Faib Teb Rau Xeem Efa‑is Thiab Xeem Manaxes

1 Tej teb uas faib rau Yahxej caj ces yog txij ntua tus dej Yaladees uas ze lub moos Yelikhaus, ntawm qhov dej txhawv uas nyob ntawm Yelikhaus sab hnub tuaj, mus rau hauv tebchaws moj sab qhua txij ntua Yelikhaus mus rau pem toj siab Npe‑ees,

2 mus ntawm Npe‑ees rau lub moos Lus, hla mus txog Athalaus uas yog cov Akhis teb chaws,

3 thiab nqis rau sab hnub poob txog cov Yafethais tebchaws, thiab mus txog lub moos Npes Hauloos nram tiaj nrag, mus txog Kexaws, mus kawg rau Hiavtxwv.

4 Yahxej caj ces uas yog xeem Manaxes thiab xeem Efa‑is thiaj tau qub txeeg qub teg.

5 Efa‑is thiab lawv tej cum li tebchaws yog li no. Lawv qub txeeg qub teg ciam teb sab hnub tuaj yog txij ntua lub moos Athalaus Adaj mus txog Npe Hauloos pem roob,

6 thiab ciam teb ntev mus txog ntua Hiavtxwv, muaj lub moos Mimethas nyob sab ped. Ciam teb sab hnub tuaj nkhaus los rau ntawm lub moos Tha‑anas Silaus, thiab hla lub moos no mus rau sab hnub tuaj txog lub moos Yanau‑as,

7 thiab nqis ntawm Yanau‑as mus txog ntua lub moos Athalaus thiab lub moos Na‑alas mus chwv rhuav lub moos Yelikhaus mus kawg rau dej Yaladees.

8 Ciam teb ntawm Thapuvas mus rau sab hnub poob mus txog tus dej Khanas mus kawg rau Hiavtxwv. No yog xeem Efa‑is thiab lawv tej cum li qub txeeg qub teg,

9 thiab yog tej moos uas nyob hauv xeem Manaxes tebchaws uas muab faib rau xeem Efa‑is thiab tej zej zog ib ncig ntawm cov moos ntawd.

10 Txawm li cas los xij, lawv tsis ntiab cov tibneeg Khana‑as uas nyob hauv lub moos Kexaws tawm mus. Ua li ntawd cov Khana‑as thiaj nrog cov Efa‑is nyob ua ke txog niaj hnub nimno, mas poob ua qhev thiab raug yuam ua haujlwm.

​