Faib Tebchaws Sab Dej Yaladees Hnub Poob

1 No mus yog tej tebchaws uas cov Ixayees tau ua qub txeeg qub teg hauv Khana‑as tebchaws uas yog pov thawj Ele-axas thiab Noos tus tub Yahshua thiab cov thawj hauv txhua xeem txhua cum Ixayees faib rau lawv.

2 Tej qub txeeg qub teg no lawv muab ua ntawv rho faib rau cuaj xeem thiab ib nrab xeem, raws li (יחוח)Yahweh tau hais rau Mauxes lawd.

3 Rau qhov Mauxes twb muab qub txeeg qub teg rau ob xeem thiab ib nrab xeem sab dej Yaladees hnub tuaj lawm. Tiamsis nws tsis muab qub txeeg qub teg rau cov Levis.

4 Yahxej caj ces muaj ob xeem, yog xeem Manaxes thiab xeem Efa‑is. Tiamsis tsis faib tebchaws rau cov Levis, tsuas yog tau tej moos los nyob thiab tau tej tshav zaub ib ncig lub moos rau lawv tej tsiaj txhu thiab rau lawv tej cuab txhiaj cuab tam xwb.

5 Cov Ixayees ua raws li (יחוח)Yahweh hais rau Mauxes mas lawv thiaj muab lub tebchaws faib.

​

Muab Lub Moos Henploos Rau Khalej

6 Thaum ntawd xeem Yahdah tuaj cuag Yahshua ntawm Kilakas, mas Yefunes tus tub Khalej uas yog cum Khenas hais rau Yahshua tias, koj yeej paub txog tej uas (יחוח)Yahweh hais rau Mauxes uas yog (יחוח)Yahweh tus tibneeg ntawm Khades Npanias ntsig txog koj thiab kuv.

7 Thaum uas Mauxes uas yog (יחוח)Yahweh tus tub qhe txib kuv tawm hauv Khades Npanias mus tshuaj tebchaws, kuv hnub nyoog muaj plaub caug xyoo lawm, mas kuv tau coj xov los qhia rau nws raws li kuv pom tseeb.

8 Tiamsis cov kwvtij uas nrog kuv ua ke mus ntawd tau ua rau cov pejxeem siab yaj tag.  Tiamsis kuv ua raws li (יחוח)Yahweh uas yog kuv Tus Tswv lub siab nyiam kawg siab kawg ntsws.

9 Hnub ntawd, Mauxes thiaj cog lus twv tseg tias, lub tebchaws uas koj txhais kotaw mus tsuj ntawd yeej yuav poob ua qub txeeg qub teg rau koj thiab koj tej tub ki mus ib txhis li, rau qhov koj tau ua raws li (יחוח)Yahweh uas yog kuv Tus Tswv lub siab nyiam kawg siab kawg ntsws.

10 Saib maj, ib yam li (יחוח)Yahweh tau hais tseg lawd, nimno nws tseem pub kuv muaj txojsia nyob tau plaub caug tsib xyoo suav txij thaum nws hais li no rau Mauxes los, yog thaum cov Ixayees taug kev hauv tebchaws moj sab qhua.  Hnub no kuv twb muaj hnub nyoog yim caum tsib xyoo lawm.

11 Hnub no kuv tseem muaj zog ib yam nkaus li hnub uas Mauxes txib kuv mus.  Kuv tseem muaj zog ua rog li qub thiab tseem muaj zog mus mus los los yam li thaum ub.

12 Yog li no thov muab tej toj siab no uas (יחוח)Yahweh hais hnub ntawd rau kuv.  Rau qhov hnub ntawd koj yeej hnov hais tias cov tibneeg Anaj nyob qhov ntawd, muaj tej moos loj uas muaj ntsa loog khov heev. Nyaj (יחוח)Yahweh yuav nrog nraim kuv thiab kuv yuav ntiab tau cov tibneeg ntawd tawm mus, raws li (יחוח)Yahweh hais tseg lawd.

13 Mas Yahshua kuj foom koob hmoov rau nws, thiab muab Henploos rau Yefunes tus tub Khalej yuav ua qub txeeg qub teg.

14 Ces Henploos txawm poob ua qub txeeg qub teg rau Yefunes tus tub Khalej uas yog cum Khenas los txog niaj hnub nimno, rau qhov nws ua raws li (יחוח)Yahweh uas yog cov Ixayees Tus Tswv lub siab nyiam kawg siab kawg ntsws.

15 Lub moos Henploos ntawd yav thaum ub hu ua Khiliyas Anpas. Tus Anpas no yog tus uas loj tshaj plaws cov tibneeg Anaj. Lub tebchaws thiaj li so tsis ua rog.