Tej Tebchaws Uas Tseem Yuav Txeeb

1 Thaum Yahshua laus heev muaj hnub nyoog ntau lawm, (יחוח)Yahweh hais rau nws tias, koj laus heev muaj hnub nyoog ntau lawm, tiamsis tej tebchaws uas yuav txeeb tseem tshuav ntau.

2 Tej tebchaws uas tseem tshuav yuav txeeb ntawd, yog Filixatees tebchaws huvsi thiab cov Kesus tebchaws huvsi.

3 Txij ntua Sihaus uas nyob Iziv tebchaws sab hnub tuaj mus rau sab ped txog ntua Ekhoos ciam teb mas suav ua cov Khana‑as tebchaws. Muaj tsib tug vajntxwv kav cov Filixatees yog tej vajntxwv uas nyob hauv lub moos Kaxas, lub moos Asadaus, lub moos Akheloos, lub moos Nkas, thiab lub moos Ekhoos. Thiab tshuav Avis tebchaws,

4 thiab tej tebchaws uas nyob sab nrad, yog cov Khana‑as tebchaws huvsi thiab Me‑alas uas yog cov Xaidoos ib lub moos, mus txog lub moos Afes, mus txog ntua cov Amaulais ciam teb,

5 thiab cov Kenpas teb chaws, thiab Lenpanoos tebchaws huvsi mus rau sab hnub tuaj, txij ntua lub moos Npa‑as Nkas uas nyob ntawm taw roob Hawmoos txog ntua txojkev uas mus rau lub moos Hamas,

6 thiab cov uas nyob pem toj siab ntawm Lenpanoos tebchaws mus txog Milefauma‑is, uas puavleej yog tibneeg Xaidoos. Kuv yuav ua tus uas ntiab lawv sawvdaws tawm ntawm cov Ixayees hauv ntej mus. Tsuav yog koj faib lub tebchaws no ua qub txeeg qub teg rau cov Ixayees raws li uas kuv hais rau koj.

7 Nimno cia li faib lub tebchaws no ua qub txeeg qub teg rau cuaj xeem thiab ib nrab xeem Manaxes.

​

Faib Tebchaws Sab Dej Yaladees Hnub Tuaj

8 Ib nrab xeem Manaxes, thiab xeem Lunpees, thiab xeem Nkas, twb tau qub txeeg qub teg uas Mauxes muab rau lawv sab dej Yaladees hnub tuaj. Tej uas (יחוח)Yahweh tus tub qhe Mauxes muab rau lawv,

9 yog txij ntua lub moos Alau‑aws  uas nyob ntawm ntug hav Anoos thiab lub moos uas nyob hauv lub plawv hav thiab tej nras tiaj toj siab Medenpas huvsi txog ntua Dinpoos,

10 thiab tej moos uas cov Amaulais tus vajntxwv Xihoos uas nyob hauv Hesanpoos kav huvsi mus txog ntua cov Asmoos ciam teb,

11 thiab Kile‑as  uas yog cov Kesus thiab cov Ma‑akhas tebchaws, thiab lub roob Hawmoos huvsi, thiab Npasas tebchaws huvsi, mus txog ntua Xalekhas

12 thiab lub tebchaws uas Npasas tus vajntxwv Aus uas nyob hauv Athalaus thiab Ede‑is kav huvsi. Tshuav Aus tib leeg uas yog tibneeg Lefa‑is nyob xwb.  Tej moos no Mauxes twb ntaus yeej thiab ntiab luag khiav tag lawm.

13 Tiamsis cov Ixayees tsis tau ntiab cov Kesus thiab cov Ma‑akhas khiav mus. Cov Kesus thiab cov Ma‑akhas tseem nyob hauv cov Ixayees txog niaj hnub nimno.

14 Tsuas yog tib xeem Levis Mauxes thiaj tsis tu tebchaws ua qub txeeg qub teg rau. Tej uas muab hlawv xyeem rau (יחוח)Yahweh uas yog cov Ixayees Tus Tswv, yog cov Levis li qub txeeg qub teg, raws li (יחוח)Yahweh hais rau lawv lawd.

15 Mauxes muab qub txeeg qub teg rau xeem Lunpees raws li lawv tej cum.

16 Ua li ntawd, lawv lub tebchaws thiaj li yog txij ntua lub moos Alau‑aws  uas nyob ntawm ntug hav Anoos, thiab lub moos uas nyob hauv lub plawv hav ntawd, thiab tej nras tiaj toj siab ntawm lub moos Medenpas huvsi,

17 thiab lub moos Hesanpoos, thiab Hesanpoos tej moos uas nyob tej nras tiaj toj siab, yog Dinpoos, Npamaus Npa‑as, Npenpa‑as Me‑oos

18 thiab Yahaj, Khedemaus, Mefa‑as,

19 Khiliyastha‑is, Ximas, thiab Xelesahas uas nyob saum lub pov roob hauv lub hav ntawd,

20 thiab Npepe-aus, thiab tej ntav toj Pixakas, thiab Npe Yesimaus,

21 yog tej moos uas nyob tej nras tiaj toj siab huvsi, yog tag nrho lub tebchaws uas cov Amaulais tus vajntxwv Xihoos hauv Hesanpoos kav. Mauxes ntaus yeej nws thiab Midees cov thawj uas zwm rau vajntxwv Xihoos, yog Evis, Lekhees, Xuv, Hawj thiab Lenpas uas nyob hauv lub tebchaws ntawd.

22 Cov Ixayees kuj xuas ntaj tua tau Npe‑aus tus tub Npala‑as uas ua txiv neeb txiv yaig ua ke nrog cov uas lawv tua tau ntawd.

23 Xeem Lunpees li tebchaws muaj tus dej Yaladees ua ciam teb. No yog tej moos thiab tej zej zog uas yog cov Lunpees thiab lawv tej cum li qub txeeg qub teg.

24 Mauxes muab qub txeeg qub teg rau xeem Nkas raws li lawv tej cum.

25 Lawv lub tebchaws yog Yaxaws thiab tej moos hauv Kile‑as tebchaws huvsi, thiab cov Asmoos ib nrab tebchaws mus txog ntua Alau‑aws uas nyob lub moos Lanpas sab hnub tuaj,

26 thiab txij ntua lub nroog Hesanpoos mus txog Lamas Mixapes thiab Npethaunis, thiab txij ntua Mahana‑is mus txog Denpis tebchaws,

27 thiab hauv lub vuas hav muaj lub moos Npehalas, Npenilas, Xukhaus thiab Xafoos, yog tej tebchaws uas Hesanpoos tus vajntxwv Xihoos kav uas tseem tshuav tsis tau muab faib, muaj tus dej Yaladees ua ciam teb, mus txog ntua qab Hiavtxwv Khineles, uas yog sab dej Yaladees hnub tuaj.

28 Tej no yog tej moos thiab tej zej zog uas yog xeem Nkas thiab lawv tej cum li qub txeeg qub teg.

29 Mauxes muab qub txeeg qub teg rau ib nrab xeem Manaxes, yog muab faib rau ib nrab xeem Manaxes raws li lawv tej cum.

30 Lawv lub tebchaws yog txij ntua lub moos Mahana‑is tag nrho Npasas teb chaws uas yog lub tebchaws uas Npasas tus vajntxwv Aus kav huvsi, yog Ya‑is txhua lub moos uas nyob hauv Npasas mas huvsi yog rau caum lub moos,

31 thiab Kile‑as ib nrab tebchaws thiab lub moos Athalaus thiab lub moos Ede‑is uas yog vajntxwv Aus hauv Npasas kav. Cov moos no yog muab faib rau Manaxes tus tub Makhis cum, yog faib rau Makhis cum ib nrab xwb raws li lawv tej tsev neeg.

32 Tej no yog tej qub txeeg qub teg uas Mauxes faib ntawm lub tiaj Mau‑as ntawm ntug dej Yaladees sab tim ub ntawm lub moos Yelikhaus sab hnub tuaj.

33 Mauxes tsis tu qub txeeg qub teg rau xeem Levis. (יחוח)Yahweh uas yog cov Ixayees Tus Tswv, yog lawv li qub txeeg qub teg raws li (יחוח)Yahweh hais rau lawv lawd.