Faib Teb Ntawm Silaus

1 Ib tsoom pejxeem Ixayees sawv daws tuaj txoos ua ke ntawm Silaus thiab tsa lub tsev ntaub sib ntsib rau qhov ntawd. Lawv twb ntaus yeej lub teb chaws ntawd lawm.

2 Tseem tshuav cov Ixayees xya lub xeem uas tsis tau faib qub txeeg qub teg rau.

3 Mas Yahshua thiaj hais rau cov Ixayees tias, nej yuav tos ntev li cas li mus txeeb tebchaws ua nej tug uas (יחוח)Yahweh uas yog nej tej poj koob yawm txwv Tus Tswv twb muab rau nej lawm?

4 Cia li xaiv ib lub xeem peb leeg mas kuv yuav txib lawv cov ntawd mus ncig kom thoob plaws hauv lub tebchaws, kom sau lub tebchaws saib zoo li cas thiaj paub muab pub ua qub txeeg qub teg, lawv li rov los qhia rau kuv.

5 Lawv yuav tau muab faib ua xya feem. Cov Yahdah yuav nyob hauv lawv tebchaws uas yog yav qab teb, thiab Yahxej caj ces yuav nyob hauv lawv tebchaws uas yog sab ped.

6 Nej sau tej ciam teb hauv lub tebchaws ua xya feem mas coj tej uas nej sau ntawd los qhia rau kuv ntawm no, mas kuv yuav ua ntawv rho faib rau nej ntawm no rau ntawm (יחוח)Yahweh uas yog peb Tus Tswv xubntiag.

7 Cov Levis tsis muaj feem nrog nej tau. Lawv tej haujlwm uas ua (יחוח)Yahweh li pov thawj yog lawv li qub txeeg qub teg lawm. Xeem Nkas thiab xeem Lunpees thiab ib nrab xeem Manaxes twb tau lawv qub txeeg qub teg sab dej Yaladees hnub tuaj uas (יחוח)Yahweh tus tub qhe Mauxes muab rau lawv lawm.

8 Lawv cov ntawd kuj sawv kev mus thiab Yahshua hais rau cov uas yuav sau ciam teb ntawd tias, cia li mus ncig kom thoob plaws hauv lub tebchaws sau saib lub tebchaws zoo li cas mas rov los cuag kuv.  Kuv yuav muab ua ntawv rho faib rau nej tab meeg (יחוח)Yahweh xubntiag ntawm Silaus.  

9 Yog li ntawd, lawv thiaj mus thoob plaws hauv lub tebchaws thiab muab lub tebchaws thiab tej moos sau rau hauv ntawv faib ua xya feem, mas lawv rov los cuag Yahshua hauv lub zos ntawm Silaus.  

10 Mas Yahshua muab ua ntawv rho rau lawv tab meeg (יחוח)Yahweh lub xubntiag ntawm Silaus, thiab Yahshua muab lub tebchaws faib rau cov Ixayees ntawm lub chaw ntawd, txhua xeem nyias muaj nyias feem.

​

Faib Teb Rau Xeem Npeeyamees

11 Rho ntawv rau xeem Npeeyamees thiab lawv tej cum, mas rho tau ntsuj tebchaws nyob ntawm xeem Yahdah thiab xeem Yahxej ntu nruab nrab.

12 Lawv ciam teb sab ped yog pib ntawm dej Yaladees mus txog lub caj qaum roob ntawm Yelikhaus sab ped, hla kiag tebchaws toj siab rau sab hnub poob mus kawg rau ntawm tebchaws moj sab qhua Npe‑avees.

13 Txuas qhov ntawd tus ciam teb mus rau sab nrad ncaj rau lub moos Lus uas yog lub moos Npe‑ees, thiab mus rau lub caj qaum roob Lus, thiab ciam teb nqis mus txog Athalaus Adaj uas nyob pem roob uas nyob ntawm lub moos Npes Hauloos tiaj nrag sab nrad.

14 Ciam teb sab hnub poob kuj nkhaus mus rau sab nrad ntawm lub roob uas ncaj lub moos Npes Hauloos sab nrad mus kawg rau ntawm Khiliyas Npa‑as (uas yog Khiliyas Ye‑alis), yog xeem Yahdah li ib lub moos.  No yog ciam teb sab hnub poob.

15 Ciam teb sab nrad pib ntawm lub moos Khiliyas Ye‑alis mas qhov ntawd mus rau sab hnub poob mus txog lub hauv dej txhawv Nethau‑as.

16 Ciam teb kuj nqis mus txog taw roob uas saib ntsoov lub hav Npeehinoos uas nyob lub hauv hav Lefa‑is sab ped, thiab raws lub hav Hinoos rau nram qab lub caj qaum roob uas yog cov Yenpus lub roob thiab nqis mus txog lub moos Eelaukees,

17 thiab nkhaus mus rau sab ped mus txog Eesemes, thiab txuas ntawd mus txog lub moos Kelilaus uas nyob ncaj txojkev uas hla lub dawm roob Adumis, thiab nqis mus rau lub Pob Zeb Npauhas uas yog Lunpees tus tub,

18 thiab hla kiag mus rau lub caj qaum roob uas ncaj Npes Alanpas sab ped nqis mus txog Alanpas.  

19 Ciam teb kuj mus rau lub caj qaum roob Npes Haulas sab ped, thiab ciam teb mus kawg rau ntawm kaum Hiavtxwv Ntsev sab ped, uas dej Yaladees tshuam nkaus. No yog ciam teb sab nrad.

20 Dej Yaladees ua ciam teb sab hnub tuaj. No yog xeem Npeeyamees thiab lawv tej cum li qub txeeg qub teg, muaj ciam teb vij puag ncig raws li hais tag no.

21 Xeem Npeeyamees thiab lawv tej cum tej moos yog Yelikhaus, Npes Haulas, Emekhexis,

22 Npes Alanpas, Xemala‑is, Npe‑ees,

23 Avis, Palas, Aufas,

24 Khefas Lamaunis, Aunis thiab Kenpas. Huvsi muaj kaum ob lub moos thiab tej zej zog ib ncig cov moos ntawd.

25 Kinpe‑oos, Lamas, Npe‑awlaus,

26 Mixapes, Khefilas, Mauxas,

27 Lekhees, Ipe‑ees, Thalalas,

28 Xelas, Ha‑eles, Yenpus (uas yog lub moos Yeluxalees) Kinpe‑as thiab Khiliyas Ye‑alis. Huv-si muaj kaum plaub lub moos thiab tej zej zog ib ncig cov moos ntawd. No yog xeem Npeeyamees thiab lawv tej cum qub txeeg qub teg.