Cov Kinpe‑oos Li Tswvyim Dag Ntxias

1 Thaum txhua tus vajntxwv uas nyob sab dej Yaladees hnub poob, cov uas nyob pem toj siab thiab nyob hauv nruab tiag raws ntug Hiavtxwv Loj mus txog ntua Lenpanoos, yog cov Hithais, cov Amaulais, cov Khana‑as, cov Pelixais, cov Hivais thiab cov Yenpus tau hnov tej xov no, 

2 lawv txawm ua ib lub siab sau tub rog tuaj ua rog rau Yahshua thiab cov Ixayees.

3 Tiamsis thaum cov tibneeg hauv lub moos Kinpe‑oos tau hnov xov txog tej uas Yahshua ua rau lub moos Yelikhaus thiab lub moos Ais,

4 ces lawv txawm nrhiav tswvyim dag ntxias. Lawv mus npaj zaub mov thiab muab tej seev tsaj ntuag ntuag rau lawv tej nees luav thauj thiab npaj tej hnab tawv qub qub uas ntim cawv txiv hmab uas ntuag thiab muab ntxiv lawm,

5 thiab lawv rau tej khau ntuag ntuag uas muab ntxiv lawm thiab hnav tej ris tsho khaub hlab thiab tej mov uas lawv ntim kuj qhuav thiab tuaj pwm lawm.

6 Lawv tuaj cuag Yahshua hauv lub yeej ntawm Kilakas mas hais rau nws thiab cov Ixayees tias, peb tuaj lub tebchaws uas deb kawg li tuaj, mas thov nej nrog peb cog lus sib raug zoo.

7 Tiamsis cov Ixayees hais rau cov Hivais ntawd tias, tej zaum nej nyob ze ze hauv peb cov no mas peb yuav ua li cas nrog nej sib cog lus tau?

8 Lawv hais rau Yahshua tias, peb yog koj li tub qhe.  Yahshua txawm hais rau lawv tias, nej yog leejtwg thiab nej tuaj qhovtwg tuaj?

9 Lawv teb nws tias, vim yog muaj (יחוח)Yahweh uas yog nej Tus Tswv lub npe, peb cov uas yog koj li tub qhe thiaj li tuaj deb deb li tuaj. Peb twb hnov xov txog (יחוח)Yahweh thiab txog txhua yam uas nws ua hauv Iziv tebchaws,

10 thiab txhua yam uas nws ua rau cov Amaulais ob tug vajntxwv uas nyob sab dej Yaladees hnub tuaj, yog Hesanpoos tus vajntxwv Xihoos thiab Npasas tus vajntxwv Aus uas nyob hauv Athalaus.

11 Peb cov kev txwj laug thiab cov uas nyob hauv peb lub tebchaws sawvdaws thiaj hais rau peb tias, cia li ntim su taug kev mus cuag lawv thiab hais rau lawv tias, peb yog nej cov tub qhe, thov nej nrog peb cog lus sib raug zoo.

12 Peb tej ncuav no mas hnub uas peb sawv kev tuaj peb ntim sov so coj tuaj noj taug kev, tiamsis nimno saib maj twb qhuav tuaj pwm tag lawm.

13 Tej hnab no mas muab tej hnab tshiab tshiab ntim cawv txiv hmab tuaj, tiamsis saib maj twb to tag lawm.  Tej ris tsho thiab tej khau kuj khaub hlab tag vim yog kev deb heev.  

14 Cov Ixayees txawm noj lawv tsum mov ntawd, lawv tsis xub nug (יחוח)Yahweh tso.

15 Thiab Yahshua kuj nrog lawv cog lus sib raug zoo thiab cog lus tias yuav tseg lawv txojsia cia, thiab cov thawj hauv cov pejxeem kuj cog lus twv li ntawd rau lawv.

16 Thaum uas cog lus li ntawd tau peb hnub lawd kuj hnov tias cov tibneeg ntawd twb nyob ze ze cov Ixayees thiab nyob hauv lawv nruab nrab.]

17 Cov Ixayees sawv kev mus tau peb hnub kuj mus txog lawv tej moos. Lawv tej moos yog Kinpe‑oos, Khefilas, Npe‑awlaus thiab Khiliyas Ye‑alis.

18 Cov Ixayees tsis tua lawv rau qhov cov thawj twb tuav (יחוח)Yahweh uas yog cov Ixayees Tus Tswv lub npe cog lus twv lawm. Ib tsoom pejxeem sawvdaws thiaj yws yws cov thawj.

19 Mas cov thawj sawvdaws thiaj hais rau cov pejxeem sawvdaws tias, peb twb tuav (יחוח)Yahweh uas yog cov Ixayees Tus Tswv lub npe cog lus twv rau lawv lawm, mas peb kov tsis tau lawv li lawm.

20 Peb yuav ua li no rau lawv, peb yuav tseg lawv txojsia cia, ntshai tsam (יחוח)Yahweh chim rau peb, vim yog peb tau cog lus twv rau lawv lawm.   

21 Cov thawj thiaj hais rau lawv tias, cia li tseg lawv txojsia nyob. Vim li ntawd cov Kinpe‑oos thiaj ua cov uas txiav taws kwv dej rau cov Ixayees, raws li cov thawj hais cia lawd.

22 Yahshua txawm hu cov Kinpe‑oos tuaj mas nws hais rau lawv tias, ua li cas nej twb nyob hauv peb nruab nrab los nej tseem tuaj dag peb tias nej nyob deb kawg?  

23 Vim li no nej raug lo lus foom tsis zoo lawm mas nej ib txhia yuav ua qhev txiav taws kwv dej rau kuv Txiv (יחוח)Yahweh lub tsev ib txhis.

24 Lawv teb Yahshua tias, vim yog luag qhia rau peb uas yog koj cov tub qhe paub tseeb tias, (יחוח)Yahweh uas yog koj Tus Tswv tau hais rau nws tus tub qhe Mauxes kom muab lub tebchaws no huvsi rau koj, thiab muab lub tebchaws no tej tibneeg ua kom puam tsuaj tag. Vim li no peb thiaj ntshai heev tsam nej txov peb txojsia, peb thiaj dag li no.  

25 Nimno peb nyob hauv koj xib teg lawm ces cia li ua rau peb raws li uas koj pom zoo thiab raug cai.

26 Yahshua thiaj ua li ntawd rau lawv, cia lawv dim cov Ixayees txhais tes thiab tsis tua lawv.

27 Mas hnub ntawd Yahshua thiaj kom lawv ua cov uas txiav taws kwv dej rau cov Ixayees thiab rau (יחוח)Yahweh lub thaj los txog niaj hnub nimno rau hauv lub chaw uas (יחוח)Yahweh yuav xaiv cia.