Yahshua Kov Yeej Cov Vajntxwv Sab Ped

1 Thaum lub moos Haxaus tus vaj ntxwv Yanpis tau hnov tej xov no, nws txawm txib tibneeg mus hu lub moos Madoos tus vajntxwv Yaunpam, thiab lub moos Siloos tus vajntxwv thiab lub moos Asas tus vajntxwv,

2 thiab hu cov vajntxwv uas nyob pem toj siab sab tebchaws ped thiab nyob hauv Alanpas ntawm Khinelaus sab nrad, thiab hauv tej pov roob Sefelas thiab hauv Nafaudaus uas nyob sab hnub poob,

3 thiab hu cov Khana‑as uas nyob sab hnub tuaj thiab sab hnub poob, thiab hu cov Amaulais, cov Hithais, cov Pelixais, cov Yenpus uas nyob pem toj siab thiab cov Hivais uas nyob ntawm taw roob Hawmoos hauv Mixapas tebchaws.

4 Cov vajntxwv hauv tej moos ntawd kuj nrog lawv tej tub rog huvsi tawm tuaj coob kawg li, ua tej niag pab tub rog coob npaum li tej xuab zeb ntawm ntug hiavtxwv, muaj nees thiab tsheb nees ua rog coob kawg.

5 Cov vajntxwv no sau zog ua ke tuaj ua yeej rau ntawm lub hav dej Meloos yuav ua rog rau cov Ixayees.

6 Mas (יחוח)Yahweh hais rau Yahshua tias, koj tsis txhob ntshai lawv li, rau qhov tagkis lub sijhawm no kuv yuav muab lawv tag nrho rau cov Ixayees, lawv yuav raug tua tuag huvsi. Koj yuav txiav lawv cov nees tej leeg raws thiab muab lawv tej tsheb nees ua rog hlawv huvsi.

7 Yahshua thiab nws cov tub rog sawvdaws thiaj txeem plaws mus ntaus kiag lawv hauv lub hav Meloos.

8 (יחוח)Yahweh muab lawv cob rau hauv cov Ixayees txhais tes. Cov Ixayees tua lawv thiab caum lawv mus txog ntua lub tuam nroog Xaidoos thiab txog Milefauma‑is, thiab caum lawv mus rau sab hnub tuaj mus txog lub hav Mixapes, muab lawv tua tuag tag tsis tseg ib tug ciaj sia li.

9 Yahshua ua rau lawv raws nraim li uas (יחוח)Yahweh hais, nws txiav lawv cov nees tej leeg raws thiab hlawv tej tsheb ua rog.

10 Thaum ntawd Yahshua tig rov los txeeb lub moos Haxaus thiab xuas ntaj tua tus vajntxwv hauv lub moos ntawd. Ua ntej ntawd, Haxaus ua thawj kav tag nrho tej tebchaws ntawd.

11 Yahshua lawv xuas ntaj tua txhua tus uas nyob hauv lub moos ntawd thiab ua kom puam tsuaj tag huvsi, tsis tshuav ib tug ciaj sia li, thiab nws muab lub moos Haxaus hlawv pov tseg.

12 Yahshua txeeb tau cov vajntxwv ntawd tej moos huvsi thiab ntes tau cov vajntxwv ntawd huvsi, thiab xuas ntaj tua ua kom puam tsuaj tag huvsi raws li Mauxes uas yog (יחוח)Yahweh tus tub qhe hais cia lawd.

13 Tiamsis tej moos uas nyob saum tej lub nyuag pov roob mas cov Ixayees tsis muab hlawv, Yahshua tsuas hlawv lub moos Haxaus xwb.

14 Tej qhov txhia chaw uas txeeb tau huvsi ntawm tej moos ntawd thiab tej tsiaj txhu mas cov Ixayees kuj coj mus yuav ua lawv tug.  Lawv xuas ntaj tua txhua tus tibneeg huvsi puam tsuaj tuag tag huvsi tsis tseg ib tug ciaj sia li.  

15 (יחוח)Yahweh hais li cas rau nws tus tub qhe Mauxes lawm Mauxes kuj hais li ntawd rau Yahshua mas Yahshua ua raws nraim.  Nws tsis tseg ib yam abtsi uas (יחוח)Yahweh hais rau Mauxes lawd tsis ua li.

​

Yahshua Txeeb Lub Tebchaws Huvsi

16 Yahshua txeeb tau lub tebchaws ntawd huvsi li uas hais no, yog tej toj siab thiab Nekes thiab Kausees tebchaws huvsi, thiab tej pov roob Sefelas thiab Alanpas thiab tej toj siab thiab tej nruab tiag hauv Ixayees,

17 txij ntua ntawm roob Halab uas sawv ntawm Xe‑is mus txog ntua Npa‑as Nkas hauv lub hav Lenpanoos ntawm taw roob Hawmoos. Yahshua ntes txhua tus vajntxwv hauv tej tebchaws ntawd ntaus thiab tua pov tseg.

18 Yahshua ua rog rau tej vajntxwv ntawd txhua tus ntev loo.

19 Tsis muaj ib lub moos uas yuav nrog cov Ixayees sib raug zoo, tsuas yog tshwj cov Hivais xwb uas nyob hauv lub moos Kinpe‑oos, dua li mas lawv ua rog ntaus tau huvsi los xwb.  

20 Vim yog (יחוח)Yahweh ua rau lawv lub siab tawv xwv lawv thiaj sawv los ua rog rau cov Ixayees mas thiaj raug ua kom puam tsuaj huvsi, tsis tau txais kev hlub, tiamsis raug muab ua puam tsuaj ntxuav du lug, raws li uas (יחוח)Yahweh hais rau Mauxes.   

21 Thaum ntawd Yahshua tau tuaj muab cov Anakim uas nyob pem toj siab ntxuav pov tseg kom tawm hauv Henploos, Denpis thiab Anab thiab tawm hauv tej toj siab hauv Yahdah thiab tej toj siab hauv Ixayees huvsi. Yahshua muab tej tibneeg no thiab lawv tej moos ua puam tsuaj tag huvsi.

22 Tsis tshuav ib tug tibneeg Anaj nyob hauv cov Ixayees lub tebchaws li, tsuas yog tshuav ib txhia nyob hauv Kaxas thiab Nkas thiab Asadaus.

23 Ua li uas hais no, Yahshua txeeb tau lub tebchaws tag nrho raws li txhua lo lus uas (יחוח)Yahweh hais rau Mauxes. Thiab Yahshua muab faib ua qub txeeg qub teg rau cov Ixayees raws li lawv txhua xeem li feem. Mas lub tebchaws ntawd thiaj so tsis ua rog lawm.