Cov Amaulais Swb Lawm

1 Thaum Yeluxalees tus vajntxwv Adaunixedes hnov tias Yahshua txeeb tau lub moos Ais thiab muab ua puam tsuaj tag, thiab ua rau lub moos Ais thiab ua rau Ais tus vajntxwv ib yam nkaus li nws tau ua rau lub moos Yelikhaus thiab Yelikhaus tus vajntxwv, thiab hnov tias cov tibneeg Kinpe‑oos tau nrog cov Ixayees sib raug zoo thiab nrog lawv nyob lawm,

2 mas nws ntshai heev kawg rau qhov lub moos Kinpe‑oos yog lub niag moos loj ib yam li tej vajntxwv lub moos, tseem loj dua lub moos Ais thiab cov txivneej hauv lub moos ntawd puavleej muaj zog.

3 Vim li no Yeluxalees tus vajntxwv Adaunixedes thiaj hu Henploos tus vajntxwv Hauhas thiab Yamus tus vajntxwv Pilas thiab Lakhis tus vajntxwv Yafias thiab Eloos tus vajntxwv Denpis hais tias,

4 thov nej tuaj cuag kuv thiab pab kuv ntaus lub moos Kinpe‑oos rau qhov lub moos ntawd twb nrog Yahshua thiab cov Ixayees sib raug zoo lawm.

5 Mas cov Amaulais tsib tug vajntxwv ntawd, yog Yeluxalees tus vajntxwv, Henploos tus vajntxwv, Yamus tus vajntxwv, Lakhis tus vajntxwv, thiab Eloos tus vajntxwv, txawm txhij tub rog thiab coj lawv tej tub rog sawvdaws tawm mus ua yeej ua rog rau lub moos Kinpe‑oos.

6 Cov tibneeg Kinpe‑oos thiaj xa xov tuaj hais rau Yahshua hauv lub yeej ntawm Kilakas tias, thov koj tsis txhob nkaum tes ntawm koj cov tub qhe. Thov maj nroos tuaj pab kom peb dim, pab peb lauj! Rau qhov cov Amaulais tej vajntxwv uas nyob pem toj siab sawvdaws sau nthwv tuaj ntaus peb lawm.

7 Ces Yahshua txawm tawm hauv Kilikas mus, thiab nws cov tub rog sawvdaws nrog nws mus, yog cov tub rog uas siab loj siab tuab sawvdaws.

8 (יחוח)Yahweh hais rau Yahshua tias, tsis txhob ntshai lawv li rau qhov kuv twb muab lawv rau hauv koj txhais tes lawm, yuav tsis muaj ib tug sawv tiv tau koj li.

9 Yog li ntawd Yahshua thiaj tawm ntawm Kilakas mus ib hmos mus ntaus kiag lawv.

10 (יחוח)Yahweh ua rau lawv ntshai ras zom zaws ntawm cov Ixayees xubntiag, mas cov Ixayees tua lawv tuag coob kawg li ntawm Kinpe‑oos thiab caum lawv taug txoj kev uas mus rau pem lub moos Npes Hauloos thiab caum tua lawv mus txog ntua lub moos Axekhas thiab lub moos Makhedas.

11 Thaum lawv tabtom khiav cov Ixayees taug txojkev uas nqis mus rau Npes Hauloos ntawd, (יחוח)Yahweh tso lawg loj loj poob saum ntuj los ntaus lawv mus txog ntua lub moos Axekhas, lawv kuj tuag. Mas cov uas raug lawg ntaus tuag coob dua cov uas cov Ixayees xuas ntaj tua tuag.

12 Hnub uas (יחוח)Yahweh muab cov Amaulais rau cov Ixayees ntawd, mas Yahshua hais rau (יחוח)Yahweh. Nws hais tab meeg cov Ixayees tias, lub hnub, cia li nres saum lub moos Kinpe‑oos, lub hli cia li nres saum lub hav Aiyaloos.

13 Lub hnub txawm nres thiab lub hli txawm nres mus txog thaum cov tibneeg ua pauj rau cov yeeb ncuab tag. Tej no twb muab sau cia rau hauv phau ntawv Yasawm. Lub hnub nres twjywm saum ntuj tsis poob raws li lub caij kwvlam tau ib hnub.

14 Hnub uas (יחוח)Yahweh mloog tibneeg lus yam li hnub ntawd mas txawm yog thaum ub lossis los rau yav tom qab no los tsis muaj ib zaug li lawm, vim yog (יחוח)Yahweh ua rog pab cov Ixayees.

15 Mas Yahshua thiab cov Ixayees sawvdaws thiaj rov qab los txog lawv lub yeej ntawm Kilakas.

16 Tsib tug vajntxwv ntawd mus khiav nkaum rau hauv lub qhov tsua ntawm Makhedas.

17 Yahshua hnov tias muaj tibneeg pom tsib tug vajntxwv khiav nkaum hauv lub qhov tsua ntawm Makhedas.

18 Yahshua thiaj hais tias, dov tej txhib zeb loj loj los txhaws lub rooj qhov tsua thiab tso tub rog zov.

19 Tiamsis nej tsis txhob nyob twjywm ntawd, cia li caum nej cov yeeb ncuab qab mus tua cov tub rog uas faj tom qab, tsis txhob cia lawv rov nkag tau rau hauv lawv tej moos, rau qhov (יחוח)Yahweh uas yog nej Tus Tswv twb muab lawv rau hauv nej txhais tes lawm.

20 Thaum Yahshua thiab cov Ixayees tua cov tibneeg coob ntawd puam tsuaj tag lawd, thiab cov uas tshuav khiav dim rov qab los nkag rau hauv tej moos uas muaj ntsa loog lawd,

21 mas cov tub rog sawvdaws kuj rov los kaj los huv los cuag Yahshua hauv lub yeej ntawm Makhedas.  Tsis muaj ib tug yuav kav tsa ncauj hais txog cov Ixayees li.

22 Mas Yahshua hais tias, cia li qheb lub qhov tsua coj tsib tug vajntxwv ntawd tawm los rau kuv.

23 Lawv ua raws li nws hais thiaj coj tsib tug vajntxwv ntawd tawm hauv lub qhov tsua los cuag nws, yog Yeluxalees tus vajntxwv, Henploos tus vajntxwv, Yamus tus vajntxwv, Lakhis tus vajntxwv, thiab Eloos tus vajntxwv.

24 Thaum lawv coj cov vaj ntxwv ntawd los rau Yahshua nws thiaj hu cov txivneej Ixayees sawvdaws thiab hais rau cov thawj rog uas nrog nws tawm mus ua rog tias, cia li txav los ze, muab kotaw tsuj cov vajntxwv no caj pas. Mas lawv kuj txav los ze, xuas kotaw tsuj lawv caj pas.

25 Thiab Yahshua hais rau lawv tias, tsis txhob ntshai tsis txhob poob siab, cia li ua khov kho ua siab loj siab tuab, rau qhov (יחוח)Yahweh yuav ua rau nej tej yeeb ncuab txhua tus uas nej mus ua rog rau, zoo ib yam li no.

26 Dhau ntawd Yahshua thiaj muab tsib tug vajntxwv ntawd ntaus tuag thiab muab dai rau saum tsib tug ntoo, muab dai rau sauv mus txog tsaus ntuj.

27 Thaum hnub poob qho lawd Yahshua hais kom lawv mus txo cov cev tuag ntawd saum ntoo los pov tseg rau hauv lub qhov tsua uas cov vajntxwv ntawd mus tsiv nraim. Thiab lawv muab tej pob zeb loj loj los txhaws lub rooj qho cia nyob txog niaj hnub nimno.

​

Yahshua Txeeb Tej Moos Sab Nrad

28 Hnub ntawd Yahshua kuj txeeb tau lub moos Makhedas thiab xuas ntaj tua lub moos ntawd thiab tua tus vajntxwv hauv lub moos ntawd.  Nws muab txhua tus ua puam tsuaj tag nrho tsis tseg ib tug li.  Nws ua rau Makhedas tus vajntxwv ib yam li nws twb ua rau Yelikhaus tus vajntxwv lawd.

29 Yahshua thiab cov Ixayees sawvdaws txawm tawm ntawm lub moos Makhedas mus txog lub moos Linas thiab mus ua rog rau lub moos Linas.

30 (יחוח)Yahweh muab lub moos ntawd thiab tus vajntxwv hauv lub moos ntawd rau cov Ixayees txhais tes, thiab Yahshua xuas ntaj tua lub moos thiab tua txhua tus uas nyob hauv tsis tseg ib tug rau hauv lub moos li.  Nws ua rau Linas tus vajntxwv ib yam li ua rau Yelikhaus tus vajntxwv lawd.

31 Yahshua thiab cov Ixayees sawvdaws ho tawm ntawm lub moos Linas mus txog lub moos Lakhis mas vij lub moos ntawd thiab ua rog rau.

32 (יחוח)Yahweh kuj muab lub moos Lakhis rau hauv cov Ixayees txhais tes, mas hnub uas ob, Yahshua txeeb tau lub moos ntawd thiab xuas ntaj tua lub moos thiab txhua tus uas nyob hauv ib yam li nws twb ua rau lub moos Linas lawd.

33 Zaum ntawd Kexaws tus vajntxwv Haulas tuaj pab lub moos Lakhis, mas Yahshua tua nws thiab nws cov tibneeg tuag tag tsis tseg ib tug li.

34 Yahshua thiab cov Ixayees sawvdaws txawm tawm ntawm lub moos Lakhis mus txog lub moos Eloos, mas vij lub moos ntawd thiab ua rog rau.

35 Mas tib hnub ntawd, lawv txeeb tau lub moos ntawd thiab xuas ntaj tua lub moos. Hnub ntawd Yahshua muab txhua tus hauv lub moos ntawd ua puam tsuaj tag huvsi ib yam li nws twb ua rau lub moos Lakhis lawd.

36 Yahshua thiab cov Ixayees sawvdaws txawm tawm ntawm lub moos Eloos mus pem lub moos Henploos thiab lawv ua rog rau,

37 thiab txeeb tau lub moos ntawd.  Lawv xuas ntaj tua lub moos ntawd thiab tus vajntxwv thiab tej zej zog ib ncig thiab tua txhua tus huvsi tsis tseg ib tug li, ib yam li nws twb ua rau lub moos Eloos, thiab muab lub moos thiab txhua tus uas nyob hauv ua puam tsuaj tag huvsi.

38 Yahshua thiab cov Ixayees txawm tig los rau ntawm lub moos Denpis thiab ua rog rau.

39 Lawv txeeb tau lub moos thiab tus vajntxwv thiab tej zej zog ib ncig huvsi. Lawv xuas ntaj tua cov ntawd tuag thiab ua rau txhua tus uas nyob hauv puam tsuaj tag huvsi tsis tseg ib tug li. Nws ua rau lub moos Denpis thiab Denpis tus vajntxwv ib yam li nws twb ua rau lub moos Henploos thiab lub moos Linas thiab Linas tus vajntxwv lawd.  

40 Yahshua ntaus yeej lub tebchaws huvsi li uas hais no, yog tebchaws toj siab thiab Nekes tebchaws thiab tej pov roob Sefelas thiab tej ntav toj, thiab txhua tus vajntxwv uas nyob hauv tebchaws ntawd tsis tseg ib tug li.  Nws ua rau txhua tus uas ciaj sia puam tsuaj tag raws li (יחוח)Yahweh uas yog cov Ixayees Tus Tswv tau hais lawd.

41 Yahshua ntaus luag swb tag txij ntua Khades Npanias mus txog lub moos Kaxas, thiab txij ntua tebchaws Kausees mus txog lub moos Kinpe‑oos.  

42 Yahshua ua tib zaug txeeb tau cov vajntxwv no huvsi thiab lawv tej tebchaws, rau qhov (יחוח)Yahweh uas yog cov Ixayees Tus Tswv, tau pab cov Ixayees ua rog. 43 Mas Yahshua thiab cov Ixayees sawvdaws thiaj rov los rau lub yeej ntawm Kilakas.