Tej Lus Uas Hais Txog Iziv

1 Hnub xiab kaum ob, lub kaum hli, xyoo kaum, (יחוח)Yahweh hais lus tuaj rau kuv tias, 2 tibneeg tus tub, cia li tsom ntsoov tawm tsam Falaus‎ vajntxwv Iziv, thiab cev (יחוח)Yahweh lus tawm tsam nws thiab cov Iziv huvsi. 3 Cia li hais los maj hais tias, (יחוח)Yahweh hais li no tias, Kuv tawm tsam koj, Falaus‎ vajntxwv Iziv. Koj yog tus niag zaj uas nyob hauv nws tej hav dej, koj hais tias, niag dej Nai‎s yog kuv li, kuv tsim nws rau kuv. 4 Kuv yuav muab nqe lauj nqe koj lub kaum ncauj, thiab ua rau tej ntses hauv hav dej khuam koj cov nplai, thiab kuv yuav rub koj tawm hauv koj tej hav dej los, nrog tej ntses hauv koj tej hav dej uas khuam koj cov nplai ua ke los. 5 Kuv yuav muab koj thiab tej ntses huvsi hauv koj tej hav dej laim rau hauv tebchaws moj sab qhua. Koj yuav poob rau hauv pem teb, tsis muaj leejtwg khaws koj coj mus log. Kuv muab koj cob rau tej tsiaj qus hauv ntiajteb thiab tej liaj dav saum nruab ntug noj. 6 Mas tej tibneeg uas nyob hauv Iziv tebchaws sawvdaws yuav paub tias kuv yog (יחוח)Yahweh. Vim koj yog tus pas nrig tauj deg rau cov Ixayees,

7 thaum lawv xuas tes tuav koj, koj kuj lov thiab hlais lawv txhua tus xub pwg. Thaum lawv pheeb koj, koj kuj lov, thiab ua rau lawv txhua tus lub duav tshee tag. 8 Yog li no (יחוח)Yahweh thiaj hais li no tias, Saib maj, kuv yuav coj ntaj los raug koj thiab kuv yuav txiav tej tibneeg thiab tej tsiaj txhu tu ntawm koj mus.

9 Mas Iziv tebchaws yuav raug muab tso tseg nyob do cuas cia. Mas lawv yuav paub tias kuv yog (יחוח)Yahweh. Vim koj hais tias, niag dej Nai‎s yog kuv li, kuv tsim nws, 10 yog li no, saib maj, kuv tawm tsam koj thiab tawm tsam koj tej hav dej, thiab kuv yuav ua rau tebchaws Iziv tag nrho raug muab tso tseg nyob do cuas cia txij ntua lub moos Midoos mus txog lub moos Xi‑enes, mus txog ntua Khuj ciam teb. 11 Yuav tsis muaj tibneeg txhais kotaw hla lub tebchaws ntawd, thiab yuav tsis muaj tsiaj txhu tej kotaw hla lub tebchaws ntawd. Yuav tsis muaj tibneeg nyob mus txog plaub caug xyoo. 12 Thiab kuv yuav ua rau lub tebchaws Iziv nyob do cuas cia rau hauv nruab nrab tej tebchaws uas nyob do cuas cia lawd. Thiab nws tej moos yuav nyob do cuas cia plaub caug xyoo rau hauv nruab nrab tej moos uas raug muab tso tseg piam tag lawd. Kuv yuav ua rau cov Iziv khiav ri sua mus rau hauv ib tsoom tebchaws thiab ntiab lawv mus nyob rau hauv luag tej tebchaws. 13 (יחוח)Yahweh hais li no tias, dhau plaub caug xyoo lawm, kuv yuav qaws cov Iziv hauv tej tebchaws uas lawv khiav ri sua mus nyob lawd rov los. 14 Kuv yuav pub cov Iziv rov vam meej li qub, thiab coj lawv rov los rau lub tebchaws Palaus, uas yog lawv qub teb qub chaw. Mas lawv yuav ua lub tebchaws uas me kawg rau qhov ntawd. 15 Iziv yuav ua lub tebchaws uas me dua luag tej tebchaws huvsi, thiab yuav tsis ua loj rau saum ib tsoom tebchaws dua li lawm. Kuv yuav ua rau lawv ua lub tebchaws me me tsis muaj peevxwm kav tau lwm lub tebchaws. 16 Thiab lawv yuav tsis ua cov Ixayees lub chaw vam khom dua li lawm, thiaj nco txog Ixayees kev txhaum uas mus thov kev pab ntawm Iziv. Mas lawv thiaj yuav paub tias kuv yog (יחוח)Yahweh.

17 Hnub xiab ib, lub ib hlis, xyoo nees nkaum xya, (יחוח)Yahweh hais lus tuaj rau kuv tias, 18 tibneeg tus tub, vajntxwv Nenpukhanexas hauv Npanpiloo‎s tau kom nws pab tub rog mus ntaus lub nroog Thailab khwv kawg ua rau txhua tus tub rog plaubhau hle tag thiab txhua tus xub pwg hle tawv. Txawm li ntawd los nws cov tub rog tsis tau ib yam abtsi hauv Thailab ua nqe zog uas nws ntaus lub nroog ntawd. 19 Yog li ntawd, (יחוח)Yahweh hais li no tias, saib maj, kuv yuav muab Iziv tebchaws rau vajntxwv Nenpukhanexas hauv Npanpiloo‎s, mas nws yuav thauj tej nyiaj txiag huvsi mus, nws yuav lws thiab txeeb mus ua nqe ntiav nws pab tub rog. 20 Kuv muab Iziv tebchaws pub rau nws ua nqe zog rau tej haujlwm uas nws tau ua lawd, twb yog lawv ua haujlwm rau kuv. (יחוח)Yahweh hais li no ntag. 21 Hnub ntawd kuv yuav ua kom muaj ib tug kub tuaj rau hauv cov Ixayees, thiab kuv yuav qheb Yechetzqyah koj lub qhov ncauj hais lus rau hauv lawv nruab nrab. Mas lawv yuav paub tias kuv yog (יחוח)Yahweh.