Ua Kevcai Txiav Ntawm Kilakas

1 Thaum cov Amaulais tej vajntxwv sawvdaws uas nyob ntawm tus dej Yaladees sab hnub poob thiab cov Khana‑as tej vajntxwv sawvdaws uas nyob ntawm ntug hiavtxwv tau hnov tias (יחוח)Yahweh ua rau tus dej Yaladees qhuav mus txog thaum cov Ixayees hla dhau huvsi, mas lawv lub siab ntshai yaj tag, thiab lawv tsis muaj siab ua abtsi li lawm, vim yog tim cov Ixayees.

2 Thaum ntawd (יחוח)Yahweh hais rau Yahshua tias, xuas zeb hauvswm ua riam es muab cov Ixayees ua kevcai txiav, yog zaum uas ob.

3 Yahshua thiaj muab zeb hauvswm ua riam thiab muab cov Ixayees ua kevcai txiav ntawm Kinpe‑es Ha‑alalaus.

4 Qhov uas Yahshua muab lawv ua kevcai txiav yog vim cov txivneej Ixayees uas txawj ua rog sawv daws uas tawm hauv Iziv tebchaws los kuj tuag tag rau ntu uas lawv tawm hauv Iziv tebchaws los taug kev rau hauv tebchaws moj sab qhua lawm.

5 Txawm yog cov uas tawm hauv Iziv tebchaws los ua kevcai txiav txhua tus lawm los, txhua tus uas yug taug kev hauv tebchaws moj sab qhua tom qab uas tawm hauv Iziv tebchaws los tsis tau ua kevcai txiav.

6 Rau qhov cov Ixayees taug kev hauv tebchaws moj sab qhua tau plaub caug xyoo mus txog thaum cov uas txawj ua rog uas tawm hauv Iziv tebchaws los tuag tag huvsi lawm, vim lawv tsis mloog (יחוח)Yahweh lus. (יחוח)Yahweh tau cog lus twv rau lawv tias, nws yuav tsis kheev lawv pom lub tebchaws uas (יחוח)Yahweh cog lus rau lawv tej poj koob yawm txwv tias yuav pub rau peb, yog lub tebchaws uas muaj kua mis thiab zib ntab ntws nto.

7 Lawv cov menyuam uas (יחוח)Yahweh pub los nyob lawv lub chaw ntawd, Yahshua kuj muab ua kevcai txiav, vim lawv tsis tau ua kevcai txiav rau thaum lawv taug kev los.

8 Thaum muab cov txivneej sawvdaws ua kevcai txiav tag lawm, lawv kuj so hauv lub zos mus txog thaum lawv mob zoo tag.

9 (יחוח)Yahweh hais rau Yahshua tias, hnub no kuv muab qhov uas nej poob ntsej muag hauv Iziv tebchaws dov pov tseg lawm. Yog li no thiaj hu lub chaw ntawd ua Kilakas txog niaj hnub nimno.

10 Thaum cov Ixayees tseem tsuam chaw nyob ntawm Kilakas mas hnub xiab kaum plaub lub ib hlis thaum yuav tsaus ntuj, lawv txawm ua kevcai Hla Dhau rau ntawm lub tiaj Yelikhaus.

11 Dhau hnub uas ua kevcai Hla Dhau hnub tom qab, lawv txawm tau noj tej qoob loo hauv lub tebchaws ntawd, yog tej qoob uas muab kib thiab tej ncuav tsis xyaw keeb.

12 Mas hnub tom qab thaum lawv tau noj tej qoob loo hauv lub tebchaws ntawd lawm, cov manas txawm tu nrho, cov Ixayees tsis muaj manas dua li lawm.  Xyoo ntawd lawv tau noj tej qoob loo hauv lub tebchaws Khana‑as.

​

Yahshua Thiab Tus Yawg Uas Tuav Rawv Ntaj

13 Thaum Yahshua nyob ze ntawm lub moos Yelikhaus nws tsa muag saib pom ib tug txivneej tuav rawv ntaj sawv nres tom nws hauv ntej.  Yahshua txawm txav mus cuag nws thiab hais rau nws tias, koj tuaj peb tog los tuaj yeeb ncuab tog?

14 Tus ntawd hais tias, tsis yog. Kuv tuaj no yog tuaj ua (יחוח)Yahweh pab tub rog tus thawj. Ces Yahshua txawm khwb nkaus rau hauv av pe thiab hais tias, yawg hlob, koj yuav kom kuv uas yog koj tus tub qhe ua abtsi?

15 Mas (יחוח)Yahweh tus thawj tub rog hais rau Yahshua tias, cia li hle koj nkawm khau ntawm koj kotaw, rau qhov lub chaw uas koj sawv no yog lub chaw uas dawb huv. Yahshua kuj ua raws li ntawd.