thaum cov thwjtim hnov (יהושע)Yahshua hais li ntawd txawm muaj ntau leej hais tias, tej lus no nyuaj kawg li, leejtwg yuav lees tau? 61 Thaum (יהושע)Yahshua paub hais tias, nws cov thwjtim yws txog tej lus ntawd nws txawm hais rau lawv hais tias, tej lus no ua rau nej dawm lov? 62 Yog nej pom Neeg Leej Tub nce rov mus rau lub chaw uas thaum ub nws nyob, nej yuav hais li cas? 

63 Tus Ntsuj Plig yog tus uas pub txojsia, lub cev nqaij tawv tsis muaj qabhau abtsi. Tej lus uas kuv qhia rau nej ntawd, yog Ntsuj Plig thiab yog txojsia.

64 Tiamsis nej cov muaj qee leej tsis ntseeg. Rau qhov txij thaum chiv thawj los lawd (יהושע)Yahshua yeej paub leejtwg tsis ntseeg thiab leejtwg yuav fav xeeb rau nws. 65 Mas (יהושע)Yahshua thiaj hais tias, vim li no kuv thiaj hais rau nej hais tias tsis muaj leejtwg los cuag tau kuv tsuas yog Leej Txiv pub rau nws xwb thiaj los tau.

66 Txij ntawd los nws cov thwjtim ntau leej txawm thim tsis nrog (יהושע)Yahshua mus lawm. 67 (יהושע)Yahshua txawm hais rau kaum ob tug thwjtim hais tias, nej kuj xav ncaim kuv mus thiab lov? 68 Simon Kepha teb (יהושע)Yahshua hais tias, Xibhwb, peb yuav mus cuag leejtwg? Koj tej lus thiaj pub txojsia ib txhis tsis kawg. 69 Peb yeej ntseeg thiab paub hais tias koj yog tus dawb huv ntawm Abba (יחוח)Yahweh.

70 (יהושע)Yahshua teb lawv hais tias, kuv xaiv nej kaum ob leeg los tsis yog? Tiamsis nej cov muaj ib tug yuav ntxeev siab. 71 Yog (יהושע)Yahshua hais txog Yahdah uas yog Simon Iscariot tus tub, rau qhov nws yog ib tug hauv kaum ob tug thwjtim uas yuav fav xeeb rau (יהושע)Yahshua.