YAHSHUA 17

Faib Teb Rau Xeem Manaxes

1 Tej teb uas muab faib rau xeem Manaxes uas yog Yahxej tus tub hlob yog li no. Makhis uas yog Manaxes tus tub hlob thiab yog Kile‑as txiv, tau tebchaws Kile‑as  thiab Npasas tebchaws, rau qhov nws txawj txawj ua rog.

2 Manaxes thiab lawv tej cum uas tseem tshuav uas yuav faib teb rau yog cov no, Anpiyexaws, Heleb, Ali‑ees, Sekhees, Hefaws thiab Semidas. Cov txivneej no yog Yahxej tus tub hlob Manaxes caj ces thiab lawv tej cum.

3 Hefaws tus tub Xelaufehas muaj ntxhais xwb tsis muaj tub. Hefaws yog Kile‑as tus tub, Kile‑as yog Makhis tus tub, Makhis yog Manaxes tus tub. Xelaufehas cov ntxhais tej npe hu li no, Malas, Nau‑as, Haulas, Meekhas thiab Thilaxas.  

4 Lawv tuaj cuag pov thawj Ele‑axas thiab Noos tus tub Yahshua thiab cov uas ua hlob mas lawv hais tias, (יחוח)Yahweh twb hais kom Mauxes pub qub txeeg qub teg rau peb ib yam li pub rau peb cov kwvtij.  Ua li ntawd Yahshua thiaj li muab qub txeeg qub teg rau lawv cov no ib yam li muab rau lawv txiv cov kwvtij raws li (יחוח)Yahweh hais lawd.

5 Yog li no thiaj poob kaum tswv teb rau xeem Manaxes, tau tshaj cov teb uas nyob Kile‑as thiab Npasas ntawm dej Yaladees sab hnub tuaj,

6 rau qhov Manaxes cov ntxhais twb nrog nws cov tub tau qub txeeg qub teg. Kile‑as tebchaws thiaj muab faib rau Manaxes cov xeeb ntxwv uas tsis tau muaj teb.

7 Manaxes cov teb txij ntua Asaws tebchaws mus txog Mimethas uas nyob ntawm lub moos Sekhees sab hnub tuaj, thiab ciam teb mus rau nram qab teb mus txog cov tibneeg Ees Thapuvas.

8 Tej teb ntawm Thapuvas ua Manaxes tug tiamsis lub moos Thapuvas uas nyob ntawm Manaxes ciam teb ua Efa‑is caj ces tug.

9 Thiab ciam teb kuj nqis mus txog tus dej Khanas. Tej moos uas nyob dhau tus dej rau sab nrad yog Manaxes cov tebchaws, tiamsis tej moos yog Efa‑is li tug. Thiab Manaxes ciam teb taug tus dej ntawd sab ped mus kawg rau ntawm Hiavtxwv.

10 Lub tebchaws sab nrad yog Efa‑is, lub tebchaws sab ped yog Manaxes li, muaj Hiavtxwv ua ciam teb. Sab ped mus kawg rau ntawm Asaws tebchaws, thiab sab hnub tuaj kawg rau ntawm Ixakhas tebchaws.

11 Nyob hauv Ixakhas thiab Asaws tebchaws, Manaxes muaj tej moos no, Npesas thiab tej zej zog ib ncig ntawd, thiab lub moos Ile‑as thiab tej zej zog ib ncig ntawd, thiab cov tibneeg hauv lub moos Daus thiab tej zej zog ib ncig ntawd, thiab cov tibneeg hauv lub moos Eedaus thiab tej zej zog ib ncig ntawd, thiab cov tibneeg hauv lub moos Tha‑anas thiab tej zej zog ib ncig ntawd, thiab cov tibneeg hauv lub moos Mekidaus (lub moos uas peb ntawd yog Nafadaus.) 12 Tiamsis cov Manaxes txeeb tsis tau tej moos ntawd ua lawv tug mas cov Khana‑as tseem tiv nyob hauv lub tebchaws ntawd.

13 Tiamsis thaum cov Ixayees muaj zog lawm mas lawv yuam cov Khana‑as ua haujlwm, tiamsis tsis muab ntiab khiav tawm mus.

14 Tiamsis xeem Yahxej hais rau Yahshua tias, ua cas koj faib ib thaj ua ib feem ua qub txeeg qub teg rau peb xwb? Peb muaj coob coob rau qhov (יחוח)Yahweh foom koob hmoov rau peb los txog niaj hnub nimno.

15 Mas Yahshua hais rau lawv tias, yog nej muaj coob coob mas nej cia li mus luaj teb pem tej hav zoov hauv Pelixais thiab Lefa‑is tebchaws, rau qhov Efa‑is tej toj siab nqaim tsis txaus nej nyob.

16 Xeem Yahxej thiaj hais tias, tej toj siab no tsis txaus peb cov, mas cov Khana‑as uas nyob nram nruab tiaj nrag muaj tsheb nees ua rog uas yog hlau, yog cov uas nyob hauv Npesas thiab tej zej zog ib ncig thiab hauv lub hav Yile‑ees.

17 Mas Yahshua hais rau Yahxej caj ces uas yog Manaxes thiab Efa‑is tias, nej muaj coob coob thiab muaj zog heev, mas tsis yog nej yuav tau ib thaj xwb.  

18 Tej toj siab ntawd yuav ua nej li, txawm yog hav zoov los nej cia li mus luaj thiab txeeb ua nej tug tag nrho. Txawm yog cov Khana‑as muaj tsheb hlau ua rog thiab lawv muaj zog heev los nej yuav ntiab tau lawv