Akhas Lub Txim

1 Cov Ixayees tsis mloog lus rau tej uas muab cais rau (יחוח)Yahweh, vim yog Akhas tau muab tej uas muab cais lawm qee yam los yuav mas (יחוח)Yahweh txojkev npau taws thiaj li tshwm plaws rau cov Ixayees.  Akhas yog Khamis tus tub, nws yawg yog Xadis, nws yawg koob yog Xelag, yog xeem Yahdah.

2 Yahshua txib tibneeg tawm hauv Yelikhaus mus rau lub moos Ais uas nyob ze Npe‑avees uas nyob ntawm lub moos Npe‑ees sab hnub tuaj thiab hais rau lawv tias, cia li mus tshuaj saib lub tebchaws ntawd. Lawv thiaj mus tshuaj saib lub moos Ais.

3 Lawv rov qab los hais rau Yahshua tias, tsis tag txib cov pejxeem sawvdaws mus, tsuas yog tso ob txhiab peb txhiab leej mus ntaus lub moos Ais xwb. Tsis tag yuav cia cov pejxeem sawvdaws nkim zog mus qhov ntawd, rau qhov lawv muaj tibneeg tsawg tsawg xwb.

4 Yog li ntawd thiaj muaj kwvlam peb txhiab leej mus ntaus lub moos, tiamsis lawv khiav tawg tag ntawm cov tibneeg Ais rov qab los.

5 Cov tibneeg Ais muab lawv tua tuag kwvlam peb caug rau leej thiab muab lawv ntiab khiav ntawm rooj loog mus txog lub moos Senpalis, thiab muab lawv tua taug kev nqis hav los. Cov Ixayees thiaj ntshai ua siab ntsws yaj tag yam li dej.

6 Ces Yahshua txawm dua rhe nws lub tsho khwb nkaus rau hauv av rau ntawm (יחוח)Yahweh lub phij xab mus txog tsaus ntuj thiab Ixayees cov kev txwj laug kuj ua ib yam li ntawd. Lawv tsuab hmoov av rau saum lawv taubhau.

7 Yahshua thiaj hais tias, Au Txiv (יחוח)Yahweh, ua cas koj coj haiv neeg no hla tus dej Yaladees los es muab peb cob rau hauv cov Amaulais txhais tes ua kom puam tsuaj?  Kheev yog peb txaus siab nyob sab ntug dej Yaladees hnub tuaj.

8 Au Tus Tswv, kuv yuav hais li cas lauj, vim cov Ixayees twb tig kiag khiav yeeb ncuab los lawm?

9 Cov Khana‑as thiab cov tibneeg uas nyob hauv lub tebchaws no sawv daws yuav tau hnov thiab yuav tuaj vij nkaus peb thiab muab peb lub npe rhuav kom ploj ntais hauv ntiajteb.  Mas koj yuav ua li cas rau koj lub npe uas loj kawg?

10 (יחוח)Yahweh hais rau Yahshua tias, cia li sawv tsees. Ua li cas koj yuav khwb nkaus li kod?

11 Cov Ixayees tau ua txhaum, lawv ntxeev siab rau tej lus cog tseg uas kuv muab cob rau lawv. Lawv qee tej uas muab cais rau kuv, lawv nyiag thiab lawv dag, lawv muab khaws cia nrog lawv tej qhov txhia chaw ua ke.

12 Vim li no cov Ixayees tiv tsis tau lawv tej yeeb ncuab lawv thiaj tig kiag khiav ntawm lawv tej yeeb ncuab los lawm, rau qhov lawv yog yam uas raug muab cais ua kom puam tsuaj lawm. Kuv yuav tsis nrog nej nyob li lawm, yuav yog nej muab tej uas muab cais rau kuv ntawd ua kom puam tsuaj ploj hauv nej mus tso.

13 Cia li sawv tsees, tu kom cov pejxeem dawb huv thiab hais tias, nej cia li tu kom nej dawb huv rau tagkis, rau qhov (יחוח)Yahweh uas yog Ixayees Tus Tswv hais li no tias, cov Ixayees es, muaj tej yam uas muab cais rau (יחוח)Yahweh nyob hauv nej cov, nej thiaj tiv tsis tau nej tej yeeb ncuab mus txog thaum nej muab tej uas muab cais rau kuv ntawd rho tawm hauv nej mus.

14 Tagkis kaj ntug nej tuaj zuj zus ua ib xeem ib xeem.  Xeem twg uas

(יחוח)Yahweh ntes tau kuj tuaj zuj zus ua ib cum ib cum. Cum twg uas (יחוח)Yahweh ntes tau kuj tuaj zuj zus ua ib yig ib yig.  Thiab yim twg uas (יחוח)Yahweh ntes tau kuj tuaj zuj zus ua ib leeg ib leeg.

15 Tus uas ntes tau, nws yog tus uas muaj tej uas muab cais rau (יחוח)Yahweh. Nws yuav raug muab hlawv pov tseg, yog nws tus kheej thiab txhua yam uas nws muaj, vim nws ntxeev siab rau (יחוח)Yahweh tej lus cog tseg thiab nws ua yam uas txaj muag kawg li rau hauv cov Ixayees.

16 Yahshua thiaj sawv ntxov tsees thiab coj cov Ixayees tuaj zuj zus ua ib xeem ib xeem, mas xeem Yahdah raug ntes.

17 Nws thiaj coj zuj zus ib cum ib cum hauv xeem Yahdah tuaj, mas Xelag cum thiaj raug ntes. Nws thiaj coj Xelag cum tuaj zuj zus ua ib yig ib yig mas Xadis yim raug ntes.  

18 Nws coj Xadis yim tuaj zuj zus ib leeg ib leeg mas Akhas thiaj raug ntes. Akhas yog Khamis tus tub, nws yawg yog Xadis nws yawg koob yog Xelag, yog xeem Yahdah.

19 Yahshua thiaj hais rau Akhas tias, tub es, cia li ua rau (יחוח)Yahweh uas yog cov Ixay-ees Tus Tswv tau koob meej thiab qhuas nws. Cia li qhia rau kuv saib koj tau ua abtsi lawm, tsis txhob zais ntawm kuv kiag li.

20 Mas Akhas teb Yahshua tias, muaj tseeb tiag, kuv tau ua txhaum rau (יחוח)Yahweh uas yog cov Ixayees Tus Tswv, kuv tau ua li no.  

21 Tej qhov txhia chaw uas txeeb tau ntawd kuv pom ib lub tsho ntev Sinas zoo nkauj heev thiab ob puas sekhees nyiaj thiab ib daim kub nyhav tsib caug sekhees. Kuv ntshaw tej no kuv thiaj muab los. Saib maj, tej no muab zais rau hauv av hauv kuv lub qab tsev ntaub, cov nyiaj nyob kiag hauv qab.

22 Yahshua txawm txib tibneeg mus saib mas lawv khiav mus txog hauv nws lub tsev ntaub mas pom tej no muab faus rau hauv nws lub qab tsev ntaub, cov nyiaj nyob kiag hauv qab.  

23 Lawv thiaj muab rho tawm hauv lub tsev ntaub coj mus rau Yahshua thiab cov Ixayees sawvdaws, thiab lawv muab tso tab meeg ntawm (יחוח)Yahweh xubntiag.

24 Ces Yahshua thiab cov Ixayees sawvdaws txawm coj Akhas uas yog Xelag tus tub thiab cov nyiaj thiab lub tsho ntev thiab daim kub ntawd thiab nws tej tub tej ntxhais, tej nyuj tej nees luav tej yaj tej tshis thiab nws lub tsev ntaub thiab txhua yam uas nws muaj huvsi coj mus rau hauv lub Hav Akhauj.

25 Mas Yahshua hais tias, ua cas koj coj kev ceeblaj txom nyem los raug peb? Hnub no (יחוח)Yahweh coj kev ceeblaj txom nyem los txog koj.  Cov Ixayees sawvdaws thiaj xuas pob zeb ntaus nws tuag thiab xuas pob zeb ntaus nws tsev neeg tuag thiab muab lawv hlawv pov tseg,

26 thiab khaws pob zeb tib ua ib pawg loj rau saum lawv nyob los txog niaj hnub nimno. Mas (יחוח)Yahweh thiaj thim nws txojkev npau taws heev. Vim li ntawd niaj hnub nimno luag tseem hu lub chaw ntawd tias Hav Akhauj.