Ua Rog Yeej Lub Moos Ais

1 (יחוח)Yahweh hais rau Yahshua tias, tsis txhob ntshai tsis txhob poob siab. Cia li coj cov tub rog huvsi nrog koj mus, cia li sawv tsees mus lawm pem lub moos Ais. Kuv twb muab lub moos Ais tus vajntxwv thiab nws cov pejxeem thiab nws lub moos thiab nws lub tebchaws rau hauv koj txhais tes lawm.

2 Koj yuav tau ua rau lub moos Ais thiab Ais tus vajntxwv ib yam nkaus li koj twb ua rau Yelikhaus thiab Yelikhaus tus vaj ntxwv lawd. Tej qhov txhia chaw uas nej txeeb tau los thiab tej tsiaj txhu nej cia li coj mus ua nej tug. Koj yuav npaj ib pab tub rog mus nraim cev rau sab ped nraum lub moos tos.

3 Yahshua thiab cov tub rog sawvdaws txawm sawv tsees mus ntaus lub moos Ais. Yahshua xaiv peb vam tus tub rog uas siab loj siab tuab kom lawv tawm mus hmo ntuj,

4 mas nws hais rau lawv tias, ua li no ov, nej mus nraim cev ped nraum lub moos, tsis txhob nyob deb ntawm lub moos, tiamsis txhua tus npaj txhij tos.

5 Mas kuv thiab cov tub rog sawvdaws uas nrog kuv ua ke yuav mus kom ze ntawm lub moos. Mas thaum lawv tawm tuaj ntaus peb yam li thawj zaug ces peb yuav thim loo khiav lawv.

6 Lawv yuav tawm tuaj caum peb mus txog thaum peb ntxias lawv tawm tuaj dhau lub moos deb.  Mas lawv yuav hais tias, cov Ixayees khiav peb yam li thawj zaug lawm.  Peb yuav ua txuj khiav li no,

7 ces nej cov uas nraim cev cia li sawv tsees los txeeb kiag lub moos ntawd, rau qhov (יחוח)Yahweh uas yog nej Tus Tswv yuav muab lub moos rau hauv nej txhais tes.

8 Thaum nej txeeb kiag tau lub moos ntawd lawd nej cia li muab hlawv, cia li ua raws li (יחוח)Yahweh hais. Kuv hais kom nej ua li no nawj.  

9 Mas Yahshua thiaj kom lawv tawm mus. Lawv kuj mus nraim cev rau ntawm Npe‑ees thiab Ais ntu nruab nrab, uas yog sab hnub poob ntawm lub moos Ais. Tiamsis hmo ntawd Yahshua nrog cov pejxeem nyob ua ke.

10 Yahshua sawv ntxov los txhij tub rog thiab nws nrog Ixayees cov kev txwj laug coj cov tub rog mus pem lub moos Ais.

11 Cov tub rog uas nrog nws mus sawvdaws txawm mus ze lub moos.  Lawv tsuam chaw rau ntawm lub moos Ais sab ped, muaj ib lub hav quas lawv thiab lub moos Ais.

12 Thiab nws faib kwvlam tsib txhiab leej tub rog kom lawv nraim cev rau ntawm lub moos Npe‑ees thiab lub moos Ais ntu nruab nrab ntawm lub moos Ais sab hnub poob.

13 Lawv faib cov tub rog li no, pab tub rog uas coob nyob ntawm lub moos Ais sab ped thiab pab uas faj seeb tom qab nyob ntawm lub moos Ais sab hnub poob.

Tiamsis hmo ntawd Yahshua nyob hauv lub hav.

14 Thaum lub moos Ais tus vajntxwv pom li ntawd mas nws thiab nws cov tub rog sawv daws, uas yog cov txivneej hauv lub moos sawvdaws, sawv ntxov dhia mus ntaus cov Ixayees ntawm ntav toj Alanpas, tiamsis nws tsis paub tias muaj ib pab tub rog nraim cev tos ntaus nws nyob ntawm lub moos ib sab.

15 Yahshua thiab cov Ixayees sawvdaws ua txuj li uas swb lawv mas pheej khiav zuj zus mus rau pem tebchaws moj sab qhua.

16 Lawv hu cov txivneej sawvdaws hauv lub moos Ais mus caum cov Ixayees, mas Yahshua ntxias lawv caum nws mus deb zuj zus ntawm lub moos.

17 Tsis tshuav ib tug txivneej uas nyob hauv lub moos Ais thiab lub moos Npe‑ees uas tsis caum cov Ixayees mus li.  Lawv caum cov Ixayees mus, muab rooj loog qheb lug cia.

18 Mas (יחוח)Yahweh hais rau Yahshua tias, cia li taw rab hmuv hauv koj txhais tes rau tom lub moos Ais, rau qhov kuv yuav muab lub moos ntawd rau hauv koj txhais tes. Ces Yahshua txawm taw nkaus rab hmuv hauv nws txhais tes rau tom lub moos.

19 Thaum Yahshua taw kiag nws txhais tes mas cov tub rog uas nraim cev txawm sawv pes tsees ntawm lub chaw nraim thiab dhia nkag plaws rau hauv lub moos, txeeb kiag tau thiab muab lub moos ntawd hlawv kiag.

20 Thaum cov tibneeg Ais tig saib qab ua ciav pom pa taws hauv lub moos ncho mus nto plaws saum ntuj, ces lawv tsis tau kev khiav mus qhovtwg li, rau qhov cov tub rog uas khiav mus rau tebchaws moj sab qhua kuj tig rov los tua cov tibneeg Ais uas caum qab.

21 Thaum Yahshua thiab cov Ixayees pom tias cov uas nraim cev twb txeeb tau lub moos lawm thiab pa taws kub lub moos ncho nto ntuj lawm, lawv kuj tig loo ntaus cov tibneeg Ais.

22 Cov uas txeem rau hauv lub moos kuj tawm tuaj ntaus lawv, cov tibneeg Ais thiaj nyob rau hauv nruab nrab cov Ixayees, cov Ixayees nyob puag ncig sab ub sab no. Cov Ixayees ntaus ua lawv tsis tshuav ib tug ciaj thiab tsis tshuav ib tug khiav dim li.   

23 Tiamsis lawv ntes tau tus vajntxwv hauv lub moos Ais tseem ciaj coj los rau Yahshua.

24 Thaum cov Ixayees xuas ntaj tua cov tibneeg Ais uas caum lawv mus rau tom tebchaws moj sab qhua tuag tag huvsi tsis tshuav ib tug li, mas cov Ixayees sawvdaws rov mus rau hauv lub moos, es xuas ntaj tua lub moos ntawd.

25 Txhua tus uas nyob hauv lub moos Ais tuag tag rau hnub ntawd suav txivneej thiab pojniam huvsi yog ib vam ob txhiab leej.

26 Yahshua tsis tau nkaum tes qhov uas nws taw rab hmuv ntawd mus txog thaum uas nws ua rau cov tibneeg hauv lub moos Ais puam tsuaj tag.

27 Tej tsiaj txhu thiab tej qhov txhia chaw uas txeeb tau hauv lub moos ntawd los mas cov Ixayees coj los ua lawv tug raws li tej lus uas (יחוח)Yahweh hais rau Yahshua.  

28Ua li no Yahshua thiaj muab lub moos Ais hlawv kub nyhiab tag ua tej niag pawg cia txog niaj hnub nimno.

29 Thiab nws muab tus vajntxwv hauv lub moos Ais dai caj pas saum ntoo mus txog tsaus ntuj. Thaum hnub poob qho lawd Yahshua hais kom lawv muab nws lub cev tuag txo saum ntoo coj mus pov tseg rau ntawm txojkev uas nkag rau hauv rooj loog, mas lawv muab pob zeb los tsuam ua ib pawg loj loj nyob txog niaj hnub nimno.

​

Yahshua Nyeem Txoj Kevcai Saum Lub Roob Enpas

30 Yahshua txawm ua ib lub thaj xyeem rau (יחוח)Yahweh uas yog cov Ixayees Tus Tswv saum lub roob Enpas,

31 raws li (יחוח)Yahweh tus tub qhe Mauxes tau hais rau cov Ixayees. Nws ua lub thaj raws li uas sau cia rau hauv Mauxes phau ntawv kevcai hais tias, cia li muab tej pob zeb uas tsis tau muab txhwm muab npawm los ua xwb, yog tej pob zeb uas tsis tau raug hniav hlau hniav riam li. Mas lawv muab tsiaj ua kevcai hlawv huvsi xyeem rau (יחוח)Yahweh saum lub thaj ntawd thiab tua tsiaj ua kevcai xyeem sib raug zoo.

32 Thiab Yahshua sau Mauxes txoj kevcai uas Mauxes twb sau cia lawd rau tej pob zeb ntawm lub thaj ntawd tab meeg cov Ixayees.

33 Ib tsoom Ixayees sawvdaws, tsis hais lwm haiv neeg uas nrog lawv nyob thiab cov uas yug hauv cov Ixayees thiab cov kev txwj laug thiab cov nom tswv thiab cov uas tu plaub sawv ntsug ntawm lub phij xab ob sab, tab meeg cov Levis uas yog pov thawj kwv (יחוח)Yahweh lub phij xab sib cog lus. Ib nrab sawv ncaj ntawm lub roob Kelixis, ib nrab sawv ncaj ntawm lub roob Enpas, raws li (יחוח)Yahweh tus tub qhe Mauxes tau hais ua ntej kom cov Levis foom koob hmoov rau cov Ixayees.

34 Dhau ntawd Yahshua thiaj nyeem txoj kevcai no txhua lo lus huvsi rau lawv mloog, yog tej lus foom koob hmoov thiab tej lus tsawm foom, raws li txhua yam uas sau rau hauv phau ntawv kevcai.

35 Tsis tshuav ib lo lus uas Mauxes tau hais cia es Yahshua tsis muab nyeem tab meeg ib tsoom Ixayees sawvdaws thiab tej pojniam menyuam thiab lwm haiv neeg uas nrog lawv nyob mloog.