Cov Nalxales Tsis Lees Yuav (יהושע)Yahshua

(Mattithyah 13:53-58; Luke 4:16-30)

1 (יהושע)Yahshua txawm tawm qhov ntawd mus rau nws lub moos, cov thwjtim kuj nrog nws mus. 2 Txog hnub Sabbath nws pib qhuab qhia hauv lub tsev sablaj, mas cov tibneeg uas hnov ntawd muaj ntau leej phimhwj sib hais tias, tus tibneeg no tau txhua yam no qhovtwg los? Thiab lub tswvyim uas muab pub rau nws yog tswvyim abtsi? Nws txhais tes tau ua tej txujci phimhwj loj kawg li lauj! 3 Nws tsis yog tus kaw ntoo thiab yog Miriam tus tub lov? Thiab nws cov kwv yog Yaaqob thiab Yauxes thiab Yahdah thiab Simon los tsis yog? Nws cov muam kuj nrog peb nyob no los tsis yog? Lawv txawm tsis txaus siab rau nws. 4(יהושע)Yahshua txawm hais rau lawv tias, luag tej yeej hwm tus xibhwb cev Abba (יחוח)Yahweh lus, tsuas yog nws lub moos thiab nws cov kwvtij thiab nws tsev neeg thiaj tsis hwm nws xwb.

 5 Nws thiaj ua tsis tau ib yam txujci phimhwj rau hauv lub moos ntawd tsuas yog tsa tes npuab cov uas muaj mob ob peb leeg zoo xwb. 6 Nws xav tsis thoob rau qhov lawv tsis muaj kev ntseeg. Ces nws txawm mus qhuab qhia thoob plaws tej zej zog ib ncig.

​

(יהושע)Yahshua Txib Kaum Ob Tug Thwjtim Tawm Mus Qhuab Qhia

(Mattithyah 10:5-15; Luke 9:1-6)

7(יהושע)Yahshua hu kaum ob tug thwjtim los thiab pib txib lawv tawm mus ua ib khub ib khub, thiab pub hwjchim rau lawv ntiab tau dab tawm. 8 Nws nkaw lus kom lawv tsis txhob coj abtsi mus siv taug kev tsuas yog coj tus pas nrig xwb, tsis txhob coj mov noj, tsis txhob khuam hnab thoob puab, tsis txhob coj nyiaj hauv lub hnab tawv, 9 yuav tsum rau khau, tsis txhob hnav ob lub tsho. 10 Thiab (יהושע)Yahshua hais rau lawv tias, yog nej mus poob rau yig twg kuj nyob hauv lub tsev ntawd mus txog thaum tawm qhov ntawd mus. 11 Yog lub chaw twg tsis txais nej thiab tsis mloog nej qhia, mas thaum nej tawm mus nej cia li nchos tej hmoov av uas lo nej kotaw pov tseg ua timkhawv tawm tsam lawv.

12 Lawv txawm tawm mus tshaj tawm kom ntxeev dua siab tshiab. 13 Lawv ntiab ntau tus dab tawm thiab muab roj pleev cov uas muaj mob zoo ntau leej.

​

Yahchanan  Tuag

(Mattithyah 14:1-12; Luke 9:7-9)

14 Vajntxwv Helauj hnov txog tej no rau qhov (יהושע)Yahshua lub moo nrov nto moo lug. Qee leej hais tias, Yahchanan  uas coj ua kevcai raus dej sawv hauv qhov tuag rov los lawm, mas nws thiaj muaj hwjchim ua tau tej txujci phimhwj no. 15 Tiamsis qee leej hais tias, nws yog Eliyas. Thiab qee leej hais tias, nws yog ib tug xibhwb cev Abba (יחוח)Yahweh lus ib yam li ib tug xibhwb thaum ub. 16 Thaum Helauj hnov lawm, nws txawm hais tias, Yahchanan  uas kuv txiav caj dab lawd sawv hauv qhov tuag rov los. 17 Rau qhov Helauj twb txib tibneeg mus ntes Yahchanan  khi los kaw rau hauv tsev lojfaj, vim yog tim Helaudias uas yog Helauj tus kwv Philip tus pojniam, uas Helauj yuav los ua pojniam. 18 Rau qhov Yahchanan  txawm hais rau Helauj tias, koj tsis muaj cai yuav koj tus kwv tus pojniam los ua koj pojniam.

19 Helaudias thiaj ntxub Yahchanan  xav muab nws tua pov tseg. Tiamsis nws tua tsis tau 20 vim Helauj ntshai Yahchanan , thiab paub tias Yahchanan yog ib tug ncaj ncees thiab dawb huv, Helauj thiaj tsis kheev leej twg ua phem rau nws. Thaum Helauj hnov Yahchanan  tej lus qhuab ntuas, kuj ua rau nws nyuaj siab kawg, tiamsis nws kuj tseem txaus siab mloog thiab. 21 Muaj ib hnub txawm txog sijhawm zoo yog hnub uas ua kevcai nco txog hnub uas yug Helauj, ces Helauj npaj ib rooj noj haus rau cov uas ua hlob thiab cov thawj tub rog thiab cov tibneeg tseem ceeb thoob plaws lub xeev Kalilais. 22 Thaum Helaudias tus ntxhais los dhia seev cev mas ua rau Helauj thiab cov qhua txaus siab heev. Vajntxwv txawm hais rau tus ntxhais ntawd tias, koj thov yam twg kuv yuav pub yam ntawd rau koj. 23 Helauj txawm cog lus twv tias, koj thov yam twg kuv yuav pub yam ntawd rau koj, txawm yog thov lub tebchaws ib nrab los kuj tau.

24 Tus ntxhais thiaj tawm mus nug leej niam tias, kuv yuav thov abtsi? Leej niam teb tias, cia li thov Yahchanan  uas coj ua kevcai raus dej lub taubhau.

25 Tamsim ntawd tus ntxhais txawm maj nroos nkag mus cuag vajntxwv thiab thov hais tias, kuv xav kom koj muab Yahchanan  uas coj ua kevcai raus dej lub taubhau tso rau hauv lub choo coj los pub rau kuv tamsim no. 26 Mas vajntxwv ntxhov siab kawg, tiamsis vim yog saib rau tej lus uas nws twv thiab saib rau cov qhua nws thiaj tsis kam rhuav tej lus uas twv cia ntawd.

27 Tamsim ntawd vajntxwv txawm txib tus uas tua tibneeg mus coj Yahchanan  lub taubhau los. Nws thiaj mus txiav Yahchanan  lub taubhau hauv tsev lojfaj 

28 tso rau hauv lub choo coj los pub rau tus ntxhais ntawd, tus ntxhais thiaj coj mus rau leej niam. 29 Thaum Yahchanan  cov thwjtim hnov tej xwm txheej no, lawv txawm tuaj coj Yahchanan  lub cev mus faus rau hauv qhov ntxa.

​

Pub Mov Rau Tsib Txhiab Leej Noj

(Mattithyah14:13-21;Luke 9:10-17;Yahchanan 6:1-14)

30 Cov tubtxib thiaj rov los cuag (יהושע)Yahshua thiab piav txog txhua yam uas lawv tau ua thiab qhuab qhia. 31 Mas (יהושע)Yahshua hais rau lawv tias, nej cia li nrog kuv mus rau ib qho chaw uas tsis muaj tibneeg es so kom los siav mentsis. Rau qhov muaj tib-neeg mus los coob coob twb tsis muaj sij-hawm noj mov li. 32 Lawv txawm nce nkoj mus rau ib qho chaw uas tsis muaj tibneeg nyob. 33 Muaj tibneeg coob pom lawv mus thiab paub lawv, ces txawm tawm hauv txhua lub moos dhia kotaw mus txog ua ntej.

34 Thaum (יהושע)Yahshua tawm hauv lub nkoj los, nws pom muaj tibneeg coob coob, nws thiaj khuvleej lawv rau qhov lawv zoo li pab yaj uas tsis muaj Tus Tswv yug, mas (יהושע)Yahshua txawm pib qhuab qhia lawv ntau yam. 35 Thaum lig lawm nws cov thwjtim los hais rau nws tias, ntawm no yog ntuj nrag teb do, thiab tav no lig lawm. 36 Cia li tso cov tibneeg mus xwv lawv thiaj tau mus yuav mov noj tom tej teb thiab tej zej zog ib ncig no. 37(יהושע)Yahshua teb lawv tias, nej cia li pub rau lawv noj. Lawv hais rau nws tias, koj xav kom peb nqa ob puas txiaj denalias mus yuav mov los pub rau lawv noj lov? 38(יהושע)Yahshua hais rau lawv tias, nej muaj pes tsawg lub ncuav? Nej cia li mus saib. Thaum lawv saib lawd, lawv txawm hais tias, muaj tsib lub ncuav thiab ob tug ntses.

39 Ces (יהושע)Yahshua txawm hais kom cov tibneeg sawvdaws zaum rau hauv tej nyom ntsuab ntsuab ua tej pab tej pawg.

40 Lawv txawm zaum ua tej pawg, tej pawg ib puas leej, tej pawg tsib caug leej. 41 Thaum (יהושע)Yahshua txais tsib lub ncuav thiab ob tug ntses ntawd lawm, nws tsa muag saib rau saum ntuj thov Abba (יחוח)Yahweh foom koob hmoov mas muab cov ncuav ntais cev rau cov thwjtim kom muab faib rau cov tib neeg thiab nwsmuab ob tug ntses ntawd faib rau lawv sawvdaws.  42 Lawv txhua tus noj tsau huvsi. 43 Tej ncuav thiab tej ntses uas noj tsis tag lawv khaws tau kaum ob tawb puv nkaus. 44 Cov tibneeg uas noj ntawd cov txivneej xwb muaj tsib txhiab leej.

​

(יהושע)Yahshua Mus Kotaw Saum Nplaim Dej

(Mattithyah. 14:22-33; Yahchanan. 6:15-21)

45 Tamsim ntawd (יהושע)Yahshua txawm kom cov tibneeg sawvdaws rov mus tsev, thiab nws kom nws cov thwjtim nce mus hauv nkoj, caij hla dej hiavtxwv ua nws ntej mus nyob sab tim lub nroog Npexaidas tos nws.

46 Thaum sawvdaws mus tas lawm, (יהושע) Yahshua nce mus thov Abba (יחוח)Yahweh pem roob. 47 Thaum tsaus ntuj cov thwjtim twb caij nkoj mus txog ib nrab deg lawm, (יהושע)Yahshua tseem nyob ib leeg pem roob. 48(יהושע)Yahshua pom nws cov thwj-tim nquam nkoj nyuaj kawg li, rau qhov muaj cua ntsawj lub nkoj tom hauv ntej tuaj. Thaum yuav kaj ntug, kwvlam li qaib qua thawj tsig, (יהושע)Yahshua los kotaw saum nplaim dej los cuag nws cov thwjtim. Nws yuav hla kom dhau plaws lawv mus, 49 tiamsis thaum lawv pom nws los kotaw sau nplaim dej, lawv xav hais tias yog dab, lawv txawm qw ntsoog qees. 50 Lawv sawvdaws pom nws, lawv ntshai kawg li. Tamsim ntawd (יהושע)Yahshua hais rau lawv tias, tsis txhob poob siab! Twb yog kuv ntag! Tsis txhob ntshai.

 51(יהושע)Yahshua thiaj nce mus nrog cov thwjtim nyob hauv lub nkoj, ces cua txawm tu lawm. Cov thwjtim xav tsis thoob li. 52 Lawv tsis totaub qhov uas (יהושע)Yahshua muab ncuav faib rau tsib txhiab leej noj, rau qhov lawv lub siab tawv.

​

 (יהושע)Yahshua Kho Mob Hauv Kenexales

(Mattithyah 14:34-36)

53 Thaum lawv hla dhau hiavtxwv lawd lawv tuaj txog ntawm Kenexales thiab nres nkoj qhov ntawd. 54 Thaum lawv tawm hauv lub nkoj los, tamsim ntawd cov tibneeg uas nyob ntawd cim tau (יהושע)Yahshua. 55 Lawv txawm khiav mus qhia rau cov tibneeg uas nyob thoob plaws ib cheebtsam ntawd, hais tias (יהושע)Yahshua nyob qhov twg. Mas lawv pib kwv cov tibneeg uas muaj mob pw saum txaj tuaj rau qhov chaw ntawd.

56 (יהושע)Yahshua mus rau qhovtwg, tsis hais hauv tej zej zog, hauv tej moos, thiab hauv tej teb li. Lawv yeej coj cov tibneeg muaj mob ntawd tuaj tso rau ntawm tej khw, thiab thov (יהושע)Yahshua kom cia cov tibneeg mob ntawd kov (יהושע)Yahshua lub tw tsho. Txhua tus uas tau kov lawd kuj zoo huvsi.