Lub Moos Yelikhaus Puam Tsuaj

1 Vim cov Ixayees tuaj ze mas luag thiaj muab lub moos Yelikhaus kaw ruaj ruaj li, tsis muaj leejtwg tawm tau thiab nkag los tau li.

2 (יחוח)Yahweh hais rau Yahshua tias, kuv muab lub moos Yelikhaus thiab tus vajntxwv thiab tej tub rog uas siab loj siab tuab cob rau hauv koj txhais tes lawm.

3 Koj thiab koj cov tub rog huvsi yuav tau mus ncig lub moos ib hnub ib ncig.  Nej mus ncig li no rau hnub.

4 Yuav muaj xya tus pov thawj coj xya lub raj kub yaj ua lub phij xab ntej.  Mas hnub uas xya, nej yuav tau mus xya ncig thiab cov pov thawj tshuab raj kub yaj.

5 Thaum lawv tshuab raj ua lub suab ntev loo, thaum nej hnov lub suab raj ntawd, mas cov pejxeem sawvdaws yuav ib txhij qw nrov nrov, mas lub moos ntawd tej ntsa loog yuav pob tag nrho, cov pejxeem yuav ncaj nraim txeem plaws rau hauv lub moos. 

6 Noo tus tub Yahshua thiaj hu cov pov thawj tuaj thiab hais tias, nej cia li kwv lub phij xab sib cog lus mus thiab cia xya tus pov thawj coj xya lub raj kub yaj ua (יחוח)Yahweh lub phij xab ntej.

7 Thiab nws hais rau cov pejxeem tias, cia li tawm mus ncig lub moos ntawd, thiab cia cov tub rog uas coj cuab yeej mus ua (יחוח)Yahweh lub phij xab ntej.

8 Thaum Yahshua hais rau cov pejxeem tag lawd, xya tus pov thawj uas coj xya lub raj kub yaj rau ntawm (יחוח)Yahweh xubntiag kuj mus thiab tshuab raj. Mas (יחוח)Yahweh lub phij xab sib cog lus mus ua lawv qab.

9 Cov tub rog uas tuav cuab yeej mus ua cov pov thawj uas tshuab raj ntej, thiab pab tub rog faj seeb tom qab kuj mus raws qab lub phij xab. Cov uas tshuab raj kuj tshuab tsis tu li.

10 Ces Yahshua hais rau cov pejxeem tias, nej tsis txhob qw, tsis txhob kheev leejtwg hnov nej lub suab.  Nej yuav qos ncauj tsis txhob hais ib lo lus li mus txog hnub uas kuv hais kom nej qw, nej mam li qw.

11 Nws txawm kom (יחוח)Yahweh lub phij xab mus ncig lub moos li no, yog mus ncig ib lwm. Ces lawv rov los rau hauv lub zos pw ib hmos hauv lub zos.

12 Hnub tom qab Yahshua sawv ntxov tsees, cov pov thawj kuj rov kwv (יחוח)Yahweh lub phij xab mus.

13 Thiab xya tus pov thawj uas coj xya lub raj kub yaj mus ua (יחוח)Yahweh lub phij xab ntej thiab tshuab raj tsis tu li. Cov tub rog tuav cuab yeej kuj mus ua lawv ntej thiab cov tub rog uas faj seeb tom qab kuj raws qab (יחוח)Yahweh lub phij xab, thiab tshuab raj kub yaj tsis tu li.

14 Hnub ob lawv kuj mus ncig lub moos ntawd ib lwm ces rov los rau hauv lub zos. Lawv ua li no tau rau hnub.

15 Hnub uas xya lawv sawv ntxov kaj ntug txoog thiab mus ncig lub moos ntawd xya lwm.  Tib hnub ntawd lawv ncig lub moos xya lwm.

16 Lwm uas xya, thaum cov pov thawj tshuab raj ua suab ntev loo, Yahshua hais rau cov pejxeem tias, cia li qw lauj! Rau qhov (יחוח)Yahweh muab lub moos no rau nej lawm.

17 Lub moos thiab txhua yam huvsi hauv lub moos ntawd yuav muab cais rau (יחוח)Yahweh es muab ua kom puam tsuaj. Tsuas yog tseg tus poj muag cev Lahaj thiab txhua tus uas nyob hauv nws lub tsev dim txojsia xwb, rau qhov nws pab zais peb cov tibneeg uas tshuaj tebchaws.

18 Tiamsis nej mas yuav tau tsis txhob kov tej uas cais es yuav muab ua kom puam tsuaj ntawd.  Yog nej khaws tej uas nej muab cais ntawd ib yam abtsi yuav, ces nej yuav ua rau cov Ixayees lub zos raug puam tsuaj thiab coj kev txom nyem los.  

19 Tiamsis tej nyiaj tej kub thiab tej twj siv uas yog xuas tooj liab thiab hlau ua yog yam uas dawb huv rau (יחוח)Yahweh, mas yuav tau coj mus cia rau hauv (יחוח)Yahweh lub txhab.

20 Yog li no cov pejxeem thiaj li qw thiab cov pov thawj tshuab raj. Thaum cov pejxeem hnov lub suab raj nrov ntev loo, lawv kuj qw nrov heev, lub ntsa loog thiaj li pob tag nrho, cov pejxeem txhua tus thiaj ncaj nraim txeem plaws rau hauv lub moos thiab txeeb kiag lub moos ntawd.

21 Lawv xuas ntaj rhuav tshem txhua yam puam tsuaj tag nrho huvsi tsis hais pojniam txivneej, tej laus tej hluas, tej nyuj tej yaj tej nees luav huvsi.

22 Yahshua hais rau nkawv uas mus tshuaj tebchaws ntawd tias, neb cia li mus rau hauv tus poj muag cev lub tsev thiab coj tus pojniam ntawd thiab txhua tus uas txheeb ze nws tawm los raws li neb tau cog lus twv cia rau nws lawd. 

23 Ob tug hluas uas mus tshuaj tebchaws thiaj li nkag mus coj Lahaj thiab nws niam nws txiv thiab nws tej nus thiab txhua tus uas txheeb ze nws tawm los. Nkawv coj lawv mus nyob rau nraum cov Ixayees lub yeej.

24 Lawv muab lub moos ntawd thiab txhua yam uas nyob hauv hlawv kub nyhiab tag huvsi, tsuas yog tseg tej nyiaj tej kub thiab tej twj siv uas xuas tooj liab thiab hlau ua. Lawv coj tej ntawd los cia rau hauv lub txhab uas nyob hauv (יחוח)Yahweh lub tsev.

25 Tiamsis tus poj muag cev Lahaj thiab nws txiv tsev neeg thiab txhua tus uas txheeb ze nws, Yahshua kuj tseg lawv dim txojsia mas nws nrog cov Ixayees nyob los txog niaj hnub nimno vim yog nws zais nkawv tshuaj tebchaws uas Yahshua xa mus tshuaj lub moos Yelikhaus.

26 Thaum ntawd Yahshua tsawm foom tej lus no cia tias, yog leejtwg sawv los tsim lub moos Yelikhaus no dua tshiab, nws yuav raug tsawm foom tab meeg (יחוח)Yahweh. Yog leejtwg ua tej taw ntsa loog, nws tus tub hlob yuav puam tsuaj. Yog leejtwg tsim tej rooj loog, nws tus tub ntxawg yuav puam tsuaj.

27 Yog li no (יחוח)Yahweh thiaj li nrog nraim Yahshua thiab Yahshua lub koob meej nrov nto moo lug thoob lub tebchaws.